استانا مەن پاۆلودار قالاسى اراسىنا رەيستىك ارزان اۆتوبۋس جۇرە باستادى. جولاۋشىلار ەكى ارالىققا نەبارى 4 مىڭ تەڭگە تولەپ جەتە الادى. جولدا ايالدامالار قاراستىرىلماعان.
پاۆلودارلىق جولاۋشىلار ەندى ەلورداعا اۆتوبۋسپەن دە قاتىناي الادى. تاكسيمەن سالىستىرعاندا جولاقى قۇنى 2,5 ەسە ارزان. ەرەسەكتەرگە 4 مىڭ, بالالارعا 2 مىڭ تەڭگە تولەيسىز.
بۇل تۋرالى وڭىرلىك جولاۋشىلار كولىگى جانە اۆتوكولىك جولدارى باسقارماسى حابارلادى. تۇراقتى باعىتتاعى اۆتوبۋس رەيسىنە «№1 اۆتوبۋس پاركى» جشس قىزمەت كورسەتەدى. «Yutong اۆتوبۋسى جولاۋشىلاردى تۇراقتى تاسىمالدايدى. كولىككە 49 جولاۋشى سىيادى. اۆتوبۋس كۇندە تاڭەرتەڭ ساعات 7.00-دە پاۆلودار قالاسىنان شىعادى. ساعات 16.00-دە استانا قالاسىنان كەرى ساپارلايدى», دەپ مالىمدەدى باسقارمادان.
ەرتىس-بايان وڭىرىندە كەيىنگى جىلدارى قوعامدىق كولىكتى جاڭارتۋ, تاسىمال سالاسىنا سۋبسيديالاۋدى ەنگىزۋ ناتيجەسىن بەرىپ, جولاۋشىلار تاسىمالىنىڭ ساپاسى ارتا باستاعانى بايقالىپ وتىر. اسىرەسە قالالارداعى تاسىمال ماسەلەسىندە وڭ وزگەرىس مول. مىسالى, پاۆلودار قالاسىندا جىل سوڭىندا قوعامدىق كولىكتىڭ مارشرۋتتىق جەلىسىن وڭتايلاندىرۋ جونىندە ءبىر ايعا سوزىلعان كەشەندى جۇمىس اياقتالدى. ناتيجەسىندە 11 مارشرۋت وڭتايلانىپ, 2 ءتيىمسىز باعىت جويىلدى. قوزعالىس سىزبالارىن تۇزەتۋ كولىكتىك قولجەتىمدىلىكتى, ازاماتتاردىڭ وتىنىشتەرىن تالداۋ, سونداي-اق ناقتى جولاۋشىلار اعىنى مەن مارشرۋتتاردىڭ جۇكتەلۋ دەڭگەيىن باعالاۋ نەگىزىندە جۇزەگە اسىرىلدى.
«وڭتايلاندىرۋ قورىتىندىلارىن نازارعا الا وتىرىپ, جولاۋشىلار وتە از جۇرەتىن, قالالىق بيۋدجەتكە ەلەۋلى جۇكتەمە ءتۇسىرىپ كەلگەن (166 ملن تەڭگەدەن استام) №5, №6, №17 مارشرۋتتار جويىلدى. بۇل باعىتتاردا قوسىمشا وزگە اۆتوبۋستار مەن ترامۆاي مارشرۋتتارى بار. بۇدان بىلاي قالا ماڭىنداعى №40, 41, 38, 66 مارشرۋتتار تەمىرجول ۆوكزالىنا دەيىن جۇرەتىن بولدى. شەشىم تەمىرجول ۆوكزالى اۋدانىنداعى دامىعان كولىك جۇيەسىن ەسكەرە وتىرىپ قابىلداندى. اۋماقتا جولاۋشىلار اعىنى 60 مىڭ ترانزاكتسياعا وسكەن. سونداي-اق №66, №40 مارشرۋتتار ۇزىندىعىنىڭ ايتارلىقتاي قىسقارۋىن ەسكەرە وتىرىپ, جولاۋشىلاردىڭ ءبىر ساعات ىشىندە تەگىن اۋىسىپ ءمىنۋ قىزمەتى ەنگىزىلدى. ءبىر ايدا 56 591 ادام تەگىن اۋىسىپ ءمىنۋ قىزمەتىن پايدالانعان», دەيدى پاۆلودار قالاسىنىڭ اكىمى حاسار حابىلبەكوۆ.
اۆتوبۋس جەلىسىن قايتا قاراۋ, تارتىلعان اۆتوبۋستار سانىن 262-دەن 252-گە دەيىن قىسقارتۋ ەسەبىنەن مارشرۋتتارعا قىزمەت كورسەتۋگە ارنالعان پايدالانۋ شىعىندارى ايتارلىقتاي تومەندەگەن. جولاۋشىلار اعىنىنىڭ 10%-عا ارتۋى تىركەلگەن (كۇنىنە 169 441-دەن 186 814 ترانزاكتسياعا دەيىن). ناتيجەسىندە تاسىمالداۋشىلاردى سۋبسيديالاۋ كولەمىن قىسقارتۋ ەسەبىنەن بيۋدجەت قاراجاتى جىل سايىن 4 ملرد تەڭگە ۇنەمدەلەدى.
پاۆلودار وبلىسى