اتىراۋ. 24 اقپان. اتىراۋ وبلىسىنىڭ يندەر اۋدانىندا «ءبىر تەرەزە» ادىسىمەن كاسىپكەرلەردى قولداۋ ورتالىعى اشىلدى. بۇل تۋرالى egemen.kz ءتىلشىسى حابارلادى.
يندەر اۋدانىندا كاسىپكەرلىككە بەت بۇرۋشىلار, ولاردىڭ اراسىندا جاستاردىڭ ۇلەسى مولايا تۇسۋدە. اۋدان اكىمى سەرىك ارىستاننىڭ ايتۋىنشا, وتكەن جىلى اۋداننىڭ 70 تۇرعىنى كاسىپكەرلىكتى باستاۋعا 212 ميلليون تەڭگەنىڭ نەسيەسىن الىپتى. مۇندا تۇرعىنداردىڭ ەكونوميكالىق بەلسەندى ۇلەسى 17 مىڭ ادامدى قۇراسا, ولاردىڭ 10,2 پايىزى شاعىن جانە ورتا بيزنەستە ەڭبەك ەتەدى. وتكەن جىلى كاسىپكەرلىك نىساندارىنان جەرگىلىكتى بيۋدجەتكە 172 ميلليون تەڭگە كولەمىندە سالىق ءتۇسىپتى.
ەندى مۇندا كاسىپكەرلەر پالاتاسىنىڭ قولداۋىمەن اشىلعان «ءبىر تەرەزە» ادىسىمەن كاسىپكەرلەردى قولداۋ ورتالىعى جۇمىس جاساي باستادى. بۇل ورتالىقتىڭ كومەگىنە العاشقىلاردىڭ قاتارىندا جاس كاسىپكەر رەنات مىرزاعاليەۆ جۇگىندى. ونىڭ بىلتىر مال ءوسىرۋ باعىتىندا اشقان شارۋاشىلىعىندا 80-نەن استام قوي بار. ەندىگى جوسپارى – جىلقى ءوسىرۋ. وسىعان بايلانىستى جەر الۋدى كوزدەپتى. «بۇرىن قانداي دا ءبىر قۇجاتتى رەسىمدەۋ ءۇشىن ءتۇرلى مەكەمەلەردىڭ ەسىگىن قاعۋشى ەدىك. ءتىپتى وبلىس ورتالىعىنا بارۋىمىزعا دا تۋرا كەلەتىن. ەندى مىنە, سونداي شارۋالارىمىزدىڭ ءبارى ءبىر ورتالىقتا شەشىلەتىندىگى قۋانتادى», دەيدى جاس كاسىپكەر رەنات مىرزاعاليەۆ.
كاسىپكەرلەردى قولداۋ ورتالىعىندا شاعىن جانە ورتا بيزنەستى باستاۋعا, دامىتۋعا بايلانىستى جانە بيزنەس-جوسپار قۇرۋ, زاڭ, قارجى, بۋحگالتەرلىك ەسەپ-قيساپ, كاسىپكەرلەر قۇقىعىن قورعاۋ ماسەلەلەرى جونىندە كاسىپكەرلەر پالاتاسىنىڭ, «دامۋ» كاسىپكەرلىكتى قورىنىڭ, اۋداندىق اكىمىكتىڭ كاسىپكەرلىك جانە اۋىل شارۋاشىلىعى بولىمدەرىنىڭ, حالىق بانكى مەن حالىققا قىزمەت كورسەتۋ ورتالىعىنىڭ ماماندارى مەن كەڭەسشىلەرى تەگىن كەڭەستەر بەرەدى. سونىمەن بىرگە, مۇندا ءوز ءىسىن باستاعىسى كەلەتىندەردى كاسىپكەرلىكتىڭ نەگىزدەرىنە وقىتاتىن «بيزنەس مەكتەبى» اشىلماق.
جولداسبەك شوپەعۇل.
دەرەك, سۋرەت: اتىراۋ وبلىستىق كاسىپكەرلەر پالاتاسى.