شىعىس قازاقستاندا رۋدا بازاسى سارقىلىپ جاتىر

التاي قالاسىندا سۋ قۇبىرى جەلىسىن قايتا جاڭعىرتۋ جۇمىستارى 95 پايىزعا اياقتالدى. جوبا ىسكە قوسىلعاننان كەيىن 9 420 ابونەنت تازا اۋىزسۋ جەلىسىنە قوسىلادى. جۇمىس اياقتالۋعا جاقىن, دەگەنمەن جەلىنى ىسكە قوسۋ ءۇشىن توزىعى جەتكەن قۇبىرلاردى اۋىستىرۋ قاجەت. ءماجىلىس دەپۋتاتتارى, «AMANAT» پارتياسى فراكتسياسىنىڭ مۇشەلەرى ەرلان سايروۆ پەن ۇلىقبەك تۇماشينوۆتىڭ جۇمىس ساپارىندا وسى تۇيتكىلدى ماسەلە قارالدى.

سۋ قۇبىرى جەلىسىن قايتا جاڭعىرتۋ جوباسى «AMANAT» پارتياسىنىڭ سايلاۋالدى باعدارلاماسى اياسىندا جۇزەگە اسىرىلۋدا. جالپى قۇنى 2,6 ملرد تەڭگەنى قۇرايتىن جوبا ارقىلى 110,5 شاقىرىم سۋ قۇبىرى جەلىسىن تارتۋ كوزدەلگەن. قالادا وتكەن عاسىردىڭ الپىسىنشى جىلدارى سالىنعان, شويىننان جاسالعان ەسكى جەلىنىڭ جەكەلەگەن ۋچاسكەلەرىن اۋىستىرۋ قاجەت, ونسىز جاڭارتىلعان جۇيەنى تولىق ىسكە قوسۋ مۇمكىن ەمەس. التاي اۋدانى اكىمىنىڭ ورىنباسارى زاڭعار شاۋحين بۇل جۇمىست ورىنداۋ ءۇشىن شامامەن 2 ملرد تەڭگە كولەمىندە قوسىمشا قارجى ءبولىنۋى قاجەت ەكەنىن ايتادى.

ءماجىلىس دەپۋتاتتارىنىڭ ايتۋىنشا, جۇمىستىڭ ءۇشىنشى كەزەڭىن اياقتاۋ ماسەلەسى توزىعى جەتكەن كوممۋنالدىق ينفراقۇرىلىم ءۇشىن قالىپتى جاعداي. ياعني, ەسكى كوممۋنيكاتسيالار قوسا جاڭارتىلعاندا عانا جاڭا جەلىنىڭ ناتيجەسى بولادى. مۇنداي جوبالاردى بيۋدجەتتى دۇرىس جوسپارلاۋعا, سمەتانىڭ اشىقتىعىنا جانە ورىندالاتىن جۇمىستاردىڭ ساپاسىنا قاتاڭ باقىلاۋ ورناتۋ اسا ماڭىزدى.

«بۇل – ازاماتتاردىڭ تۇرمىسىن جاقسارتۋعا باعىتتالعان ماڭىزدى جوبا. مىڭداعان وتباسى تازا اۋىزسۋمەن قامتىلادى. سوندىقتان بۇگىن كوتەرىلگەن ماسەلە بويىنشا جۇمىس جالعاسادى. ەڭ باستىسى – بولىنگەن قارجىنىڭ ءتيىمدى ءارى ماقساتتى جۇمسالۋى جانە اتقارىلاتىن جۇمىستاردىڭ جوعارى ساپاسى. بۇل باعىتتا پارتيالىق باقىلاۋ كۇشەيتىلەدى», دەدى دەپۋتات ەرلان سايروۆ.

ءوڭىر باسشىلىعىمەن كەزدەسۋ بارىسىندا دەپۋتاتتار رۋدا بازاسىنىڭ سارقىلۋ پروبلەماسىن دا كوتەردى. بۇگىندە شىعىس قازاقستاننىڭ بىرقاتار ءىرى كەن ورىندارىنىڭ قورى پايدالانۋدىڭ سوڭعى ساتىسىندا تۇر, ال جەرگىلىكتى مالەەۆ كەنىشى 2026 جىلى ءوندىرىستى اياقتالۋ قاۋپى بار. بۇل قالالىق بايىتۋ فابريكاسىنىڭ جابىلۋىنا, ارالاس سالالارداعى كاسىپكەرلىك بەلسەندىلىكتىڭ تومەندەۋىنە جانە تاعى باسقالارىنا سوقتىرۋى مۇمكىن.

– ەگەر ءبىز تۇرعىنداردىڭ شەكارالاس قالالاردان كەتپەگەنىن قالاساق, ينفراقۇرىلىمدى ەكونوميكادان بولەك قاراستىرۋعا بولمايدى. سۋ, جول, كوممۋنالدىق جەلىلەر, جاڭا جۇمىس ورىندارى جانە بارلاۋ – كۇن تارتىبىندەگى ءبىر-بىرىمەن بايلانىستى ماسەلەلەر. ءبىز وسى كەن ورىندارىندا ءوندىرۋ مەرزىمىن ۇزارتۋعا جانە ريددەر مەن التاي قالالارىنىڭ ماڭىندا گەولوگيالىق بارلاۋ جۇمىستارىن جۇرگىزۋگە قول جەتكىزۋىمىز كەرەك, - دەدى دەپۋتات ۇلىقبەك تۇماشينوۆ.

كەزدەسۋ بارىسىندا دەپۋتاتتار 2025 جىلى قابىلدانعان جاڭا سالىق, بيۋدجەت, سۋ, قۇرىلىس جانە تسيفرلىق كودەكستەر, بانكتەر مەن بانك قىزمەتى تۋرالى زاڭداردىڭ نەگىزگى نورمالارى, جەر قويناۋىن پايدالانۋ, دەنساۋلىق ساقتاۋ, تۇرعىن ءۇي قۇرىلىسى جانە باسقا دا ماسەلەلەر بويىنشا ەنشىزىلگەن تۇزەتۋلەر تۋرالى ايتىپ بەردى.

ءماجىلىس دەپۋتاتتارىنىڭ وڭىرلەردەگى كەزدەسۋلەرى 5-13 قاڭتار ارالىعىندا جالعاسادى. جۇمىس ساپارلارى بارىسىندا AMANAT, اۋىل, اق جول, جسدپ, قپك جانە Respublica ساياسي پارتيالارىنىڭ پارلامەنتتىك فراكتسيالارىنىڭ دەپۋتاتتارى سايلاۋشىلاردى قابىلدانعان زاڭدار تۋرالى حاباردار ەتەدى, ولاردىڭ جەرگىلىكتى جەرلەردە قولدانىلۋ بارىسىن زەردەلەيدى جانە ازاماتتاردى تولعاندىراتىن وزەكتى ماسەلەلەر مەن پروبلەمالاردى تىڭدايدى.