قازاقستاندا ءومىر ءسۇرۋ ۇزاقتىعى 75,4 جاسقا جەتىپ, ەل تاريحىنداعى رەكوردتىق كورسەتكىشتەردىڭ ءبىرىن كورسەتتى, دەپ حابارلايدى Egemen.kz.
دەنساۋلىق ساقتاۋ مينيسترلىگى وتكەن جىلدىڭ قورىتىندىسىن شىعارىپ, جۇيەلى رەفورمالاردىڭ ناتيجەلەرىن جاريالادى. مەملەكەت باسشىسىنىڭ قولداۋىمەن جۇزەگە اسقان شارالاردىڭ ارقاسىندا ەلىمىز بۇۇ-نىڭ ادامي دامۋ يندەكسىندە بىردەن 7 ساتىعا جوعارىلاعان.
ستاتيستيكالىق مالىمەتتەرگە سۇيەنسەك, ەلدەگى جالپى ءولىم دەڭگەيى 2,6%-عا, ال نارەستە ءولىمى 18,7%-عا تومەندەگەن. بۇل كورسەتكىشتەرگە سالانى قارجىلاندىرۋدى 3 ەسەگە ۇلعايتۋ ارقىلى قول جەتكىزىلدى: 2025 جىلى مەديتسينا بيۋدجەتى 3 تريلليون تەڭگەنى قۇرادى.
جىل بويى اۋىلدىق جەرلەردە 655 جاڭا نىسان (فەلدشەرلىك-اكۋشەرلىك پۋنكتتەر مەن امبۋلاتوريالار) ىسكە قوسىلىپ, ءۇش ءىرى رەسپۋبليكالىق كلينيكا پايدالانۋعا بەرىلدى. سونىمەن قاتار ونكولوگيالىق اۋرۋلارمەن كۇرەستە ماڭىزدى قادام جاسالىپ, ەلىمىزدە العاشقى پروتوندىق تەراپيا ورتالىعى اشىلدى.
«سالانىڭ باستى قۇندىلىعى – ادام. ءبىز مەديتسينا قىزمەتكەرلەرىن قولداۋدى جۇيەلى تۇردە كۇشەيتىپ كەلەمىز جانە ساپالى ءارى قولجەتىمدى مەديتسينالىق كومەكتىڭ ءاربىر ازاماتقا جاقىن بولۋىن قامتاماسىز ەتۋ باعىتىنداعى جۇمىستى جالعاستىرا بەرەمىز», دەلىنگەن مينيسترلىك حابارلاماسىندا.