ەلوردادا ۆولونتەرلىك قوزعالىس جىل ساناپ قارقىندى دامىپ كەلەدى. بۇل تۋرالى «استانا جاستارى» جاستار رەسۋرستىق ورتالىعىنىڭ ۆولونتەرلىك قوزعالىستى دامىتۋ ءبولىمىنىڭ مامانى ايزات الي ايتتى, دەپ حابارلايدى Egemen.kz.
ونىڭ ايتۋىنشا, بۇگىندە استانادا 50-گە جۋىق ۆولونتەرلىك ۇيىم تۇراقتى نەگىزدە جۇمىس ىستەيدى.
«جىل سايىن ۆولونتەرلىك قىزمەت تۋرالى اقپاراتتىڭ ارتۋىنا بايلانىستى ەرىكتى بولۋعا نيەتتى ازاماتتاردىڭ سانى دا كوبەيىپ كەلەدى. اسىرەسە بالالار مەن جاسوسپىرىمدەر اراسىندا ۆولونتەرلىككە قىزىعۋشىلىق جوعارى. ولاردىڭ ءبىرى وزگەلەرگە كومەكتەسۋدى ماقسات ەتسە, ەندى ءبىرى شەتەلدىك جوعارى وقۋ ورىندارىنا ءتۇسۋ ءۇشىن پورتفوليوسىن جاقسارتۋدى كوزدەيدى», دەدى ول.
ايزات ءاليدىڭ سوزىنشە, ۆولونتەرلىك ۇيىمداردىڭ جۇمىسىن ۇيلەستىرۋ ماقساتىندا 2019 جىلى قالالىق ۆولونتەرلەر شتابى قۇرىلعان.
«قالالىق ۆولونتەرلەر شتابى التى جىلدان بەرى «استانا جاستارى» ورتالىعىنىڭ بازاسىندا جۇمىس ىستەپ كەلەدى. بۇگىندە شتاب 30 ۆولونتەرلىك ۇيىممەن, 20 باستاماشىل توپپەن جانە 4 ۇكىمەتتىك ەمەس ۇيىممەن تۇراقتى تۇردە ىنتىماقتاستىق ورناتقان. قازىرگى تاڭدا شتاب قۇرامىندا 8 مىڭنان استام بەلسەندى ۆولونتەر بار», دەپ اتاپ ءوتتى مامان.
ۆولونتەرلىك ۇيىمدارمەن بىرلەسكەن جۇمىستار اياسىندا ءتۇرلى الەۋمەتتىك جانە ەكولوگيالىق باعىتتاعى جوبالار جۇزەگە اسىرىلىپ كەلەدى.
«BizBirgemiz, «قاۋىپسىز قالا», «قامقورلىق مەكەنجايلارى», «ارداگەرلەردى ارداقتايىق», Taza Alem, Taza Qazaqstan, Stop Vandal, «مارافون دوبرىح دەل», «ەسىرتكىسىز ەلوردا» اكتسيالارى اياسىندا بارلىعى 1310 ءىس-شارا وتكىزىلدى. بۇل شارالار بارىسىندا ازىق-ت ۇلىك سەبەتتەرى تاراتىلىپ, كيىم-كەشەك پەن جيھاز جەتكىزىلدى, ادامداردى ىزدەۋ جانە وقىتۋ باعىتىندا كومەك كورسەتىلدى», دەدى ايزات الي.
سونىمەن قاتار قىسقى كەزەڭدە قالانىڭ كاسىپورىندارىمەن بىرلەسىپ, جالعىزباستى زەينەتكەرلەر مەن قارتتاردىڭ اۋلالارىن قاردان تازالاۋ جۇمىستارى جۇرگىزىلگەن.
مامان ۆولونتەرلەردىڭ جاس ەرەكشەلىگىنە دە توقتالدى.
«استانا جاستارى» ۆولونتەرلىك قوزعالىسىنداعى ەرىكتىلەردىڭ ورتاشا جاسى – 15-16 جاس. ال قالالىق ۆولونتەرلەر شتابىنداعى ۆولونتەرلەردىڭ ورتاشا جاسى – 30. بۇل – كومەك كورسەتۋگە سانالى تۇردە كەلگەن ازاماتتار», دەدى ول.
ايزات ءاليدىڭ ايتۋىنشا, ۆولونتەرلەر اتقارعان ەڭبەگى ءۇشىن اقى المايدى, الايدا ولاردى ىنتالاندىرۋ ماڭىزدى.
«قازىرگى تاڭدا ۆولونتەرلەرگە مادەني ءىس-شارالار مەن كونتسەرتتەرگە بيلەتتەر بەرۋ ارقىلى قولداۋ كورسەتىپ كەلەمىز. ۆولونتەرلىك قىزمەتتى ەڭبەك ءوتىلى رەتىندە ەسەپتەۋ ماسەلەسى بىرنەشە رەت كوتەرىلگەنىمەن, ءالى زاڭ جۇزىندە بەكىتىلگەن جوق», دەدى ول.
2025 جىلى ەلوردالىق ۆولونتەرلەر رەسپۋبليكالىق جانە حالىقارالىق دەڭگەيدەگى ءىرى ءىس-شارالارعا بەلسەندى قاتىسقان.
«استانا جاستارى» ۆولونتەرلەرى 130-دان استام ءىرى ءىس-شاراعا قاتىستى. سونىڭ ىشىندە دجەننيفەر لوپەس پەن Backstreet Boys كونتسەرتتەرى بار. بۇل شارالارعا قازاق, ورىس جانە اعىلشىن تىلدەرىن مەڭگەرگەن 140 ۆولونتەر تارتىلدى, سونداي-اق قىتاي, تۇرىك, كورەي, يتاليان جانە نەمىس تىلدەرىن بىلەتىن ەرىكتىلەر دە بولدى», دەدى مامان.
ەكولوگيالىق باعىتتا دا اۋقىمدى جۇمىستار اتقارىلعان.
«Taza Alem جوباسى اياسىندا 55 ەكوسەنبىلىك وتكىزىلدى. ونىڭ ىشىندە ەسىل وزەنىنىڭ جاعالاۋىن تازارتۋ بويىنشا 25 ءىس-شارا ۇيىمداستىرىلدى. 20 ۇكىمەتتىك ەمەس ۇيىمنىڭ قاتىسۋىمەن 10 مىڭنان استام ۆولونتەر مەن 4 مىڭ قالا تۇرعىنى تارتىلدى», دەدى ايزات الي.
سونداي-اق ەرىكتىلەر 800 اعاش وتىرعىزۋعا اتسالىسىپ, ونىڭ ەكى شاراسى مەملەكەت باسشىسىنىڭ قاتىسۋىمەن وتكەنىن اتاپ ءوتتى.
«قامقورلىق مەكەنجايلارى» جوباسى اياسىندا 70 جالعىزباستى زەينەتكەرگە كومەك كورسەتىلىپ, قار تازالاۋ بويىنشا 40 اكتسيا ۇيىمداستىرىلدى. بۇل جۇمىستارعا 3 مىڭنان استام ۆولونتەر مەن كاسىپورىن قىزمەتكەرلەرى تارتىلدى. سونىمەن قاتار قۇربان ايت مەرەكەسىندە 1000 ازىق-ت ۇلىك جيىنتىعى جەتكىزىلدى», دەپ قورىتىندىلادى ول.