اقش اسكەري كۇشتەرى ۆەنەسۋەلانىڭ استاناسى كاراكاس قالاسىنا اۋە سوققىلارىن جاسادى. قالادا بىرنەشە جارىلىس دىبىسى ەستىلىپ, اۋە شابۋىلىنا قارسى قورعانىس جۇيەلەرى ىسكە قوسىلعان, دەپ حابارلايدى Egemen.kz Reuters اگەنتتىگىنە سىلتەمە جاساپ.
جەرگىلىكتى تۇرعىنداردىڭ ايتۋىنشا, سوققىلار كاراكاستىڭ وڭتۇستىگىندەگى فورت-تيۋنا اۋدانىنا جانە فرانسيسكو دە ميراندا اۆيابازاسىنا باعىتتالعان. سونداي-اق ەلدىڭ سولتۇستىگىندە ورنالاسقان لا-گۋايرا اسكەري-تەڭىز بازاسى دا شابۋىل نىساناسىنا ىلىككەنى حابارلاندى.
كۋاگەرلەر اسپاندا امەريكالىق دەسانتتىق تىكۇشاقتاردىڭ ۇشقانىن بايقاعان. بۇعان جاۋاپ رەتىندە ۆەنەسۋەلا اۋە كۇشتەرى سۋ-30مكۆ جويعىش ۇشاقتارىن اۋەگە كوتەرىپ, توسقاۋىل قويۋعا كىرىسكەن. سونىمەن قاتار اۋىر جۇك تاسىمالدايتىن Chinook تىكۇشاقتارىنىڭ دا پايدالانىلعانى تۋرالى اقپارات تارادى.
جەرگىلىكتى بۇقارالىق اقپارات قۇرالدارى استانادا اتىس دىبىستارى ەستىلىپ جاتقانىن حابارلاپ, الدىن الا مالىمەت بويىنشا امەريكالىق دەسانت ءتۇسىرىلۋى مۇمكىن ەكەنىن جازۋدا.
اقش پرەزيدەنتى دونالد ترامپ تاراپىنان ارنايى اسكەري وپەراتسيانىڭ باستالعانى جونىندە رەسمي مالىمدەمە جاسالعان جوق. ۆەنەسۋەلا مەن اقش-تىڭ رەسمي بيلىك وكىلدەرى دە ازىرگە تۇسىنىكتەمە بەرگەن جوق.