يراندا جالعاسىپ جاتقان ەكونوميكالىق نارازىلىقتار اياسىندا ەلدىڭ رەسمي وكىلدەرى اقش-قا قاتاڭ ەسكەرتۋ جاساپ, كەز كەلگەن سىرتقى ارالاسۋ ۇلتتىق قاۋىپسىزدىككە تونگەن قاۋىپ رەتىندە باعالاناتىنىن مالىمدەدى,دەپ حابارلايدى Egemen.kz.
يراننىڭ رۋحاني كوشباسشىسىنىڭ ۇلتتىق قاۋىپسىزدىك ماسەلەلەرى جونىندەگى كەڭەسشىسى ءالي شامحاني جۇما كۇنى يران يسلام رەسپۋبليكاسىنىڭ قاۋىپسىزدىگى «قىزىل سىزىق» ەكەنىن ايتىپ, قانداي دا ءبىر سىلتاۋمەن جاسالاتىن كەز كەلگەن ارالاسۋعا قاتاڭ جاۋاپ قايتارىلاتىنىن مالىمدەدى.
بۇل مالىمدەمە اقش پرەزيدەنتى دونالد ترامپتىڭ امەريكا قۇراما شتاتتارى يرانداعى نارازىلىق بىلدىرۋشىلەردى قولداۋى مۇمكىن دەگەن سوزىنە جاۋاپ رەتىندە جاسالعان.
شامحاني X الەۋمەتتىك جەلىسىندەگى جازباسىندا يراننىڭ قاۋىپسىزدىگىنە قانداي دا ءبىر سەبەپپەن قول سۇقپاق بولعان كەز كەلگەن ارەكەت ماقساتىنا جەتپەي جاتىپ توقتاتىلاتىنىن اتاپ ءوتتى.
ول سونداي-اق يران حالقى اقش-تىڭ «قۇتقارۋ» ارەكەتتەرىنىڭ سالدارىن جاقسى بىلەتىنىن ايتتى. ونىڭ سوزىنشە, يراك پەن اۋعانستاننان باستاپ گازا سەكتورىنا دەيىنگى مىسالدار مۇنداي ارالاسۋلاردىڭ وڭىردە تۇراقسىزدىق پەن بەيبەرەكەتسىزدىككە الىپ كەلەتىنىن كورسەتكەن.
يران باسشىلىعىنىڭ وزگە وكىلدەرى دە وسىعان ۇقساس مالىمدەمەلەر جاسادى. يراننىڭ ۇلتتىق قاۋىپسىزدىك جونىندەگى جوعارى كەڭەسىنىڭ حاتشىسى ءالي لاريدجاني اقش پەن ءيزرايلدى ەلدەگى نارازىلىقتاردى ورشىتۋگە ايداپ سالدى دەپ ايىپتادى. ونىڭ ايتۋىنشا, يراننىڭ ىشكى ىستەرىنە ارالاسۋ ۆاشينگتوننىڭ تاياۋ شىعىستاعى مۇددەلەرىنە نۇقسان كەلتىرۋى مۇمكىن.
لاريدجاني اقش-تىڭ يراننىڭ ىشكى ماسەلەلەرىنە ارالاسۋى بۇكىل وڭىردە تۇراقسىزدىق تۋعىزىپ, امەريكالىق مۇددەلەردىڭ كۇيرەۋىنە اكەلەتىنىن اتاپ ءوتتى.
ال يران سىرتقى ىستەر مينيسترلىگىنىڭ رەسمي وكىلى ەسمايل باگاي يران حالقى ەل ىشىندەگى ماسەلەلەردى شەشۋ پروتسەسىنە قانداي دا ءبىر شەتەلدىك ارالاسۋعا جول بەرمەيتىنىن مالىمدەدى.
ول 1953 جىلعى توڭكەرىستى, يران-يراك سوعىسى كەزىندە يراكتى قولداۋدى, 1988 جىلى يراندىق جولاۋشىلار ۇشاعىنىڭ اتىپ ءتۇسىرىلۋىن, سونداي-اق سانكتسيالىق قىسىم مەن 2025 جىلى يران ينفراقۇرىلىمىنا جاسالعان سوققىلاردى ەسكە سالا وتىرىپ, مۇنداي ارەكەتتەردى حالىقارالىق قۇقىقتىڭ ورەسكەل بۇزىلۋى دەپ اتادى.
يرانداعى ەكونوميكالىق نارازىلىقتار بىرنەشە كۇننەن بەرى جالعاسىپ كەلەدى. ولار ەڭ الدىمەن ۇلتتىق ۆاليۋتانىڭ كۇرت قۇنسىزدانۋى مەن باعانىڭ وسۋىنە بايلانىستى تۋىنداعان. ەل بيلىگى ديالوگقا دايىن ەكەنىن مالىمدەگەنىمەن, سىرتقى قىسىم مەن ىشكى ىستەرگە ارالاسۋدىڭ جول بەرىلمەيتىنىن قاتاڭ ەسكەرتىپ وتىر.