جىلاننان – جىلقىعا

ءبىر كۇن, ءبىر اپتا, ءبىر اي ەمەس, ءبىر جىلمەن قوش ايتىسىپ, جاڭا اسپانعا جاۋتاڭ-جاۋتاڭ قارايدى. «اسپان بولعان سوڭ, اشىعى جاقسى» دەيتىن ورالحان بوكەي. اللاعا شۇكىر, الاش بالاسىنىڭ اسپانى اشىق, ەل امان, جۇرت ەسەندە جىلدىڭ جاڭا كۇنتىزبەسىمەن ەسەن كورىستى. «ەسكى جىل ەسىركەسىن, جاڭا جىل جارىلقاسىن» دەيتىن حالقىمىز بۇل جىلى دا ءار قيىنعا قارمانارى ءسوزسىز. بەيبىت ەلدىڭ بەرەكەسى ءۇشىن جىل تۇگىلى اي تۋعاندا باتا قىلاتىن ەل بۇرىنعى ادەتىنەن جازباسا, المايتىن اسۋ جوق.

باسقا باسقا, قازاق بالا­سىنىڭ وتكەن جىلعا وكپەسى جوق شىعار. قايتا ەلدىڭ ىشكى, سىرتقى جاعدايى بۇرىن­عىسىنان گورى رەتتەلىپ, جاھان­دىق دامۋ تەتىكتەرىن دەر كەزىن­دە قولعا الىپ جاتقان سياقتى­مىز. جا­ساندى ينتەللەكت جانە تسيفرلىق دامۋ مينيسترلىگى قۇرىلدى. بۇل سا­لا­دا جاستار جاڭالىقتى ۇدەتىپ كەلە­دى. شەتەل­دەگى قازاق عالىمدارى «وتان­داس عالىمدار» فورۋمىندا تۇڭ­­عىش رەت استانادا باس قوستى. ولار قاشاندا مەملەكەتىمىزدىڭ دا­مۋى­نا مۇددەلى ەكەنىن ءبىلدىرىپ, قول­دان كەل­گەنىن ايانبايتىنىن مالىمدەدى.

جالعىز وتانىمىز قازاق­ستان دەيدى جانە قىزمەت ەتۋگە دايى­ن. پرەزيدەنت قاسىم-جومارت توقاەۆ الەمنىڭ الپاۋىت ەلدەرىنىڭ كوشباسشىلارىمەن كەلىسسوزدەر جۇرگىزىپ, حالىقارالىق ارەنادا بەدەلگە يە بولدى. اتاپ ايتقاندا, قىتاي, جاپونيا, رەسەي, اقش جانە ەۋروپالىق وداقپەن «ورتالىق ازيا +» فورماتىندا سامميتتەر وتكىزدى. تاشكەنتتە ورتالىق ازيا مەملەكەتتەرى باسشىلارىنىڭ VII كونسۋلتاتيۆتىك كەزدەسۋىنە قاتىستى. «بارلىق الپاۋىت مەملەكەتتەر قازاقستاننىڭ ماڭىزىن سەزىندى جانە مويىندادى. ەۋروپا ەلدەرى مەن جاپونيا ساياسي جانە ەكونوميكالىق بايلانىستاردى نىعايتۋعا نيەت ءبىلدىردى, – دەپ جازدى رەسەيلىك جۋرناليست لەونيد ملەچين.

ەلدىڭ ەتەگى قىمتالىپ, سىرتى بۇتىن­دەلە تۇسكەنى ءوز الدىنا, ءورىسى كەڭىگەنى وسىندايدا بىلىنەدى. سايكەسىنشە, ىشكى احۋال دا تۇراقتى. ەلدىگىمىزدىڭ ءبىر سيپاتى حاكىم ابايدىڭ 180 جىلدىق مەرەيتويىندا بىلىنگەندەي. ۇلىلار مەكەنى سەمەيگە ءار وبلىس حال-قادەرىنشە ءبىر-ءبىر نىساننان سالىپ بەرۋدى كەمەڭگەردىڭ تويىندا ىرىم ەتىپ, قاداسىن قاعىپ باس­تاپ كەتكەن ايماقتار دا بار. حالىق­ارالىق تۇركسوي ۇيىمى قالاپ, مەملەكەت ۇيعارۋىمەن اقتاۋ ءبىر جىل بويى تۇركى الەمىنىڭ مادەني استاناسى ءرولىن اتقاردى. وندا ءتۇبى ءبىر تۇركى ەلدەرىنىڭ مادەنيەتى مەن ورتاق مۇرالارى قايتا جاڭعىرىپ, كوشپەلىلەر وركەنيەتىنىڭ تۋى جەلبىرەدى دە تۇردى. جىل باسىنان سوڭىنا دەيىن 30-دان استام حالىقارالىق ءىس-شارا جۇزەگە اسىپتى. مۇندا مەملەكەتىمىزدىڭ تۇركى ەلدەرى بىرلىگىن نىعايتۋعا باعىتتالعان تۇراقتى مادەني ساياساتى ايرىقشا ءرول اتقاردى. پرەزيدەنتتىڭ مادەنيەت, عىلىم مەن ءبىلىم, جاستار الماسۋى سالالارىنداعى ناقتى باستامالارعا نەگىزدەلگەن تۇركى ينتەگراتسياسى جونىندەگى ۇستانىمى بۇكىل تۇركى الەمىندە كەڭ قولداۋ تاۋىپ, جوعارى باعالاندى. اقتاۋدا جۇزەگە اسقان تۇركسوي جوبالارى سول باستا­مالاردىڭ ناقتى ناتيجەگە اينالىپ, باۋىرلاس حا­لىقتاردى بۇرىنعىدان دا جاقىنداستىرا تۇسكەنىن كورسەتتى. بۇل تۋرالى تۇركى مەم­لەكەتتەرى ۇيىمى اقسا­قالدار كەڭەسىنىڭ توراعاسى, تۇركيانىڭ كورنەكتى قايراتكەرى بينالي يىلدىرىم سويلەدى:

«قازاقستان – تۇركى الەمىنىڭ تۇراقتى­لىعىن قامتاماسىز ەتىپ تۇرعان تىرەك ەلدەردىڭ ءبىرى عانا ەمەس, ونىڭ قۋاتتى ورتالىعى. تۇركى مەملەكەتتەرى ۇيىمىن­داعى كونسترۋكتيۆتى ءرولى, ەكونوميكالىق ورنىقتىلىعى, باي مادەني مۇراسى جانە تۇراقتى دامۋى قازاقستاندى تۇركى ەلدەرىنىڭ اراسىندا كوشباسشى دەڭگەيگە كوتەرىپ وتىر», دەدى ول ماڭعىستاۋدا وتكەن «اقتاۋ – تۇركى الەمىنىڭ مادەني استاناسى» جىلىنىڭ جابىلۋ سالتاناتىندا. ەل كولەمىندە بۇدان دا باسقا ەلەۋلى وقيعالار ءوتىپ, نيەتىمىز بەن پەيىلىمىز ءبىر ارناعا توعىسقانىن تەرمەلەپ تۇبىنە جەتپەسىمىز انىق. اينالىپ كەل­گەندە, جالعىز-اق تىرەك مىناۋ: «بەتەگە كەتسە, بەل قالار, بەكتەر كەتسە, ەل قالار, بەرەكەڭ كەتسە نەڭ قالار؟» دەگەن بابالار وسيەتى. دەمەك, باستى ولجا – بەرەكەمىزدىڭ قاشپاعانى. جۇگىمىز اۋماي, ءجۇنىمىز جىعىلماي 2026-عا اياق باستىق. اشىق اسپان استىندا جۇرتىمىز تايلى-تۇياعىمەن ازاتتىقتىڭ 35-جىلىن باستاپ جىبەردى. ءارى قاراي ءورىسىمىزدى كەڭەيتەمىز دەسەك, تالاپتىعا ءتاڭىرىنىڭ ءاربىر كۇنى – قۇت-قازىنا.

P.S. قانشاما ىزگى ءۇمىت پەن نۇرلى تىلەك, جارقىن وي مەن جاقسى نيەت كەلگەن جىلدان قايىر كۇتىپ, بەرەكە تىلەيدى. ءار ءۇمىت پەن اق تىلەۋدى ءبىر-ءبىر ۇشقىنعا بالاساق, جاڭا جىلدا تۋعان جۇلدىزدارمەن قوسا جارقىراپ, جەردىڭ بەتىن قانشالىقتى جارىقتاندىرا تۇسەرىن, اتتەڭ ءبىز كورمەيتىن شىعارمىز. بىراق تۇيسىنۋگە بولاتىن قۇبىلىس. قىستى كۇنگى تىمىقتا تولعان ايدىڭ استىن كەزسەڭىز, ءاربىر كوبەلەك قار ءوز الدىنا جارقىراپ ۇشقىن اتارىن كورگەن شىعارسىز. قار ەكەش قاردىڭ ءوزى سويتكەندە, ءسىزدىڭ ىزگىلىك جەردە قالار ما؟ تالاپتىعا قانات بىتىرەتىن ءتاڭىرى بار عوي. ىزگىلىكپەن ەتكەن ارەكەتتىڭ ءتۇبى يگىلىككە اينالماي قويمايدى. جاڭا كۇن مەن ايدان, جىلدان جاقسىلىق كۇتىپ جاسامپازدىق جولىن بەتكە الاتىنى سودان بولسا كەرەك ۇلتىمىزدىڭ.

كەلگەن جىل كەلىستى ءھام جەمىستى بولعاي!