كەلەر جىلدىڭ 1 قاڭتارىنان باستاپ بولگاريا ۇلتتىق ۆاليۋتاسى لەۆتەن باس تارتىپ, ەۋروعا كوشەدى. وسىلايشا ەل ەۋروايماققا قوسىلعان 21-ءشى مەملەكەت بولماق, دەپ جازادى Egemen.kz.
بۇل تۋرالى Reuters حابارلادى. اقپاراتقا سايكەس, بولگاريا ەۋروعا ءوتۋ ءۇشىن قويىلعان بارلىق رەسمي تالاپتى ورىنداعان. اتاپ ايتقاندا, ينفلياتسيا دەڭگەيى, بيۋدجەت تاپشىلىعى, ۇزاق مەرزىمدى قارىز قۇنى جانە ايىرباس باعامىنىڭ تۇراقتىلىعى تالاپقا ساي كەلگەن.
بولگاريانىڭ ەۋروعا كوشۋى بۇل ۆاليۋتانى قولداناتىن ەۋروپالىقتاردىڭ سانىن 350 ملن ادامنان اسىرادى. ياعني, ەۋرو ايماعى تاعى دا كەڭەيەدى.
الايدا ەل ىشىندە بۇل شەشىمدى ءبارى بىردەي قولداپ وتىرعان جوق. بيزنەس وكىلدەرى وزگەرىستى وڭ قابىلداسا, حالىقتىڭ ءبىر بولىگى كۇمانمەن قارايدى. ولاردىڭ پىكىرىنشە, ەۋروپالىق وداق السىرەپ بارادى, ال ەۋروعا كوشۋ قاراپايىم ازاماتتارعا قيىندىق اكەلۋى مۇمكىن.
ساياسي ساراپشىلار دا الاڭداۋشىلىق ءبىلدىرىپ وتىر. ولاردىڭ ايتۋىنشا, ەۋرونى ءتۇسىندىرۋ جۇمىستارى ءالسىز جۇرگىزىلگەن. اسىرەسە شالعاي وڭىرلەردەگى جانە جاسى ۇلكەن ادامدارعا جاڭا ۆاليۋتاعا ۇيرەنۋ قيىن بولۋى مۇمكىن. بۇعان قوسا, تۇراقتى ۇكىمەتتىڭ بولماۋى دا وتپەلى كەزەڭدى كۇردەلەندىرۋى ىقتيمال.
وتكەن جىلدىڭ اقپان ايىنىڭ سوڭىندا بولگاريادا لەۆتى ساقتاپ قالۋ جونىندە رەفەرەندۋم وتكىزۋ ءۇشىن قول جينالعان. بۇل باستامانى «ۆوزروجدەنيە» وپپوزيتسيالىق پارتياسى كوتەرگەن. پارتيا وكىلدەرى بولگارلاردىڭ شامامەن 80%-ى لەۆتىڭ قالعانىن قالايدى, ال ەۋرونىڭ پايداسىن تەك از عانا ەليتا كورەدى دەپ مالىمدەگەن.