كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ كاسىپكەرلىك قىزمەتتى رەتتەۋ ماسەلەلەرىنە بايلانىستى ۆەدومستۆوارالىق كوميسسيانىڭ كەزەكتى وتىرىسىن وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
كوميسسيا جۇمىسىنا پارلامەنت دەپۋتاتتارى, ورتالىق مەملەكەتتىك ورگانداردىڭ, ۇلتتىق بانكتىڭ, ۇلتتىق كاسىپكەرلەر پالاتاسىنىڭ باسشىلارى قاتىستى.
كۇن تارتىبىندە مەملەكەت باسشىسىنىڭ تاپسىرمالارىنا سايكەس رۇقسات بەرۋ قۇجاتتارىن 50 پايىزعا قىسقارتۋ جولىمەن بيزنەس ءۇشىن اكىمشىلىك كەدەرگىلەردى تومەندەتۋ ماسەلەسى تالقىلاندى.
اتاپ ايتقاندا, ساراپشىلىق توپتىڭ ءىىم, مسم, بعم, ۇب جانە باسقا دا مەملەكەتتىك ورگانداردىڭ 134 رۇقسات بەرۋلەرىن قىسقارتۋ جانە قاراپايىمداندىرۋ جونىندەگى ۇسىنىسى قارالىپ, قولداۋ تاپتى. بارلىعى 367 رۇقسات بەرۋلەردى قىسقارتۋ قولداۋعا يە بولدى, بۇل ولاردىڭ جالپى سانىنىڭ 52 پايىزىن قۇرايدى.
وتىرىستى قورىتىندىلاي وتىرىپ باقىتجان ساعىنتاەۆ پرەزيدەنت العا قويعان مىندەتتەردى جۇزەگە اسىرۋدىڭ ماڭىزدىلىعىن اتاپ ءوتتى, سونداي-اق, بىرقاتار ءتيىستى تاپسىرمالار بەردى.