ەقىۇ پارلامەنتتىك اسسامبلەياسىنىڭ ۆەناداعى قىسقى سەسسياسى اياسىندا قازاقستان دەلەگاتسياسىنىڭ باسشىسى يكرام ادىربەكوۆ ەقىۇ پارلامەنتتىك اسسامبلەياسىنىڭ پرەزيدەنتى يلككا كانەرۆامەن كەزدەستى, دەپ حابارلادى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.
كەزدەسۋ بارىسىندا قازاقستان مەن پارلامەنتتىك اسسامبلەيا اراسىنداعى ءوزارا ءىس-قيمىلدىڭ وزەكتى ماسەلەلەرى تالقىلاندى, سونداي-اق, وسى سەسسيانىڭ كۇن تارتىبىندەگى كەيبىر تاقىرىپتار بويىنشا پىكىر الماسىلدى.
تاراپتار ەقىۇ-نىڭ اۋقىمدى قىزمەت كەڭىستىگىندە قاۋىپسىزدىكتى قامتاماسىز ەتۋدەگى ەقىۇ-نىڭ ءرولىن كۇشەيتۋ جونىندەگى پارلامەنتشىلەر اراسىنداعى سىندارلى ۇنقاتىسۋدى جالعاستىرۋ قاجەتتىگىن اتاپ ءوتتى.
سول كۇنى سەناتور ي.ادىربەكوۆ از ۇلتتار ىستەرى جونىندەگى جوعارعى كوميسسار (اۇىجك) استريد تورسپەن دە كەزدەستى. ا.تورس قازاقستاننىڭ ۇلتارالىق قاتىناستار سالاسىنداعى بەلسەندى مەملەكەتتىك ساياساتىن جوعارى باعالادى جانە قازاقستان حالقى اسسامبلەياسىنىڭ 20 جىلدىعى اتالىپ وتەتىن بيىلعى جىلدىڭ ءبىزدىڭ ەلىمىز ءۇشىن اسا ماڭىزدى ەكەنىن اتاپ ءوتتى.
ا.تورس سەناتوردى كەڭسەنىڭ الۋان قاۋىمداستىقتاردى ىقپالداستىرۋ جونىندەگى باعدارلاماسىن ىسكە اسىرۋ بارىسى تۋرالى حاباردار ەتتى. جەتكىنشەك ۇرپاقتى مۋلتيلينگۆيستيكالىق تۇرعىدا تاربيەلەۋدە مەملەكەتتىڭ ماڭىزدى ءرولى تۋرالى دا ايتىلدى.
قازاقستان دەلەگاتسياسىنىڭ باسشىسى اۇىجك قىزمەتىنە, ونىڭ ىشىندە قازاقستانداعى كەڭسەسى جۇزەگە اسىرعان باعدارلامالارىنا جوعارى باعا بەردى. ول ەلدەگى قوعام تۇراقتىلىعىن قولداۋداعى قازاقستان حالقى اسسامبلەياسىنىڭ ماڭىزدى رولىنە توقتالدى. سونداي-اق, از ۇلتتاردى قولداۋ جونىندەگى ساياساتتى نىعايتۋدا پارلامەنتارالىق ديپلوماتيانى دامىتۋعا بەلسەندى قاتىسۋعا ازىرلىگىن ءبىلدىردى.
قازاقستاندىق دەلەگاتسيانىڭ باسشىسى ي.ادىربەكوۆ اتوم ەنەرگياسى جونىندەگى حالىقارالىق اگەنتتىكتە (اەحا) كەزدەسۋ وتكىزدى. كەزدەسۋگە اەحا تاراپىنان ۇيلەستىرۋ جونىندەگى باس ديرەكتور كەڭسەسىنىڭ باسشىسى ك.فەرۋتو, زاڭ كەڭسەسىنىڭ باسشىسى پ.دجونسون, جوبانىڭ اتقارۋشى ديرەكتورى ت.ۆۋد قاتىستى.
جۇزدەسۋ بارىسىندا ەكىجاقتى ىنتىماقتاستىقتىڭ اۋقىمدى ماسەلەلەرى تالقىلاندى. اگەنتتىك باسشىلىعى بەيبىت اتوم ەنەرگياسىن دامىتۋ بويىنشا قازاقستان اەحا-نىڭ ماڭىزدى ارىپتەسى ەكەنىن اتاپ ءوتتى. يادرولىق قارۋسىزدانۋ مەن ونى تاراتپاۋدىڭ جاھاندىق ۇدەرىستەرىنە, ونىڭ ىشىندە سەمەي يادرولىق پوليگونىن جابۋعا, ورتالىق ازيادا يادرولىق قارۋدان ازات ايماق قۇرۋعا, يادرولىق سىناقتارعا قارسى حالىقارالىق ءىس-قيمىلدىڭ كۇنىن جاريالاۋدا جانە باسقا دا شارالارعا قازاقستاننىڭ ۇلەسىن اەحا جاقسى بىلەدى. اەحا ءۇشىن باسىمدىققا يە جانە ەرەكشە ءمانى بار تومەن دەڭگەيدە بايىتىلعان ۋران بانكىن جاساۋ جونىندەگى جوبانى ىسكە اسىرۋ بارىسى تۋرالى قازاقستان پارلامەنتىنىڭ دەپۋتاتتارى حاباردار ەتىلدى