«استانا» فۋتبول كلۋبىنا ينۆەستور تابىلعانى بەلگىلى بولدى. بۇل تۋرالى ۇكىمەت وتىرىسىنىڭ قورىتىندىسى بويىنشا وتكەن ءباسپاسوز ءماسليحاتىندا تۋريزم جانە سپورت ءمينيسترى ەربول مىرزابوسىنوۆ مالىمدەدى, دەپ حابارلايدى Egemen.kz.
«استانا» – بەلگىلى ءبىر تاريحى بار, ەلىمىزدىڭ بەدەلىن حالىقارالىق دەڭگەيدە تانىتقان كلۋب. ول بۇعان دەيىن بيىكتەردى باعىندىرىپ, ۇنەمى «سپورت قورى» بىرىڭعاي وپەراتورى ارقىلى قارجىلاندىرىلىپ كەلدى. بيىل ءبىز بۇل كلۋبتى كوممەرتسيالاندىرۋدى جوسپارلاپ وتىرمىز. كلۋبتىڭ تاريحى مەن حالىقارالىق مويىندالۋى بار ەكەنىن ەسكەرسەك, ينۆەستور تابۋ ماسەلەسىندە قيىندىق بولمايدى دەپ ويلايمىن. قازىرگى ۋاقىتتا بۇل ماسەلە پىسىقتالىپ جاتىر. جاڭا جىلدان كەيىن قاي ينۆەستور كلۋبتى ساتىپ الاتىنى جونىندە ناقتىراق اقپارات بەرەمىز», دەدى مينيستر.
ەربول مىرزابوسىنوۆ ينۆەستورلار بار ەكەنىن, الايدا راسىمدەر تولىق اياقتالعانعا دەيىن ولاردىڭ اتىن اتاي المايتىنىن ايتتى.
«ينۆەستور بار. سونداي-اق سىزدەر بىلەتىندەي, بەس كلۋب كوممەرتسيالاندىرىلدى. تاعى بەس كلۋب بويىنشا بەلسەندى جۇمىس جۇرگىزىلىپ جاتىر. قالعان جەتى كلۋبقا قاتىستى ولاردى قامتاماسىز ەتە الاتىن ينۆەستورلاردى ىزدەۋ جالعاسۋدا», دەپ ءتۇسىندىردى ول.
«استانا» كلۋبىن جەكەشەلەندىرۋمەن قاي مەملەكەتتىك ورگان اينالىسىپ جاتقانى جونىندەگى سۇراققا مينيستر بۇل جۇمىستىڭ فەدەراتسيامەن بىرلەسىپ اتقارىلىپ جاتقانىن اتاپ ءوتتى.
ء«بىز بۇل جۇمىستى فۋتبول فەدەراتسياسىمەن, تۋريزم جانە سپورت مينيسترلىگىمەن جانە «سپورت قورى» ۇيىمىمەن بىرلەسىپ جۇرگىزىپ كەلەمىز. استانا قالاسىنىڭ اكىمدىگىنىڭ بۇل ىسكە قاتىسى جوق, سەبەبى ەلوردادا «جەڭىس» كلۋبى قازىردىڭ وزىندە جەكەشەلەندىرىلگەن», دەدى مينيستر.
ەسكە سالا كەتەيىك, بۇعان دەيىن «شاحتەر» فۋتبول كلۋبىن تيمۋر تۋرلوۆ ساتىپ العانى بەلگىلى بولدى. ال ەلوردالىق «جەڭىس» فۋتبول كلۋبىنىڭ يەسى ميحايل لومتادزە اتاندى. پەتروپاۆل قالاسىنىڭ «قىزىلجار» فۋتبول كلۋبىنا كاسىپكەر سەرگەي كان ينۆەستور بولعانى بەلگىلى بولدى. قىزىلوردا وبلىسىنىڭ «قايسار» فۋتبول كلۋبى TAU Group LTD كومپانياسىنىڭ باسشىسى يسلامعالي كوزباكوۆتىڭ جەكەمەنشىك باسقارۋىنا رەسمي تۇردە بەرىلدى.