وتاندىق تاۋار وندىرۋشىلەردىڭ بىرىڭعاي ءتىزىلىمىن ىسكە قوسۋ بويىنشا اۋقىمدى جۇمىس جالعاسىپ جاتىر. بۇل − وتاندىق كاسىپورىنداردى قولداۋعا, ناقتى ءوندىرىستى دامىتۋعا جانە ىشكى نارىقتا اشىق ءارى ءادىل ەرەجەلەر قالىپتاستىرۋعا باعىتتالعان ماڭىزدى قۇرال, دەپ حابارلايدى Egemen.kz.
وسى تىزىلىمگە ەنگىزىلگەن كاسىپورىنداردىڭ ءبىرى — «وسكەمەن ارماتۋرا زاۋىتى» اق. بۇل — ەلدەگى قۇبىر ارماتۋراسىن شىعاراتىن ەڭ ءىرى ءارى تاجىريبەلى زاۋىتتاردىڭ ءبىرى.
«بىرىڭعاي ءتىزىلىم — بۇل جاي عانا تسيفرلىق بازا ەمەس. بۇل — ونەركاسىپكە دەگەن جاڭا كوزقاراس. اشىق, ءادىل جانە ناقتى ءوندىرىستى قولدايتىن جۇيە. تىزىلىمگە ەنۋ ءبىز ءۇشىن مەملەكەتتىڭ سەنىمى مەن ەڭبەگىمىزگە بەرىلگەن باعا», دەيدى زاۋىت باسشىلىعى.
كاسىپورىن وكىلدەرىنىڭ ايتۋىنشا, ءتىزىلىم ءىرى ينفراقۇرىلىمدىق جوبالار ىسكە اسىرىلىپ جاتقان كەزەڭدە ەرەكشە ماڭىزدى. سەبەبى مۇنداي جوبالاردا جابدىقتاردىڭ ساپاسى, سەنىمدىلىگى جانە شىعۋ تەگى ناقتى راستالعان بولۋى قاجەت.
«مۇندا باستىسى بىرەۋمەن كۇرەسۋ ەمەس, بارشاعا ورتاق, تۇسىنىكتى ەرەجەلەر قالىپتاستىرۋ. ءونىمنىڭ شىعۋ تەگى انىق بولعاندا, تاپسىرىس بەرۋشى ءۇشىن دە, ءوندىرۋشى ءۇشىن دە سەنىم ارتادى, ال نارىق تۇراقتى بولادى», دەپ اتاپ ءوتتى كومپانيادا.
2026 جىلدان باستاپ بىرىڭعاي تىزىلىمگە تولىق كوشۋ كاسىپكەرلەردىڭ پىكىرىنشە, ءونىمنىڭ وتاندىق ەكەندىگىن اشىق راستاۋعا, ادال وندىرۋشىلەردى قورعاۋعا جانە تەڭ باسەكەلەستىك ورتا قالىپتاستىرۋعا مۇمكىندىك بەرەدى.