جۋىردا ەلىمىزدىڭ شاحمات فەدەراتسياسى باسشىلىعى ارنايى جيىن وتكىزدى. وندا جالپى فەدەراتسيانىڭ قىزمەتى جانە اعىمداعى جىلعى جوسپارلارى قارالدى.
وسىدان ءبىراز بۇرىن «ۇنەمدەۋ جاعدايىنا وراي فەدەراتسيا قىزمەتىن توقتاتادى-مىس» دەگەن سىڭايلى ءتۇرلى اڭگىمە ەستىلگەن بولاتىن. سەبەبى, بۇعان دەيىن ۇنەم رەجىمىنە كوشۋ, باسى ارتىق شىعىندى ازايتۋ جانە شەتەلدەردەگى جارىستارعا شىعۋ سانىن ازايتۋ جونىندە ماسەلە تالقىلانعان. بىراق بۇل فەدەراتسيا جۇمىسى توقتايدى دەگەن ءسوز ەمەس. وسىعان وراي جۇرتشىلىققا تەرىس اقپارات بەرىپ, دۇرلىكتىرىپ قويعان قشف اتقارۋشى ديرەكتسياسىنىڭ باسشىلىعىنا ەسكەرتۋ جاسالدى. جيىندا سونداي-اق, فەدەراتسيا ءوز قىزمەتىن ۋاقىتشا دا توقتاتىپ كورمەگەنى جانە توقتاتپايتىندىعى ايتىلدى.
وتكەن جىلى قازاقستاندىق شاحماتشىلار فرانتسيا, برازيليا, گرەكيا, نورۆەگيا, تۇركيا, رەسەي, يران, ءوزبەكستان جانە ءباا سياقتى ەلدەردە وتكەن 20 تۋرنيرلەرگە قاتىسقان بولاتىن. 2014 جىل فەدەراتسيا ءۇشىن اسا ءساتتى بولدى. قازاقستاننىڭ ايەلدەر قۇراماسى بۇكىل دۇنيەجۇزىلىك شاحمات وليمپياداسىندا 6 ورىنعا يە بولدى بۇل ازىرگە قۇراما كوماندانىڭ ەڭ ءتاۋىر ناتيجەسى. مۇنىڭ سىرتىندا, ەرلەر قۇراماسى ورتالىق ازيا كۋبوگىنداعى راپيدتە جەڭىسكە جەتتى, ال دينارا سادۋاقاسوۆا 18 جاسقا دەيىنگى بەدەلدى كاتەگوريادا الەم چەمپيونى بولدى. ال بيىلعى جىلى ءبىزدىڭ شاحماتشىلارىمىزدىڭ تايلاند, گرەكيا, رەسەي, ءوزبەكستان, قىتاي جانە يتاليادا وتەتىن حالىقارالىق دەڭگەيدەگى 8 تۋرنيرگە قاتىسۋى جوسپارلانىپ وتىر. دەگەنمەن, شاحماتشىلارىمىزدىڭ حالىقارالىق جارىستارعا ساپارعا شىعۋى قىسقارعانمەن, ەل ىشىندەگى تۋرنيرلەر سانى وزگەرمەيدى. مادەنيەت جانە سپورت مينيسترلىگى تاراپىنان رەسپۋبليكادا تۋرنيرلەر وتكىزۋدى ۇيىمداستىرۋ ءۇشىن جانە سپورتشىلاردىڭ 2015 جىلى وتكىزىلەتىن ءبىرقاتار حالىقارالىق جارىستارىنا ىسساپارعا جىبەرۋ ماقساتىندا جالپى سوماسى 20 ملن. تەڭگە قاراجات ءبولۋ جوسپارلانعان. فەدەراتسيانىڭ بەلسەندى جۇمىس جاساۋى مەن قازاقستان شاحماتشىلارىن ەل ىشىندەگى جانە شەتەلدەردەگى تۋرنيرلەرگە قاتىستىرۋ ءۇشىن قوسىمشا قارجى قاجەت بولادى. سوندىقتان قازىرگى ۋاقىتتا دەمەۋشىلەرمەن جۇمىس ءجۇرگىزىلۋدە. فەدەراتسيا كەڭ كولەمدە جۇمىس اتقاراتىن بولادى جانە 2015 جىلعا جوسپارلانعان بارلىق شارالار بەكىتىلگەن جوسپارعا سايكەس وتكىزىلەتىن بولادى.
«ەگەمەن-اقپارات».