ورال قالاسىندا سوت مۇگەدەكتىگى بار ورتاق بالانى تاربيەلەپ وتىرعان بۇرىنعى جۇبايىنا قوسىمشا اليمەنت ءوندىرۋ تۋرالى تالاپتى ءىشىنارا قاناعاتتاندىردى. بالالاردىڭ اكەسى بەس جىل بويى اليمەنت تولەمەي, شامامەن 9 ملن تەڭگە قارىز بولعان, دەپ حابارلايدى Egemen.kz.
ورالدا ەرلى-زايىپتىلار رەسمي نەكەدە تۇرعان جانە ءۇش كامەلەتكە تولماعان بالاسى بار. قازىرگى ۋاقىتتا بالالار اناسىنىڭ تاربيەسىندە. نەكە بۇزىلعاننان كەيىن سوت شەشىمىمەن بالالارىن اسىراۋ ءۇشىن اكەسىنەن بارلىق تابىسىنىڭ 1/2 بولىگى مولشەرىندە اليمەنت وندىرىلگەن.
وتباسىنىڭ 14 جاستاعى قىزى 2018 جىلدان باستاپ 2027 جىلعا دەيىن دەنساۋلىق مۇمكىندىگى شەكتەۋلى بالا رەتىندە تىركەۋدە تۇر. ول نەۆروپاتولوگ پەن ورتوپەدتىڭ ديسپانسەرلىك ەسەبىندە, دياگنوزى – تسەرەبرالدى سال اۋرۋى (دتسپ), جامباس سۇيەگىنىڭ ەكىجاقتى سپاستيكالىق شىعۋى جانە تىزە بۋىندارىنىڭ بۇگىلۋ كونتراكتۋراسى. قوزعالىس مۇمكىندىگىنىڭ شەكتەلۋىنە بايلانىستى اناسى بالاسىنا تۇراقتى كۇتىم جاساپ, ەمدەۋ شىعىندارىن كوتەرىپ كەلەدى.
اكەسى كۇزەتشى بولىپ جۇمىس ىستەگەنىنە قاراماستان, بەس جىل ىشىندە اليمەنت بويىنشا قارىزى شامامەن 9 ملن تەڭگەگە جەتكەن. ول قارىزدىڭ پايدا بولۋىن بۇرىنعى جۇبايىنىڭ بالالارمەن ارالاسۋىنا كەدەرگى كەلتىرۋىمەن جانە دەنساۋلىعىنا بايلانىستى جۇمىس ىستەي الماعانىمەن تۇسىندىرگەن. الايدا سوت بۇل ۋاجدەردى نەگىزسىز دەپ تانىدى.
سوتتا ونىڭ ەڭبەككە جارامسىزدىعىن راستايتىن دالەلدەر ۇسىنىلماعانى, مۇگەدەكتىگى جوق ەكەنى جانە تۇراقتى تابىس تابۋعا قابىلەتتى ەكەنى انىقتالدى. بۇل ونىڭ تەك بالالارعا عانا ەمەس, سونداي-اق مۇگەدەكتىگى بار بالاعا كۇتىم جاساپ وتىرعان بۇرىنعى جۇبايىنا دا اليمەنت تولەۋ مۇمكىندىگىن كورسەتەدى.
بارلىق ءمان-جايدى, كامەلەتكە تولماعان بالانىڭ اۋىر دەنساۋلىق جاعدايىن ەرەكشە جاعداي رەتىندە ەسكەرە وتىرىپ, سوت تالاپتى ءىشىنارا قاناعاتتاندىرۋ تۋرالى شەشىم قابىلدادى. ناتيجەسىندە جاۋاپكەردەن مۇگەدەكتىگى بار ورتاق بالا 18 جاسقا تولعانعا دەيىن وعان كۇتىم جاسايتىن بۇرىنعى جۇبايىنىڭ پايداسىنا اي سايىن 15 اەك مولشەرىندە اليمەنت ءوندىرۋ بەلگىلەندى. تولەم تالاپ ارىز سوتقا بەرىلگەن كۇننەن باستاپ ەسەپتەلەدى.