كوكپەكتى اۋدانىنىڭ اكىمى سايلاندى

21 جەلتوقساندا كوكپەكتى اۋدانىندا وتكەن اۋدان اكىمىن سايلاۋ قورىتىندىسىندا نۇربەك قوشقارباەۆ 70,8 داۋىس جيناپ, جەڭىسكە جەتتى.

وبلىس اكىمى بەرىك ءۋالي بۇگىن ونى اۋدان اكتيۆىنە تانىستىردى.

بيىلدان باستاپ «سايلاۋ تۋرالى» زاڭعا سايكەس وبلىستىق ماڭىزى بار قالا, اۋدان اكىمدەرىن حالىق ءوزى, تىكەلەي داۋىس بەرۋ ارقىلى سايلاي الادى. 2023 جىلى پيلوتتىق رەجيمدە وڭىرىمىزدە كۋرچاتوۆ قالاسى مەن اباي اۋدانىنىڭ اكىمى, بيىل 27 شىلدەدە وبلىسىمىزدا العاشقىلاردىڭ ءبىرى بولىپ جاڭاسەمەي اۋدانىنىڭ اكىمى تىكەلەي داۋىس بەرۋ ارقىلى سايلانعان بولاتىن. 12 قازاندا سەمەي قالاسىنىڭ اكىمى سايلاندى. بۇل – ەلىمىزدىڭ تاريحىندا العاش رەت وتكەن وبلىس ورتالىعى اكىمىنىڭ سايلاۋى.

جيىن بارىسىندا كوكپەكتى اۋدانىنىڭ اۋماقتىق سايلاۋ كوميسسياسىنىڭ توراعاسى ەراسىل ورازحانوۆ نۇربەك قوشقارباەۆقا اكىم كۋالىگىن تاپسىردى.

«نۇربەك تۇرسىنقان ۇلى – مەملەكەتتىك قىزمەتتەگى تاجىريبەسى مول, بىلىكتى باسشى. وسى اۋداننىڭ تۋماسى. كوكپەكتى – حالقى ەڭبەكقور, اۋىل شارۋاشىلىعى سالاسىندا الەۋەتى زور اۋدان. ءوزىنىڭ ەرەكشەلىكتەرى مەن قوردالانىپ قالعان ماسەلەلەرى دە جەتەرلىك. حالقىمىزدا «تۋعان جەرگە تۋىڭدى تىك» دەگەن جاقسى ءسوز بار. ءوز تۋعان جەرىڭە قىزمەت ەتۋ – ۇلكەن سەنىم, زور جاۋاپكەرشىلىك. سوندىقتان نۇربەك تۇرسىنقان ۇلى كوكپەكتى اۋدانىنىڭ الەۋمەتتىك-ەكونوميكالىق دامۋىنا, ينفراقۇرىلىمىنىڭ جاقسارۋى مەن كوركەيۋىنە بارلىق كۇش-جىگەرىڭىزدى سالاسىز دەپ سەنەمىن», دەدى وبلىس اكىمى.

نۇربەك تۇرسىنقان ۇلى كوكپەكتى اۋدانى, كوكپەكتى اۋىلىندا دۇنيەگە كەلگەن. ەڭبەك جولىن سەمەي قالاسىنداعى №33 ورتا مەكتەپتىڭ باستاۋىش سىنىپتارىنداعى ورىس ءتىلى ءپانىنىڭ مۇعالىمى بولىپ باستاعان. ءار جىلدارى سەمەي قالاسىنىڭ ءبىلىم بولىمىندە, سەمەي قالاسى اكىمىنىڭ اپپاراتىندا باس مامان, باس ينسپەكتور, ءبولىم باسشىسى, كۋرچاتوۆ قالاسى اكىمى اپپاراتىنىڭ باسشىسى, قالا اكىمىنىڭ ورىنباسارى قىزمەتتەرىن اتقاردى. 2024 جىلدىڭ 23 جەلتوقسانىنان باستاپ وسى ۋاقىتقا دەيىن اباي وبلىسى بەسقاراعاي اۋدانىنىڭ اكىمى بولىپ قىزمەت اتقاردى.