قورعانىس مينيسترلىگى اسكەرگە شاقىرۋ جانە ازاماتتاردىڭ مەرزىمدى اسكەري قىزمەتى جۇيەسىندە تسيفرلىق شەشىمدەردى ەنگىزۋ ءىسىن بەلسەندى جالعاستىرىپ جاتىر. زاماناۋي شەشىمدەر مەديتسينالىق تەكسەرۋدەن ءوتۋ, ازاماتتاردى اقپاراتتاندىرۋ, شاقىرۋ تىزىمدەرىن قالىپتاستىرۋ جانە قىزمەتتى ۇيىمداستىرۋ سياقتى باعىتتاردى قامتيدى, دەپ جازادى Egemen.kz.
اسكەرگە شاقىرۋ ناۋقانىن تسيفرلاندىرۋ اياسىندا «e-مەدوسموتر» اقپاراتتىق جۇيەسى ىسكە قوسىلدى. جۇيە استانا, شىمكەنت قالالارىندا جانە قاراعاندى وبلىسىنىڭ اباي قالاسىندا پيلوتتىق رەجيمدە ءساتتى قولدانىلدى. سالالىق ۆەدوموستۆو مەن دەنساۋلىق ساقتاۋ مينيسترلىگىنىڭ بىرلەسكەن جوباسى اتالعان پروتسەستى جەدەلدەتىپ, اسكەرگە شاقىرىلاتىن ازاماتتاردىڭ دەرەگىن ناقتى ۋاقىتتا الۋعا مۇمكىندىك بەرەدى.
«e-مەدوسموتر» اقپاراتتىق جۇيەسىندە اسكەرگە شاقىرىلاتىن ازاماتتىڭ تسيفرلىق مەديتسينالىق كارتاسى جاسالىپ, 100-دەن استام مەديتسينالىق پارامەتر بويىنشا اقپارات توپتاستىرىلادى. وندا دارىگەر قورىتىندىلارىن ەنگىزۋگە, قۇجاتتاردى ەلەكتروندىق تسيفرلىق قولتاڭبا (ەتسق) جانە QR-كود ارقىلى بەكىتۋگە, قوسىمشا تەكسەرىلۋلەرگە جولداما بەرۋگە جانە ولاردىڭ ناتيجەلەرىن ەلەكتروندى تۇردە الۋعا بولادى. جۇيە زەرتحانالارمەن, مەديتسينالىق قۇرال-جابدىقتارمەن جانە مەملەكەتتىك اقپاراتتىق رەسۋرستارمەن قامتىلعان. قازىرگى ۋاقىتتا «e-مەدوسموتر» استانا, شىمكەنت قالالارى, جەتىسۋ جانە باتىس قازاقستان وبلىستارىندا ەنگىزىلگەن. اقمولا وبلىسىندا جۇيەنى قوسۋ جۇمىستارى باستالدى.
مينيسترلىك ازاماتتاردى اسكەري قىزمەت وتكەرۋ تارتىبىمەن تانىستىرۋ ماقساتىندا ARMIA.KZ تسيفرلىق سەرۆيسىن ىسكە قوستى. بۇل سەرۆيسكە جاساندى ينتەللەكت ەنگىزىلگەن. ول پايدالانۋشىلاردىڭ سۇراقتارىنا جەدەل جاۋاپ بەرەدى. ARMIA.KZ-كە قورعانىس مينيسترلىگىنىڭ جالپى تسيفرلىق جۇيەسى كىرىكتىرىلگەن.
مەملەكەتتىك كەڭەسشى اسكەري-پاتريوتتىق تاربيە جونىندەگى جۇمىستى كۇشەيتۋدى تاپسىردى
اسكەرگە شاقىرۋ جۇمىسى ءۇشىن «Smart ۆوەنكومات» جۇيەسى دە ەنگىزىلدى. جاساندى ينتەللەكت تەحنولوگياسىنا نەگىزدەلگەن بۇل جۇيە اسكەرگە شاقىرىلاتىن ازاماتتاردىڭ ءتىزىمىن اۆتوماتتى تۇردە جاساپ, مەديتسينالىق تەكسەرۋدەن وتۋگە بايلانىستى حابارلامالار جىبەرەدى. ءتىزىم جاسالعان كەزدە ازاماتتاردىڭ جاسى, انتروپومەتريالىق دەرەكتەرى, دەنساۋلىق جاعدايى, ءبىلىم دەڭگەيى, جۇرگىزۋشى كۋالىگىنىڭ بار-جوعى جانە شاقىرۋدان سوڭ كەيىنگە قالدىرۋ نەمەسە بوساتىلۋ اقپاراتى قامتىلادى.
تسيفرلىق تاسىلدەر مەرزىمدى اسكەري قىزمەت بارىسىندا دا قولدانىلادى. اۋە قورعانىسى كۇشتەرىنىڭ 78460 اسكەري بولىمىندە جۇزەگە اسىرىلىپ جاتقان Sarbaz+ پيلوتتىق جوباسى جاۋىنگەرلىك جانە ارنايى دايىندىقتىڭ جاڭارعان تۇجىرىمداماسىن, زاماناۋي تۇرمىستىق جانە وقۋ ينفراقۇرىلىمىن, اسكەري قىزمەتشىلەردىڭ فيتنەس-براسلەتتەر ارقىلى مەديتسينالىق مونيتورينگىن جانە قىزمەت كەزىندە IT, تەلەكوممۋنيكاتسيا جانە درونداردى باسقارۋ سالاسىنداعى ازاماتتىق ماماندىقتاردى الۋ مۇمكىندىگىن قامتيدى.