استانا قالاسىنىڭ دەنە شىنىقتىرۋ جانە سپورت باسقارماسى جىلدىڭ ۇزدىكتەرىن ماراپاتتادى. بەيبىتشىلىك جانە كەلىسىم سارايىندا وتكەن سالتاناتتى ءىس-شارادا 2025 جىلعى سپورت سالاسىنداعى نەگىزگى باعىتتاردى قامتيتىن 14 نوميناتسيا بويىنشا «Namys» سپورت سىيلىعى تابىستالدى, دەپ حابارلايدى Egemen.kz.
شارانىڭ قۇرمەتتى قوناقتارى قاتارىندا قازاقستان ۇلتتىق وليمپيادالىق كوميتەتىنىڭ باس حاتشىسى ءالىمجان اقاەۆ, تۋريزم جانە سپورت ءمينيسترىنىڭ ورىنباسارى سەرىك جاراسباەۆ, استانا قالاسى اكىمىنىڭ ورىنباسارى ەرىك مەيىرحان بولدى.
«ەلوردادا تۇراقتى تۇردە سپورتپەن اينالىساتىن تۇرعىنداردىڭ ۇلەسى 42%-عا جەتتى. تەك 2025 جىلدىڭ وزىندە جەكە دەمەۋشىلەردىڭ ەسەبىنەن Sana Sport, QazSwimAcademy, Kodokan Spirit, Alpha Gym, بەكزات ساتتارحانوۆ اتىنداعى سپورت كەشەنى جانە Ozen Fitness سپورت اكادەمياسى پايدالانۋعا بەرىلدى. بۇقارالىق سپورتتى دامىتۋ ماقساتىندا «Aulafit», «Funny Sport» جوبالارى جۇزەگە اسىرىلۋدا. ال كاسىبي سپورتتا ەلوردالىق سپورتشىلار 1400-دەن استام جارىسقا قاتىسىپ, 5 مىڭعا جۋىق مەدال جەڭىپ الدى. سونىمەن قاتار, سپورتشىلارىمىز 2026 جىلى ميلان قالاسىندا وتەتىن قىسقى وليمپيادا ويىندارىنىڭ ليتسەنزياسىن جەڭىپ الىپ, قارقىندى دايىندالىپ جاتىر. ۇلتتىق سپورت باعىتىنا دا ءمان بەرىلىپ, 2026 جىلى جاڭا سپورت مەكتەبىن اشۋ جوسپارلانىپ وتىر», دەدى استانا قالاسى اكىمىنىڭ ورىنباسارى ەرىك مەيىرحان.
كەش بارىسىندا ەسترادا انشىلەرى ونەر كورسەتىپ, مەرەكەلىك كوڭىل كۇي سىيلادى. جىلدىڭ ۇزدىك سپورتشىسى اتاعى ەكى دۇركىن الەم چەمپيونى بوكسشى سانجار تاشكەنبايعا بۇيىردى. جىلدىڭ ۇزدىك جاتتىقتىرۋشىسى نوميناتسياسى مەرۋەرت بالعىنباەۆاعا بەرىلدى. ول بيىل جاسوسپىرىمدەر اراسىندا تۇڭعىش الەم چەمپيونىن جانە توپتىق جاتتىعۋدان ازيا چەمپيونىن دايارلادى. جىل سەرپىنى ماراپاتى اقمارال ەرەكەشەۆاعا بۇيىردى. ماۋسىم ايىندا جاسوسپىرىمدەر اراسىندا ۇيىمداستىرىلعان بولگارياداعى الەم چەمپيوناتىندا اقمارال ەرەكەشەۆا تاريحي التىن مەدالدى جەڭىپ الدى. جىل سەرپىنى (پارا سپورتشى) اتانعان ءالي تۇرعانبەكوۆ تە بيىلعى جىلدى تابىستى اياقتادى. جەلتوقسان ايىندا بىرىككەن اراب امىرلىگىندە وتكەن جاسوسپىرىمدەر اراسىنداعى V ازيا پارا ويىندارىندا جۇزۋدەن سىنعا ءتۇسىپ, 1 التىن, 3 كۇمىس مەدالدى ولجالادى. ۇزدىك پارا سپورتشى اتاعىنا نيكيتا ەرماكوۆ لايىق دەپ تانىلدى. قىركۇيەك ايىندا پارا ارمرەستلينگتەن وتكەن الەم چەمپيوناتىندا توپ جاردى. سونداي-اق پارا نىسانا كوزدەۋدەن قازان ايىندا بىرىككەن اراب امىرلىگىندە وتكەن الەم كۋبوگىندە قولا مەدالدى ەنشىلەدى. پاراليمپيادالىق سپورتتىڭ ۇزدىك جاتتىقتىرۋشىسى اتالىمىندا جەڭىمپاز بولعان ميحايل بۋرچالين پارا سپورتشى نيكيتا ەرماكوۆ پەن پاريج پاراليمپياداسىنىڭ قاتىسۋشىسى سەۆدا اليەۆانى جاتتىقتىرادى. پارا نىسانا كوزدەۋدەن استانا قالاسىنىڭ دامۋىنا ۇلەس قوسىپ ءجۇر.
ۇلتتىق سپورت تۇرلەرىنەن ۇزدىك جاتتىقتىرۋشى اتاعىن العان نۇرجان قونارباەۆ 2025 جىلى توعىزقۇمالاقتان ازيا چەمپيونى مەن الەم كۋبوگىنىڭ جەڭىمپازدارىن باپتادى. ونىڭ جەتەكشىلىگىمەن 10 قازاقستان رەسپۋبليكاسىنىڭ سپورت شەبەرى جانە حالىقارالىق دارەجەدەگى 4 سپورت شەبەرى دايارلاندى. ۇلتتىق سپورت تۇرلەرىنەن ۇزدىك سپورتشى اتالىمىندا ۇزدىك شىققان ساعىندىق ءاشىم قازاق كۇرەسىنەن حالىقارالىق دارەجەدەگى سپورت شەبەرى. 2025 جىلى اسكەري قىزمەتشىلەر اراسىنداعى الەم چەمپيونى, الەم كۋبوگىنىڭ جەڭىمپازى.
بالالار مەن جاسوسپىرىمدەردىڭ شايبالى حوككەيدەن №10 مامانداندىرىلعان سپورت مەكتەبىنىڭ حوككەي كومانداسى جىلدىڭ ۇزدىك كومانداسى دەپ تانىلدى. شايبالى حوككەيدەن Jastar hokei lygasy-نىڭ 2024/2025 جىلعى ماۋسىمىندا «استانا» كلۋبى توپ جاردى. ۇزدىك سپورتتىق نىسان – «Ozen Fitness» كەشەنىندە سۋ سپورتى تۇرلەرىنەن قازاقستانداعى ءبىرىنشى سپورت اكادەمياسى. قازىرگى ساتتە 850 بالا جاتتىعادى. وسى سپورت كەشەنىندە ۇلتتىق جانە جاستار قۇراماسىنىڭ مۇشەلەرى ازىرلىك جۇرگىزەدى. ۇزدىك قالالىق سپورت فەدەراتسياسى اتالىمىندا گيمناستيكا تۇرلەرى بويىنشا استانا قالاسىنىڭ فەدەراتسياسى تانىلدى.
2025 جىلى سپورتتىق, كوركەم جانە باتۋتتىق گيمناستيكادان ەل ىشىندە جانە حالىقارالىق جارىستاردا كوپتەگەن مەدالداردى جەڭىپ الدى. ۇلتتىق قۇرامانىڭ كوپتەگەن سپورتشىلارى وسى جەردە جاتتىعادى. جىلدىڭ ۇزدىك سپورتتىق ۇيىمى نوميناتسياسى استانا قالاسى اكىمدىگىنىڭ مۇمكىندىگى شەكتەۋلى تۇلعالارعا ارنالعان «ەلوردا» سپورت كلۋبىنا بۇيىردى. اتالعان سپورت كلۋبى بۇگىنگى تاڭدا ءتورت باعىت بويىنشا جۇيەلى ءارى ناتيجەلى جۇمىس جۇرگىزىپ كەلەدى. كلۋب قۇرامىندا تىرەك-قيمىل اپپاراتى زاقىمدالعان, ەستۋ جانە كورۋ قابىلەتى تومەن, سونداي-اق زياتكەرلىك دامۋ ەرەكشەلىكتەرى بار سپورتشىلار بار. 2025 جىلى رەسپۋبليكالىق جانە حالىقارالىق جارىستاردا 587 مەدال جەڭىپ الدى. سونداي-اق قازاقستان رەسپۋبليكاسىنىڭ 7-ءنشى پارا سپارتاكياداسىندا 17 سپورت تۇرىنەن جالپى كوماندالىق ەسەپتە 1-ورىن يەلەندى. ۇزدىك سپورتتىق تەلەارنا – «QAZSPORT» تەلارناسى, ۇزدىك سپورتتىق پورتال – Elordainfo.kz اقپاراتتىق پورتالىنا بەرىلدى.
جەڭىمپازدار ارنايى ەستەلىك سىيلىقتارى مەن ماقتاۋ قاعازىنا يە بولدى.