الماتىدا ەنەرگەتيكالىق سۋسىننان جۇرەك اۋرۋىنا شالدىققان ناۋقاسقا وتا جاسالدى

دونور ايەل كىسى

وتا قكو-نىڭ مۋلتيديستسيپلينارلىق كومانداسى مەن University Medical Center (استانا) ماماندارىنىڭ بىرلەسۋىمەن جاسالدى. وپەراتسياعا قكو ديرەكتورى ەرماعامبەت قۋاتباەۆ پەن UMC كورپوراتيۆتىك قورى باسقارما توراعاسى, پروفەسسور يۋري پيا جەتەكشىلىك ەتتى. UMC كومانداسى ارىپتەستەرىنە قولداۋ كورسەتۋ ءۇشىن الماتىعا جەدەل جەتكەن.

دونور – ارتەريالىق گيپەرتەنزيانىڭ اۋىر تۇرىمەن اۋىرعان, ينسۋلت العان 50 جاستاعى ايەل بولدى. ول الماتى قالالىق ورتالىق كلينيكالىق اۋرۋحاناسىنا شۇعىل جەتكىزىلگەن. دارىگەرلەر كونسيليۋمى مي ءولىمىن انىقتاپ, قايتىس بولعاننان كەيىنگى دونورلىققا مۇمكىندىك بار ەكەنىن راستاعان. تۋىستارى كەلىسىم بەرگەن سوڭ دونورلىق پروتسەسس ۇيىمداستىرىلعان.

بارلىق جاعداي جاسالعان

قالالىق كارديولوگيالىق ورتالىقتا جوعارى تەحنولوگيالىق وتالاردى جۇرگىزۋگە بارلىق جاعداي جاسالعانى تۋرالى دەنساۋلىق ساقتاۋ مينيسترلىگىندە اتالىپ ءوتتى. مۇندا بىلىكتى كارديولوگتار, كارديوحيرۋرگتەر, انەستەزيولوگ-رەانيماتولوگتار, پەرفۋزيولوگتار مەن وتا داساۋعا سەپتەسەتىن مەيىربيكەلەر جۇمىس ىستەيدى. زاماناۋي دياگنوستيكالىق جانە ەمدەۋ ادىستەرى ەنگىزىلگەن, حالىقارالىق ستاندارتتارعا ساي جابدىقتار قولدانىلادى.

ناۋقاستىڭ ۇندەۋى

«ادامدارعا ۇندەۋ جاساعىم كەلەدى: ەنەرگەتيكالىق سۋسىن ىشپەڭىزدەر. مەنىڭ اۋرۋىم ءدال سولاردان باستالدى. الدىمەن كۇنىنە 1 بوتەلكە ىشەتىنمىن, كەيىن كۇنىنە 8-10 ەنەرگەتيككە دەيىن جەتتى. بۇعان ءمان بەرمەدىم, اۋىر دياگنوز قويىلعانعا دەيىن. بۇگىن دارىگەرلەردىڭ ارقاسىندا ءتىرىمىن. ەندى دەنساۋلىققا قانشالىقتى مۇقيات قاراۋ كەرەك ەكەنىن ءتۇسىندىم», دەدى ناۋقاس.

اۋرۋحانادان شىققاننان كەيىن ناۋقاس تۇرعىلىقتى جەرى بويىنشا ەمحاناعا تىركەلىپ, ديناميكالىق باقىلاۋدا بولادى. جۇرەك ترانسپلانتاتسياسىن قوسا العاندا, ستاتسيونارلىق ەم, شىعارىلعاننان كەيىن قاجەتتى ءدارى-دارمەكپەن قامتاماسىز ەتۋ, ءارى قارايعى وڭالتۋ مەن باقىلاۋ مەملەكەت ەسەبىنەن, تەگىن مەديتسينالىق قىزمەتتەردىڭ كەپىلدىك بەرىلگەن كولەمى (تمككك) شەڭبەرىندە كورسەتىلەدى.