مەملەكەت باسشىسى Oxford Economics 2025 رەيتينگىندە استانا ازيا قۇرلىعىندا 36-ورىن العانىنا نازار اۋداردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«جان باسىنا شاققانداعى وڭىرلىك جالپى ءونىم كورسەتكىشى كوڭىل كونشىتەرلىك. Oxford Economics 2025 يندەكسىنە توقتالايىن. بۇل زەرتتەۋلەر الەمنىڭ ەڭ ءىرى مىڭ قالاسىن ەكونوميكا, ادام كاپيتالى, تۇرمىس ساپاسى, قورشاعان ورتا جانە باسقارۋ ساناتتارى بويىنشا باعالايدى. استانا ازيا قۇرلىعىندا 36-ورىنعا جايعاسسا, الەم بويىنشا 276-ورىنعا تۇراقتاپ, وڭىرىمىزدەگى بارىمىزگە بەلگىلى قالالاردىڭ الدىنا شىقتى.
بىراق بۇعان توقمەيىلسۋگە بولمايدى. ويتكەنى الەۋەتىمىز زور. ءبىز ۇنەمى العا جىلجۋىمىز كەرەك. سوندىقتان ءدال وسى يندەكس بويىنشا كەلەسى جىلى استانانىڭ ءوز رەيتينگىسىن جاقسارتۋعا مۇمكىندىگى بار دەپ ەسەپتەيمىن. سونىڭ ارقاسىندا ءبىزدىڭ ازياداعى رەيتينگىمىز دە ارتادى. بۇل ءبىزدىڭ قولىمىزدان كەلەدى دەپ ويلايمىن», دەدى پرەزيدەنت.
مەملەكەت باسشىسىنىڭ ايتۋىنشا, استانا باسقا ايماقتارعا ۇلگى بولۋعا ءتيىس.
«شاھاردىڭ ەكونوميكالىق بەلسەندىلىگى كۇشەيىپ كەلەدى. بۇل – جاقسى ءۇردىس. سوعان سايكەس اكىمدىككە جانە مۇددەلى مەملەكەتتىك ورگاندارعا جاڭا مىندەتتەر جۇكتەلەدى», دەدى قاسىم-جومارت توقاەۆ.