ۇلىتاۋ وبلىسىندا بۇقارالىق سپورتتى دامىتۋعا ەلەۋلى ۇلەس قوسىپ جۇرگەن سالا ماماندارى مەن سپورتشىلاردىڭ ەڭبەگى ەلەندى. سالتاناتتى ءىس-شارادا ءوڭىردىڭ سپورت سالاسىنداعى جىل ۇزدىكتەرى ماراپاتتالدى, دەپ حابارلايدى Egemen.kz.
ۇلىتاۋ وبلىسىندا بۇقارالىق سپورتتى دامىتۋعا كوڭىل ءبولىنىپ كەلەدى. جىل باسىندا جەزقازعاندا 320 ورىندىق «جىگەر» سپورت كەشەنى مەن شاحمات اكادەمياسى پايدالانۋعا بەرىلدى. قاراجال قالاسىندا جابىق ءجۇزۋ باسسەينى ىسكە قوسىلدى. ساتباەۆ قالاسىندا انگار ۇلگىسىندەگى سپورت كەشەنى اشىلدى. قاراجال قالاسىنداعى «گورنياك» ستاديونىنا كۇردەلى جوندەۋ جۇرگىزىلىپ, ءتورت بالالار مەن جاسوسپىرىمدەر سپورت مەكتەبى جاڭعىرتۋدان ءوتتى.
سالتاناتتى شارادا ۇلىتاۋ وبلىسىنىڭ اكىمى داستان رىسپەكوۆ سالا قىزمەتكەرلەرى مەن جاتتىقتىرۋشىلاردى كاسىبي جەتىستىكتەرىمەن قۇتتىقتاپ, سپورتشىلاردىڭ جەڭىستى جەتىستىگىنە توقتالدى.
بوكستان الەم كۋبوگىنىڭ جۇلدەگەرى ايدانا زابىنبەكوۆا, قازاق كۇرەسىنەن ەكى دۇركىن الەم چەمپيونى ايدوس عالىموۆ ۇلتتىق سپورتتى حالىقارالىق دەڭگەيدە وزگەلەرگە مويىنداتتى. جاسوسپىرىمدەر اراسىنداعى ازيا ويىندارىنىڭ قولا جۇلدەگەرى, اۋىر اتلەت نۇرسىيلا بەرىكبول, جاۋىنگەرلىك سامبودان الەم چەمپيوندارى دىنمۇحامەد ءدىنيسلاموۆ پەن ابىلايحان الشىمبەك وبلىس مەرەيىن رەسپۋبليكا كولەمىندە اسقاقتاتتى. پارا دزيۋدو بويىنشا حالىقارالىق جارىستا ەل نامىسىن اسقاقتاتقان دايانا فەدوسوۆانىڭ ەسىمىندە ەرەكشە اتاپ وتكەن ءجون.
بۇل جەتىستىكتەردىڭ بارلىعى – سپورتشىلاردىڭ, جاتتىقتىرۋشىلاردىڭ جانە سالا ماماندارىنىڭ جۇيەلى ءارى تاباندى ەڭبەگىنىڭ ناتيجەسى.
«وبلىسىمىزدا جاڭا سپورت نىساندارى سالىنىپ, قولدانىستاعى كەشەندەر جاڭعىرتىلىپ, حالىقتىڭ سپورتپەن تۇراقتى تۇردە اينالىسۋىنا مۇمكىندىك جاسالۋدا. بيىل العاش رەت سپورت نىساندارىن جوندەۋ جۇمىستارىنا 578 ميلليون تەڭگە ءبولىندى. بۇل وتكەن جىلمەن سالىستىرعاندا 9 ەسەگە كوپ. الداعى ۋاقىتتا دا بۇل باعىتتاعى جۇمىستار جالعاسىن تابادى», دەدى وبلىس اكىمى.
سالتاناتتى جيىندا «ۇزدىك بالالار مەن جاسوسپىرىمدەر سپورت مەكتەبى», «ۇزدىك دەنە شىنىقتىرۋ جانە سپورت ءبولىمى», «ۇزدىك جاتتىقتىرۋشى», «ۇزدىك سپورتشى» اتالىمدار بويىنشا سالا ۇزدىكتەرى ماراپاتتالدى. سونىمەن قاتار, وڭىردە بۇقارالىق سپورتتى كەڭىنەن ناسيحاتتاپ, سالاۋاتتى ءومىر سالتىن دارىپتەۋگە ۇلەس قوسقان جۋرناليستەردىڭ ەڭبەگى ەلەندى.
ۇلىتاۋ وبلىسى