بەكەم بىرلىكتىڭ بەلگىسى

قحا-نىڭ 30 جىلدىعىن كەڭ كولەمدە اتاپ ءوتۋ – دۇرىس باعىتتا جۇرگىزىلىپ جاتقان ساياساتتىڭ تاعى ءبىر دالەلى. كۇنى بۇگىنگە دەيىن ەل كولەمىندە 10 مىڭنان اسا الەۋمەتتىك ماڭىزى بار ءىس-شارا وتكىزىلدى. وندا 3 ميلليوننان اسا وتانداسىمىز بوي كورسەتتى.

بەيبىتشىلىك پەن ءوزارا كەلىسىمنىڭ جارشىسى سانالاتىن ۇيىمنىڭ مەرەيلى بەلەسىن مەرەكەلەۋ تەك ماڭىزدى وقيعالارمەن عانا ەمەس, يگى ىستەرمەن دە ەستە قالدى. ماسەلەن, قحا جانىنداعى «جومارت جان» ورتالىعىنىڭ مەتسەناتتارى 35 مىڭ ازاماتقا جالپى سوماسى 305 ميلليون تەڭگە كولەمىندە كومەك كورسەتتى.

بۇگىندە قحا اياسىنا 1000-نان استام ەتنومادەني بىرلەستىك پەن 4 مىڭ قوعامدىق قۇرىلىم بىرىكتىرىلگەن. ولار وتباسىلىق قۇندىلىقتاردى نىعايتۋدا جانە جاستاردى رۋحاني-ادامگەرشىلىك تاربيەگە باعىتتاۋدا «مادەنيەتتى انا – مادەنيەتتى ۇلت», «ادال ازامات», «سالاۋاتتى سانا» جوبالارىن جۇيەلى جۇزەگە اسىرىپ كەلەدى. وعان قوسا «اقساقالدار كەڭەسى» مەن «انالار كەڭەسى» دە بار. ونىڭ ۇستىنە بيىل العاش رەت الماتى, جامبىل, جەتىسۋ جانە تۇركىستان وبلىستارىندا اۋداندىق اسسامبلەيالار قۇرىلدى.

ەتنوسارالىق كەلىسىمدى نىعايتۋعا باعىتتالعان مەملەكەتتىك ساياساتتى جۇزەگە اسىراتىن ءتيىمدى جۇيە قالىپتاسىپ ۇلگەردى. ونىڭ نەگىزىندە وڭىرلەرگە تۇراقتى تۇردە زەرتتەۋ جۇرگىزىلىپ, مونيتورينگتىك ءىسساپارلار ۇيىمداستىرىلادى.

بايقاساق, «اسسامبلەيا جاستارى» جاستار قاناتىندا 10 مىڭنان استام جاس تىركەلگەن. ولار كوبىنە مادەنيەتارالىق ديالوگتى دامىتۋعا جاردەمدەسەدى. اتاپ ايتساق, «جاڭا تولقىن», «انك جەتەكشىلەر مەكتەبى» جانە «50 جاس كوشباسشى» جوبالارى بار. سونداي-اق ەلىمىزدەگى جوعارى وقۋ ورىندارىندا ەتنوس وكىلدەرىن بىرىكتىرەتىن ستۋدەنتتىك اسسامبلەيا دا تۇراقتى جۇمىس ىستەيدى. باستى مىندەت – جەرگىلىكتى جەردە ۆولونتەرلىك قىزمەت پەن ەتنومەدياتسيانى دامىتۋعا ۇلەس قوسۋ.

ال عىلىم مەن ءبىلىمدى دامىتۋ, زەرتتەۋ جۇمىستارىن جۇرگىزۋ ماقساتىندا جوعارى وقۋ ورىندارىندا اسسامبلەيانىڭ 42 كافەدراسى بار. عىلىمي-ەكسپەرتتىك كەڭەس جانە جاس عالىمدار كلۋبى دا اشىلعان. وندا 360 ساراپشى قىزمەت ەتەدى.

كەيىنگى كەزدەرى ەلىمىزدە ەتنوجۋرناليستيكا سالاسى قارقىندى دامىپ كەلەدى. رەسپۋبليكا كولەمىندە 50-دەن استام ەتنيكالىق گازەت پەن جۋرنال 11 تىلدە باسىلىپ شىعادى. قحا جانىنداعى جۋرناليستەر كلۋبىندا جەتەكشى بۇقارالىق اقپارات قۇرالدارىنىڭ 500-گە جۋىق وكىلى بار.

اسسامبلەيانىڭ شىعارماشىلىق ۇجىمدارى اسسوتسياتسياسى دا قۇرىلدى. وعان 170-تەن استام انسامبل كىردى. بۇگىندە ەلىمىزدىڭ ەتنوسارالىق كەلىسىم ۇلگىسى حالىقارالىق دەڭگەيدە كەڭىنەن تانىلۋدا. يدەيانى ىلگەرىلەتۋگە اسسامبلەيا جانىنان حالىق ديپلوماتياسى ورتالىعى مەن دوستىق ەلشىلەرى كورپۋسى جۇمىلدىرىلعان. ەرەكشە اتاپ وتەرلىگى, «اسسامبلەيا جاستارى» ۇيىمى يۋنەسكو مەن ەۋروپا كەڭەسىنىڭ حالىقارالىق جاستار قۇرىلىمدارىنا كىرىپ, ءوز باستامالارىن پاريجدەگى يۋنەسكو شتاب-پاتەرىندە تانىستىردى.