استانا. 23 اقپان. سولتۇستىك كورەيانىڭ بيلەۋشى ەڭبەك پارتياسىنىڭ ورتالىق اسكەري كوميسسياسى الدىندا سويلەگەن سوزىندە ەلدىڭ ليدەرى كيم چەن ىن اسكەري قىزمەتكەرلەردى سوعىسۋعا ءازىر بولىپ, تولىق دايىندىق ساپىندا تۇرۋعا شاقىردى. بۇل تۋرالى كورەيانىڭ «رەنحاپ» اگەنتتىگىنە سىلتەمە جاساعان «گازەتا.رۋ» حابارلادى.
كيم چەن ىن ءوزىنىڭ سوزىندە جاۋىنگەرلىك دايىندىق دەڭگەيىن كوتەرە ءتۇسۋ مۇددەسى ءۇشىن كورەي حالىق ارمياسى قۇرىلىمىن جاڭعىرتۋ كەرەك ەكەنىن اتاپ ءوتتى. ول «امەريكا يمپەرياليزمىنە» قارسى كۇرەس تاسىلدەرىنە كەڭىنەن توقتالدى. ول سوڭعى جىلدارى جاعدايدىڭ تەك كحدر-دا عانا ەمەس, الەمدە تۇگەل كۇردەلەنىپ كەتكەنىن اۋىزعا الدى.
سولتۇستىك كورەيا باسشىسى ەگەر وڭتۇستىك كورەيا اقش-تىڭ پحەنيانعا قارسى «باسقىنشىلىق سوعىسىنا» قوسىلىپ كەتەتىن بولسا, ونى «باقىتسىز بولاشاق» كۇتىپ تۇرعانىن ايتىپ قورقىتتى.
حابارلامادا كحدر ليدەرىنىڭ سوڭعى 10 جىلدا ءبىرىنشى رەت پارتيا اسكەري كوميسسياسىنىڭ كەڭەيتىلگەن وتىرىسىنا قاتىسقانى اتاپ وتىلەدى.