ە.بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتىندە كورنەكتى قالامگەر, قازاق رۋحانياتىنىڭ ءىرى تۇلعاسى مۇحتار ماعاۋيننىڭ 85 جىلدىعىنا ارنالعان «الاش رۋحانياتىنىڭ الداسپانى» اتتى عىلىمي-تانىمدىق سەمينار ءوتتى. تاعىلىمدى جيىنعا جازۋشىنىڭ ۇلى, ادەبي رەداكتورى ەدىگە مۇحتار ۇلى اقش-تان ارنايى كەلىپ قاتىستى. سونىمەن قوسا, ءوڭىردىڭ زيالى قاۋىم وكىلدەرى, بەلگىلى ادەبيەتتانۋشى عالىمدار, جاس زەرتتەۋشىلەر مەن ستۋدەنتتەر باس قوستى.
سەمينار ۋنيۆەرسيتەتتىڭ باسقارما توراعاسى نۇرلان دۋلاتبەكوۆتىڭ قۇتتىقتاۋ حاتىمەن اشىلدى. «ماعاۋين شىعارمالارى – ۇلتتىڭ رۋحاني ايناسى, تاريحي زەردەسى. ولار تاۋەلسىزدىك رۋحىن وياتىپ, ازات ويعا جول سالدى» دەلىنگەن وندا. سەمينار ماعاۋين الەمىن جاڭا قىرىنان زەردەلەپ, جاس زەرتتەۋشىلەرگە باعىت-باعدار بەرۋدى كوزدەپتى.
عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ توراعاسى, فيلولوگيا عىلىمدارىنىڭ كانديداتى ەربول تىلەشوۆ:
«ول اتاق-داڭق ءۇشىن ەمەس, تۇتاس ۇلتتىڭ رۋحىن كوتەرۋ ءۇشىن جازدى. بۇگىندە جازۋشى شىعارماشىلىعىنىڭ تەرەڭ ءمانىن تولىق اشاتىن عىلىمي تالداۋ جەتىسپەيدى. بۇل – ەسكىرگەن ادىستەمەدەن تۋىنداعان ماسەلە. ونى جاس عالىمدار تۇزەتەدى دەپ سەنەمىز», دەدى.
ەدىگە مۇحتار ۇلى اكەسىنىڭ جاستارعا قاتىستى وسيەتتەرىن ورتاعا سالدى. ونىڭ ايتۋىنشا, مۇحتار ماعاۋين ءۇشىن جاستار – ەلدىڭ ەرتەڭى, ۇلتتىڭ ءۇمىتى بولعان.
«اكەم شەتەلدە جۇرسە دە, قازاقستانداعى جاستاردىڭ بولاشاعىنا ۇنەمى الاڭدايتىن. «ۇلتتىق سانا قالىپتاسپاي, شىنايى تاۋەلسىزدىك بولمايتىنىن» ەسكە سالۋدان جالىقپايتىن. تاۋەلسىزدىككە قول جەتكىزگەنىمىزبەن, سانانىڭ ازاتتىعى ءالى دە قاجەت دەيتىن. جاستار ەركىن ويدى دارىپتەيتىن شىعارمالاردى وقۋعا ءتيىس ەكەنىن ءجيى ايتاتىن», دەدى ەدىگە مۇحتار ۇلى.
اباي اتىنداعى مەملەكەتتىك سىيلىقتىڭ لاۋرەاتى, اقىن سەرىك اقسۇڭقار ۇلى مۇحتار ماعاۋينمەن جەكە كەزدەسكەن كەزدەگى اسەرلەرى مەن قالامگەردىڭ شىعارماشىلىعى تۋرالى وي قوزعاپ, ونىڭ ۇلتتىق رۋحانياتتاعى ءرولىن ەرەكشە اتاپ ءوتتى.
قاراعاندى ۇلتتىق زەرتتەۋ ۋنيۆەرسيتەتى ماركەتينگ جانە رەكرۋتينگ باسقارماسىنىڭ باسشىسى ازامات دۇيسەمباەۆ « ۇلىلاردى ۇلىقتاۋ ۇرپاق پارىزى: ماعاۋيننىڭ اقتىق ساپارى مەن 85 جىلدىعى» اتتى بايانداما وقىدى. فيلولوگيا عىلىمدارىنىڭ دوكتورى, پروفەسسور جانسايا جارىلعاپوۆ بايانداماسىندا مۇحتار ماعاۋين شىعارماشىلىعى قازاق ادەبيەتىندەگى بەتبۇرىستى كەزەڭ بولعانىن اتاپ ءوتتى. ونىڭ ايتۋىنشا, جازۋشى بۇرىنعى ەستەتيكالىق قاعيدالاردى قايتا قاراپ, ادەبي ويعا جاڭا فيلوسوفيالىق سەرپىن اكەلدى. بەلگىلى كاسىپكەر ەرلان ءاشىم «ماعاۋين فەنومەنى», عالىم ساعىمباي جۇماعۇل «مۇحتار ماعاۋين – حاندىق ءداۋىر ادەبيەتىنىڭ زەرتتەۋشىسى», جۋرناليست, ۆەلوشاباندوز ەرنات راحمەتوللا «سەرتىنە بەرىك قالامگەر» دەگەن تاقىرىپتا ويلارىن ورتاعا سالدى.
تاعىلىمدى جيىن ۇلت رۋحانياتىنىڭ الىپ تۇلعاسىنا تاعزىم عانا ەمەس, ماعاۋين مۇراسىن جاڭا بۋىنعا تەرەڭ تانىتۋدىڭ ماڭىزدى الاڭىنا اينالدى.
قاراعاندى وبلىسى