قولدانبالى ەكونوميكانى زەرتتەۋلەر ورتالىعىنىڭ ساراپشىلارى تۇرعىن ءۇي نارىعىنا قاتىستى جاڭا باعالاۋ ۇسىندى. ولاردىڭ ايتۋىنشا, بيىلعى دەرەكتەرگە قاراساق, نارىق باياۋلاعان. الايدا باعا كۇرت تومەندەيدى دەۋ ەرتە, دەپ جازادى Egemen.kz.
2025 جىلى تۇرعىن ءۇي باعاسى 15,6%-عا قىمباتتاعان. قاراشا ايىندا جاڭا پاتەردىڭ 1 شارشى مەترى 568,8 مىڭ تەڭگەگە جەتتى. جىلدىق ءوسىم ينفلياتسيادان جوعارى بولعانىمەن, ايلىق ءوسىم بار بولعانى 2,5% بولدى. بۇل نارىقتاعى قىزىۋدىڭ بىرتىندەپ باسىلىپ جاتقانىن اڭعارتادى.
ساراپشىلار قاراشادا شامامەن 40 مىڭ ساتۋ ساتىپ الۋ مامىلەسى تىركەلگەنىن ايتادى. قازانمەن سالىستىرعاندا ازداۋ, بىراق بىلتىرعى كورسەتكىشتەن جوعارى. بۇل سۇرانىستىڭ تولىق جوعالماعانىن, الايدا ساتىپ الۋشىلاردىڭ شەشىم قابىلداۋدا ساق بولا باستاعانىن كورسەتەدى.
«باعا ديناميكاسى وڭىرلەر بويىنشا اركەلكى. الماتىدا باعا ەڭ جوعارى دەڭگەيدە قالىپ وتىر. ال استانادا ءبىر ايدا باعا تومەندەپ, ورتاشا رەسپۋبليكالىق كورسەتكىشكە اسەر ەتتى. شىمكەنت, تاراز, وسكەمەندە دە باعانىڭ ازداپ تومەندەگەنى بايقالدى. تۇرعىن ءۇي نارىعىن قازىر يپوتەكا ۇستاپ تۇر. 2025 جىلدىڭ 9 ايىندا يپوتەكالىق نەسيە نارىعى 25% ءوستى. نارىقتىڭ 67%-ى مەملەكەتتىك باعدارلامالاردىڭ ۇلەسىندە, ال كوممەرتسيالىق يپوتەكانىڭ ۇلەسى 33%-عا دەيىن قىسقارعان. قۇرىلىس كولەمى ارتقانىمەن, ساراپشىلار قۇرىلىس ماتەريالدارى مەن قوسالقى شىعىنداردىڭ قىمباتتاۋى باعانىڭ تومەندەۋىنە جول بەرمەي وتىرعانىن اتاپ وتەدى», دەيدى قولدانبالى ەكونوميكانى زەرتتەۋلەر ورتالىعىنىڭ ساراپشىلارى.
دەمەك كەلەر جىلى تۇرعىن ءۇي باعاسى كۇرت قۇلدىرامايدى. تەك جاڭا قۇرىلىس كودەكسىنىڭ ەنگىزىلۋى, ۇلەستىك قۇرىلىس تالاپتارىنىڭ قاتايۋى, ققس مولشەرلەمەسىنىڭ ءوسۋى, زەينەتاقى جيناقتارىن پايدالانۋ مۇمكىندىگى باعاعا قوسىمشا قىسىم ءتۇسىرۋى مۇمكىن.