يمپورت كۇشەيدى, ال ەكسپورتتىق تابىس ازايىپ بارا جاتىر

Tengenomika تەلەگرام ارناسىنىڭ ساراپتاماسىنا سۇيەنسەك, 2025 جىلدىڭ قاڭتار-قازان ايلارىندا قازاقستاننىڭ سىرتقى ساۋدا اينالىمى 116,3 ملرد دوللاردى قۇرادى. بۇل وتكەن جىلمەن سالىستىرعاندا 0,7%-عا از. نەگىزگى كورسەتكىشتەر كەلەسىدەي:

ەكسپورت: 4,6%-عا تومەندەپ, 64,6 ملرد دوللار بولدى. يمپورت: 4,7%-عا ءوسىپ, 51,7 ملرد دوللارعا جەتتى. ساۋدا سالدوسى (پايدا): 29,7%-عا شۇعىل قىسقارىپ, 12,9 ملرد دوللاردى قۇرادى. سىرتقى ساۋداداعى 5 نەگىزگى ترەند

1.ساۋدا سالدوسى سوڭعى 15 جىلداعى ەڭ تومەنگى دەڭگەيدە

قازىرگى وڭ ساۋدا بالانسى 2010 جىلداردان بەرگى ەڭ تومەنگى كورسەتكىشتەردىڭ ءبىرى. بۇدان دا تومەن كورسەتكىش تەك 2016 جىلعى داعدارىستا جانە 2020 جىلعى پاندەميا كەزىندە تىركەلگەن. بۇل تەڭگە باعامىنىڭ تۇراقسىزدىعىنا اكەلەدى. دەگەنمەن, مۇناي ەكسپورتىنىڭ ەسەبىندەگى ادىستەمەلىك ايىرماشىلىقتارعا بايلانىستى بۇل دەرەكتەر الداعى ۋاقىتتا 2 ملرد دوللارعا جاقسارۋى مۇمكىن.

2. يمپورت تاريحي رەكوردتى جاڭارتتى

قازاقستان بۇرىن-سوڭدى مۇنداي كولەمدە تاۋار ساتىپ الماعان (51,7 ملرد دوللار). اسىرەسە ينۆەستيتسيالىق تاۋارلار (12,8 ملرد دوللار) مەن تۇتىنۋشىلىق تاۋارلار (15,6 ملرد دوللار) بويىنشا رەكورد ورناتىلدى. ەلگە ءدارى-دارمەك, اۆتوبولشەكتەر, ەلەكتر گەنەراتورلارى مەن مەتالل كونسترۋكتسيالارى وتە كوپ مولشەردە اكەلىنىپ جاتىر.

3. رەسەي قايتادان نەگىزگى جەتكىزۋشى اتاندى

قازان ايىنا دەيىن قىتاي كوش باستاپ كەلگەن ەدى, بىراق رەسەي ەنەرگەتيكالىق تاۋارلار مەن ازىق-ت ۇلىك ەسەبىنەن ءبىرىنشى ورىنعا قايتا شىقتى (15,15 ملرد دوللار). قازىرگى تاڭدا ەكى الپاۋىت نارىقتى ءبولىپ العان: قىتاي – تەحنولوگيا مەن ينۆەستيتسيالىق تاۋارلارعا, ال رەسەي – ازىق-ت ۇلىك پەن ەنەرگياعا باسىمدىق بەرىپ وتىر.

4. ورتالىق ازيا نارىعىنداعى رەكورد

بيىل قازاقستاننىڭ كورشىلەس ورتالىق ازيا ەلدەرىنە ەكسپورتى تاريحي شىڭعا جەتىپ, 5,3 ملرد دوللاردى قۇرادى. ايماقتىڭ ەكسپورتتاعى ۇلەسى 12 جىل بۇرىن 2,6% بولسا, قازىر 8,3%-عا دەيىن ءوستى. كۇنباعىس مايى, ەت, سۋسىن جانە مەتالل ونىمدەرىنىڭ ساۋداسى قارقىندى.

5. شيكىزات دوميناتسياسى جانە اوك ءوسىمى

ەكسپورتتىڭ 82%-ى ءالى دە شيكىزاتقا تيەسىلى. الايدا, اگروونەركاسىپ كەشەنىنىڭ ارقاسىندا دايىن ءونىم ەكسپورتى 16%-عا وسكەنى بايقالادى. بۇل شيكىزاتتىق ەمەس سەكتورداعى سيرەك وڭ كورسەتكىشتەردىڭ ءبىرى.ساراپشىلاردىڭ پىكىرىنشە, ءىس جۇزىندە ءبىز ىشكى ءوندىرىستى دامىتۋدىڭ ورنىنا, وزگە ەلدەردىڭ ەكونوميكاسىن قارجىلاندىرىپ جاتىرمىز. ينۆەستيتسيالاردىڭ وسۋىنە قاراماستان, شەتەلدەن ساتىپ الۋدىڭ ۇدەۋى مەملەكەتتىك باعدارلامالاردىڭ تيىمدىلىگىنە قاتىستى ۇلكەن سۇراق تۋدىرادى. ەندىگى ماسەلە – جاڭا جوسپار قۇرۋ ەمەس, قولداعى جوسپاردى ناقتى ناتيجەگە اينالدىرۋ.