ءسۇتتى تەرەڭ وڭدەيتىن زاۋىتتىڭ العاشقى كەزەڭى اياقتالدى

كاسىپورىننىڭ تەحنولوگيالىق دەڭگەيى وتە جوعارى سانالادى ءارى مۇنداي اۋقىمداعى ءوندىرىس ەۋرازيالىق ەكونوميكالىق وداق كەڭىستىگىندە سيرەك كەزدەسەدى. پەتروپاۆل قالاسىندا ورنالاسقان زاۋىت جاڭا قويۋلاتىلعان ءسۇت شىعارۋ جەلىلەرىمەن جابدىقتالىپ, ءسۇتتى وڭدەۋ مەن قويۋلاتۋ ۇدەرىسىنىڭ بارلىق كەزەڭىنە تولىق تەحنولوگيالىق باقىلاۋ ەنگىزىلگەن. قازىر بارلىق جابدىق ورناتىلىپ, كاسىپورىن وندىرىستىك پروتسەستەردى رەتتەۋ مەن سىناقتان وتكىزۋ كەزەڭىنە كوشتى. وندىرىستە پايدالانىلاتىن شيكىزات تەك سولتۇستىك قازاقستان وبلىسىنداعى فەرمەرلەردەن جەتكىزىلەدى, ءونىم تولىقتاي تابيعي ءارى جوعارى ساپالى بولماق.

Eurasian Milk كومپانياسىنا تيەسىلى بارلىق وندىرىستىك جەلىلەردى ونەركاسىپتىك ىسكە قوسۋ كەلەسى جىلدىڭ ءبىرىنشى توقسانىنا جوسپارلانعان. جوبانىڭ ىسكە اسۋى ەلدەگى ءسۇت ونەركاسىبىنىڭ دامۋىنا سەرپىن بەرىپ, ەكسپورتتىق الەۋەتتى ارتتىرۋعا ءارى ىشكى نارىقتى ساپالى وتاندىق ونىممەن قامتاماسىز ەتۋگە مۇمكىندىك بەرەدى. زاۋىت تاۋلىگىنە 350 تونناعا دەيىن, ياعني جىلىنا 125 مىڭ توننا ءسۇت قابىلداپ, تازالاي الاتىن قۋاتقا يە. مۇندا جارتىلاي قاتتى, قاتتى جانە جۇمساق ىرىمشىكتەر, سارى ماي, قويۋلاتىلعان ءسۇت, قىشقىل ءسۇت ونىمدەرى ءوندىرىلىپ, ولار ۋلترا-كلين قاپتاماسىندا بۋىپ-تۇيىلەدى. بۇعان قوسا ءسۇت سارىسۋىن تەرەڭ وڭدەۋ ارقىلى دۇرىس ءارى سپورتتىق تاماقتانۋعا ارنالعان ءونىم شىعارۋ دا نەگىزگى باعىتتاردىڭ ءبىرى رەتىندە ايقىندالعان.

Eurasian Milk باس ديرەكتورى اندرەي گريتسەنكو جوبانىڭ ستراتەگيالىق ماڭىزىنا توقتالىپ, زاۋىتتىڭ بولاشاققا باعىتتالعانىن اتاپ ءوتتى. ونىڭ ايتۋىنشا, العاشقى كەزەڭ اياسىندا سالىنعان ينۆەستيتسيا كولەمى 80 ملن دوللارعا جەتكەن. بۇل تەك ءبىر كاسىپورىننىڭ ەمەس, تۇتاس ءوڭىر ەكونوميكاسىنىڭ دامۋىنا قوسىلعان ەلەۋلى ۇلەس. كومپانيانىڭ باستى ماقساتى – ىشكى نارىقتاعى وتاندىق ءونىم ۇلەسىن ارتتىرۋ, يمپورتقا تاۋەلدىلىكتى ازايتۋ مەن وتاندىق تۇتىنۋشىعا تابيعي, ساپالى ءارى قاۋىپسىز ءونىم ۇسىنۋ. باس ديرەكتور زاۋىتتىڭ ەلدىڭ ازىق-ت ۇلىك قاۋىپسىزدىگى مەن اگروونەركاسىپتىك كەشەندى دامىتۋدا ماڭىزدى ءرول اتقاراتىنىنا سەنىم ءبىلدىردى.

جوبا ەلىمىزدىڭ تاماق ونەركاسىبى سالاسىنداعى ەڭ ءىرى وندىرىستىك ينۆەستيتسيالاردىڭ ءبىرى سانالادى. Eurasian Milk ينۆەستيتسيانىڭ ەداۋىر بولىگىن ءوز قاراجاتى ەسەبىنەن جۇزەگە اسىرىپ, قارجىلىق تاۋەكەلدەردى تولىق ءوز موينىنا العان. بۇل باستاما مەملەكەت باسشىسىنىڭ جولداۋىندا بەلگىلەنگەن مىندەتتەرمەن تولىق ۇندەسەدى. سونداي-اق كومپانيا ىشكى نارىقتى وتاندىق ونىممەن قامتۋ جانە يمپورتتى الماستىرۋ باعىتىنداعى قوسىمشا تاۋەكەلدەردى دە قابىلداعان.

جوبانىڭ العاشقى كەزەڭى 10 مىڭ شارشى مەتردەن استام وندىرىستىك ءارى ينجەنەرلىك ينفراقۇرىلىمدى سالۋدى, نەگىزگى تەحنولوگيالىق باعىتتاردى ىسكە قوسۋدى قامتىدى. زاۋىتتا سۋ, سالقىنداتۋ, بۋ, ەلەكترمەن قامتاماسىز ەتۋ جۇيەلەرى بار زاماناۋي ەنەرگەتيكالىق ينفراقۇرىلىم قالىپتاستىرىلدى.

كومپانياعا فەرمەرلەردىڭ الەۋەتىن دامىتۋ دا ماڭىزدى باعىتتاردىڭ ءبىرى. سولتۇستىك قازاقستان وبلىسى ءسۇت شارۋاشىلىعىن وركەندەتۋگە تاريحي تۇرعىدا قولايلى ءوڭىر سانالادى. الايدا تۇراقتى وتكىزۋ جۇيەسىنسىز ءوندىرىس كولەمىن ارتتىرۋ قيىن. Eurasian Milk جىلىنا 125 مىڭ تونناعا دەيىن فەرمەرلىك ءسۇتتى وڭدەۋدى كوزدەيدى. وسى ماقساتتا فەرمەرلەرمەن بىرلەسىپ, جەمشوپ ساپاسىن جاقسارتۋ, مال كۇتىمى مەن دەنساۋلىعىن باقىلاۋ, ءسۇتتىڭ وزىندىك قۇنىن تومەندەتۋ ارقىلى شيكىزات ساپاسىن ارتتىرۋ باعىتىندا جۇمىس جۇرگىزىلەدى.

قازىر ەلىمىزدە تەرەڭ وڭدەلگەن ءسۇت ونىمدەرى نارىعىندا يمپورتتىق تاۋارلار باسىم. بۇل وتاندىق وندىرۋشىلەر ءۇشىن باسەكەلەستىكتى كۇشەيتىپ وتىر. اندرەي گريتسەنكونىڭ ايتۋىنشا, مۇنداي جاعدايدا وتاندىق ءوندىرىستى مەملەكەتتىك دەڭگەيدە قولداۋ ستراتەگيالىق ماڭىزعا يە. دامىعان ەلدەردىڭ تاجىريبەسى كورسەتكەندەي, ۇلتتىق برەندتەردى جۇيەلى قولداۋ وتاندىق ءونىمنىڭ قۇندىلىعىن ارتتىرىپ, تۇتىنۋشىلار سەنىمىن نىعايتادى. بۇل ءوز كەزەگىندە ەكونوميكالىق تۇراقتىلىقتىڭ ماڭىزدى فاكتورى بولىپ سانالادى.