وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي, وقىس وقيعا 18 جەلتوقساندا بولعان. جەدەل باسقارۋ ورتالىعىنىڭ قىزمەتكەرلەرى, پوليتسيا اعا سەرجانتى سالتانات ورىنباەۆا مەن پوليتسيا مايورى ايگۇل ادراكوۆا بەينەباقىلاۋ كامەراسى ارقىلى جايىق وزەنىنىڭ ۇستىندەگى كوپىردەن سەكىرۋگە وقتالعان ادامدى بايقاپ قالعان, دەپ حابارلايدى Egemen.kz.
«ورتالىق قىزمەتكەرلەرىنىڭ حابارىنان سوڭ وقيعا ورنىنا ۋچاسكەلىك پوليتسيا ينسپەكتورلارى ەربولات ساپاشەۆ پەن باعىتجان سابىرعاليەۆ, پاترۋلدىك پوليتسيا قىزمەتكەرلەرى سۇلتان ساپارعاليەۆ پەن نۇرجان احمەتجان جەدەل جەتتى. ولار كوپىردەن سەكىرۋگە ارەكەت جاساعان 45 جاستاعى ەر ادامدى اڭگىمەگە تارتىپ, رايىنان قايتاردى. پوليتسەيلەردىڭ كاسىبي ءارى باتىل ارەكەتىنىڭ ناتيجەسىندە ەر ادام قاۋىپسىز جەرگە شىعارىلىپ, پوليتسيا بولىمىنە جەتكىزىلدى», دەپ حابارلادى دەپارتامەنتتىڭ ءباسپاسوز قىزمەتى.
قازىر جەدەل-تەرگەۋ توبى ەر ادامنىڭ بۇل ارەكەتكە بارۋ سەبەبىن جان-جاقتى تەكسەرىپ جاتىر. تەرگەۋ امالى باستالدى.