تۇركىستان وبلىسى قوشقاراتا اۋىلىنداعى كەلەس وزەنى ارقىلى وتەتىن كوپىر قۇلادى. جەرگىلىكتى اكىمدىك كوپىردە قاۋىپتىڭ العاشقى بەلگىلەرى پايدا بولعاننان-اق كولىك قوزعالىسىنا تىيىم سالىنعانىن مالىمدەدى, دەپ جازادى Egemen.kz.
الدىن الا قابىلدانعان شەشىمنىڭ ارقاسىندا وقىس وقيعا كەزىندە ەشكىم زارداپ شەكپەگەن.
«كەلەس وزەنى ارقىلى وتەتىن كوپىردە جارىقشاق پايدا بولدى, كەلەس اۋدانىنىڭ اكىمى جانىبەك اعىباەۆ وقيعا ورنىنا بارىپ, كوپىردىڭ جاي-كۇيىمەن تانىستى. قاۋىپسىزدىكتى قامتاماسىز ەتۋ ءۇشىن كوپىر قۇلاعانعا دەيىن كولىك قوزعالىسى ۋاقىتشا توقتاتىلدى», دەلىنگەن اۋدان اكىمدىگى تاراتقان حابارلامادا.
الدىن الا مالىمەتكە ساي, كوپىر ۇزاق جىلدار قىزمەت ەتىپ, تىرەك باعاندارى سۋ سالدارىنان زاقىمدانعان.
قازىر الپامىس جانە بىرتىلەك اۋىلدىق وكرۋگتەرىن بايلانىستىرۋ ءۇشىن ۇزىندىعى 10–15 شاقىرىم اينالما جول ۇيىمداستىرىلعان.
كوپىر تۇركىستان وبلىسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ تەڭگەرىمىندە بولعان.