ەنەرگەتيكا سالاسى – ەكونوميكانىڭ كۇرەتامىرى. جارىق پەن جىلۋدى ۇزدىكسىز جەتكىزىپ وتىرعان ەنەرگەتيكتەر ەلدىڭ تۇراقتى دامۋى مەن حالىقتىڭ تۇرمىس ساپاسىنا تىكەلەي ۇلەس قوسىپ كەلەدى. قىستىڭ قاقاعان ايازىندا دا, جازدىڭ اپتاپ ىستىعىندا دا ولار تاۋلىك بويى تىنىمسىز ەڭبەك ەتەدى.
بۇگىندە سالادا ينفراقۇرىلىمدى جاڭعىرتۋ, تسيفرلاندىرۋ مەن بالامالى ەنەرگيا كوزدەرىن دامىتۋ باعىتىندا ماڭىزدى جوبالار جۇزەگە اسىرىلىپ جاتىر. بۇل – ەنەرگەتيكتەردىڭ كاسىبيلىگى مەن جاۋاپكەرشىلىگىنىڭ ايقىن كورىنىسى. ەنەرگەتيكتەر ەڭبەگى – سەنىمدى ەنەرگيا, تۇراقتى ەكونوميكا, جارقىن بولاشاقتىڭ كەپىلى.
ەلىمىز ەڭبەگىمىزدى ەلەپ, پرەزيدەنتىنىڭ قاتىسۋىمەن ماراپاتتاپ جاتقانى ءۇشىن العىسىمىز شەكسىز. ءاربىر ەڭبەكقور ەڭبەكشى-جۇمىسشىنىڭ ەڭبەگى ەسكەرىلىپ, مەرەيى وسكەنى – بىزگە ۇلكەن مارتەبە. ماسەلەن, مەنىڭ ارىپتەستەرىم ۋچاسكە باسشىسى سانجار امىريەۆ پەن ينجەنەر التىنبەك كەرەەۆ كوپتەگەن جۇمىسشى-ەڭبەككەردى باۋلىپ, تاربيەلەپ ءجۇر. كەلەشەكتە ولاردىڭ دا قاجىرلى ەڭبەگى ءوز باعاسىن السا دەگەن تىلەك بار. ءبىر بىلەرىم, ەنەرگەتيكا – كورىنبەيتىن, بىراق شەشۋشى كۇش. سوندىقتان قيىن جاعدايدا دا جۇيەنى توقتاتپاي ۇستاپ تۇرعان ەنەرگەتيكتەرگە قۇرمەت ارقاشان ەرەكشە.
قايىرعالي سيسەكەنوۆ,
باتىس قازاقستان وبلىسى ەلەكترجەلىلەرىن تاراتۋ كومپانياسىنىڭ كولىك جۇرگىزۋشىسى
مەرەيىمىزدى وسىرگەن قۇرمەت
ەنەرگەتيكتەر كۇنى قارساڭىندا سالا قىزمەتكەرلەرى ەڭبەكتەگى جەتىستىكتەرىنە وراي مەملەكەتتىك جانە ۆەدومستۆولىق ناگرادالارمەن ماراپاتتالدى. سالتاناتتى شارادا ەنەرگەتيكا سالاسىنىڭ ەل ەكونوميكاسىنداعى ستراتەگيالىق ءرولى اتاپ ءوتىلدى.
ەڭبەك ادامىنىڭ, ەنەرگەتيكا سالاسى قىزمەتكەرلەرىنىڭ ەڭبەگى ەسكەرىلىپ, مەرەيىمىزدى وسىرگەنى ءۇشىن مەملەكەت باسشىسىنا العىس ايتامىن. بيىل جۇمىسشى ماماندىقتار جىلىنىڭ تۇيىندەلەر ۋاقىتىندا وسىنداي ەلەۋلى وقيعاعا كۋا بولىپ وتىرمىز.
مەملەكەتتىك ناگرادالار –ەنەرگەتيكتەردىڭ كاسىبيلىگىنە, جاۋاپكەرشىلىگىنە, سونداي-اق ەل ەكونوميكاسىنىڭ تۇراقتى دامۋىنا قوسقان ۇلەسىنە بەرىلگەن جوعارى باعا. بۇل ءىس-شارا سالا ماماندارىنىڭ مارتەبەسىن ارتتىرىپ, جاس بۋىنعا ۇلگى كورسەتتى.
ءاليا ەلەمانوۆا,
الماتى ەنەرگەتيكا جانە بايلانىس ۋنيۆەرسيتەتىنىڭ دوتسەنتى
ەل يگىلىگى جولىندا ەڭبەك ەتۋ – باقىت
مەنىڭ ەڭبەك جولىم 1981 جىلى باستالدى. 44 جىل ءبىر سالادا جۇمىس ىستەۋ از ۋاقىت ەمەس. بۇل ءبىر ادامنىڭ عانا ەمەس, تۇتاس ءبىر عۇمىردىڭ ەڭبەگى دەپ ايتۋعا بولادى. مەن – جامبىل وبلىسى مويىنقۇم اۋدانىنىڭ تۋماسىمىن. وسى وڭىردە, وسى مەكەمەدە ەڭبەك ەتتىم. باسقا جاققا اۋىسۋ دەگەن وي بولعان جوق. سەبەبى ءوز جەرىڭدە, ءوز ەلىڭە قىزمەت ەتۋ ءاردايىم ماڭىزدى بولدى.
ءوندىرىس ءۇشىن, ەل ءۇشىن قانداي پايدا تيگىزدىم دەپ ويلاسام, ەڭ الدىمەن, جارىقتىڭ ۇزىلمەۋى, حالىقتىڭ تىنىش ءومىرى ەسكە تۇسەدى. ەلەكتر جارىعى كوزگە كورىنبەيدى, بىراق ونسىز تىرشىلىك توقتاپ قالادى. ءبىز سول جاۋاپكەرشىلىكتى ءاردايىم سەزىنىپ جۇمىس ىستەدىك. قىستىڭ سۋىعىندا دا, جازدىڭ اپتابىندا دا جەلى قالپىنا كەلسىن دەپ, كۇن-ءتۇن دەمەي ەڭبەك ەتتىك.
بۇرىن تەحنيكا دا از ەدى, مۇمكىندىك تە شەكتەۋلى بولدى. قازىر جاعداي وزگەردى, ەڭبەككە دەگەن كوزقاراس تا, باعالاۋ دا باسقاشا. بۇگىن وسىنداي ماراپات الىپ وتىرعانىم ءۇشىن ەڭ الدىمەن, مەملەكەتكە, ەل باسشىلىعىنا العىس ايتامىن. ەڭبەكتى ەسكەرىپ, قاراپايىم جۇمىسشىعا دەيىن نازار اۋدارىپ وتىرعانى قۋانتادى.
استاناعا ارنايى كەلىپ, وسىنداي قۇرمەتكە يە بولۋ ءبىز ءۇشىن ۇلكەن مارتەبە. بۇل تەك مەنىڭ ەمەس, مەنىمەن بىرگە جۇمىس ىستەگەن بارلىق ارىپتەسىمنىڭ, ەنەرگەتيكا سالاسىندا ماڭداي تەرىن توككەن جانداردىڭ ەڭبەگىنە بەرىلگەن باعا دەپ قابىلدايمىن.
قاناتبەك ەردىلدا,
«جامبىل ەلەكتر جەلىلەرى» شەبەرى