وقيعا 18 جەلتوقسانعا قاراعان ءتۇنى KC931 رەيسىندە بولعان. كۋاگەرلەردىڭ سوزىنە قاراعاندا, اۋەدە وڭ جاق قوزعالتقىش تۇسىنان بەلگىسىز تارس ەتكەن دىبىس ەستىلىپ, ۇشاق شۇعىل تومەندەي باستاعان. سونىمەن قاتار, جولاۋشىلار سالوندا كۇيىك ءيىسى سەزىلگەنىن حابارلادى. ەكيپاج مۇشەلەرى قالىپتاسقان جاعدايعا بايلانىستى لاينەردى جاقىن ماڭداعى دەلي اۋەجايىنا قوندىرۋ تۋرالى شەشىم قابىلداعان.
Air Astana اۋە كومپانياسىنىڭ ءباسپاسوز قىزمەتى بۇل اقپاراتتى راستاپ, قونۋدىڭ «تەحنيكالىق سەبەپتەرگە» بايلانىستى بولعانىن مالىمدەدى. رەسمي مالىمەتكە سۇيەنسەك, بورتىندا 138 جولاۋشىسى بار ۇشاق الماتىدان ساعات 01:00-دە ۇشىپ شىعىپ, دەليگە جەرگىلىكتى ۋاقىتپەن 05:51-دە امان-ەسەن قونعان.
«قازىرگى ۋاقىتتا بارلىق جولاۋشىلارعا تاماق بەرىلىپ, ۋاقىتشا ۆيزالار راسىمدەلدى. اۋە كومپانياسى ولاردى قوناقۇيگە ورنالاستىرۋ ماسەلەسىن شەشىپ جاتىر. سونىمەن قاتار بانگكوكقا ساپاردى جالعاستىرۋ ءۇشىن رەزەرۆتىك بورت دايىندالۋدا», دەپ حابارلادى كومپانيا وكىلدەرى.
ايتا كەتەيىك, بۇل Air Astana ۇشاقتارىمەن سوڭعى ەكى كۇندە بولعان ەكىنشى توتەنشە وقيعا. كەشە, 17 جەلتوقسان كۇنى الماتىدان استاناعا باعىت العان Airbus A321neo لاينەرى دە سالونداعى تۇتىنگە بايلانىستى MAYDAY (بەلگىسىز قاۋىپ) سيگنالىن بەرىپ, اۋەجايعا كەرى قايتقان بولاتىن.