مەملەكەت باسشىسىنىڭ وسى جىلعى ناۋرىزداعى ۇلتتىق قۇرىلتايدىڭ IV وتىرىسىندا بەرگەن تاپسىرماسىن ورىنداۋ اياسىندا كوكشەتاۋدا «Kokshe Arena» زاماناۋي كوپسالالى سپورت كەشەنىنىڭ اشىلۋى ءوتتى. نىسان ارناۋلى مەملەكەتتىك قور قاراجاتى ەسەبىنەن تۇرعىزىلدى. بۇل ماقساتقا ۇكىمەت 12,6 ملرد تەڭگە ءبولدى.
عيماراتتىڭ سىيىمدىلىعى شامامەن 1 مىڭ ادامدى قۇرايدى. كەشەندە زاماناۋي مۋلتيمەديالىق جۇيەلەرى بار 650 ورىندىق كورەرمەن زالى, ورمەلەۋ الاڭى مەن ءورت-قولدانبالى سپورت تۇرلەرىنە ارنالعان مۇناراسى بار امبەباپ سپورت زالى قاراستىرىلعان.
بوكس, كۇرەس, اۋىر اتلەتيكا جانە كروسسفيت زالدارى سەرتيفيكاتتالعان وليمپيادالىق ستاندارتتاعى قۇرالدارمەن جابدىقتالعان. حالىقتىڭ موبيلدىلىگى تومەن توپتارى ءۇشىن دە بارلىق جاعداي جاسالعان.
ىرگەلەس اۋماقتا جەڭىل اتلەتيكا ايماعى, ويىن سپورت تۇرلەرى مەن لاقتىرۋ پاندەرىنە ارنالعان الاڭدار, سونداي-اق دەمالىس ايماقتارى جابدىقتالعان.
سالتاناتتى اشىلۋ راسىمىنە باس پروكۋرور بەرىك اسىلوۆ, تۋريزم جانە سپورت ءمينيسترى ەربول مىرزابوسىنوۆ, قارجى ءمينيسترى ءمادي تاكيەۆ, اقمولا وبلىسىنىڭ اكىمى مارات احمەتجانوۆ قاتىستى. ءىس-شارانىڭ قۇرمەتتى قوناقتارى «World Boxing» حالىقارالىق فەدەراتسياسىنىڭ پرەزيدەنتى گەننادي گولوۆكين, UFC اياسىندا ونەر كورسەتەتىن ارالاس جەكپە-جەك شەبەرى شاۆكات راحمونوۆ بولدى.
ايتا كەتۋ كەرەك, «Kokshe Arena» – قايتارىلعان اكتيۆتەر قاراجاتى ەسەبىنەن سالىنعان ايماقتاعى ەكىنشى سپورتتىق ينفراقۇرىلىم نىسانى. بۇعان دەيىن وبلىستا زەرەندى اۋىلىندا بالالار مەن جاسوسپىرىمدەرگە ارنالعان سپورت مەكتەبى اشىلعان.
اقمولا وبلىسىندا ارناۋلى مەملەكەتتىك قوردىڭ قاراجاتىنا بارلىعى 42 الەۋمەتتىك نىسان, ونىڭ ىشىندە 14 دەنساۋلىق ساقتاۋ مەكەمەسى, 26 سۋمەن جابدىقتاۋ نىسانى جانە 2 سپورت مەكەمەسىنىڭ قۇرىلىسى جوسپارلانعان.