ەلوردادا اۋا رايىنىڭ كۇرت ناشارلاۋى بايقالۋدا, اياز بۋىپ, بوران سوعادى جانە جەل كۇشەيەدى دەپ بولجايدى ماماندار. باس شتاتتان تىس تراۆماتولوگ, باسقارما مامانى الەكسەي سولود قالا تۇرعىندارىن قاۋىپسىزدىك شارالارىن ساقتاۋعا جانە كوشەدە ساق بولۋعا شاقىرادى, دەپ حابارلايدى Egemen.kz.
ماماننىڭ ايتۋىنشا, ەڭ الدىمەن اياق كيىم تاڭداۋعا ەرەكشە كوڭىل ءبولۋ قاجەت. كوكتايعاق كەزىندە بيىك وكشەلى اياق كيىمنەن باس تارتىپ, تابانى كەدىر-بۇدىر, تايمايتىن اياق كيىم كيگەن ءجون.
سونداي-اق ۇيدەن شىعۋ ۋاقىتىن الدىن الا جوسپارلاپ, اسىقپاي قوزعالۋ ماڭىزدى. قىسقا قادام جاساپ ءجۇرۋ, قولدى قالتاعا سالماۋ جانە مۇمكىندىگىنشە اۋىر سومكەلەردى ۇستاماۋ تەپە-تەڭدىكتى ساقتاۋعا كومەكتەسەدى.
قارت ادامدارعا رەزەڭكە نەمەسە تەمىر ۇشى بار تاياق قولدانۋ ۇسىنىلادى. قوسىمشا تىرەك رەتىندە شاڭعى تاياعىن پايدالانۋعا دا بولادى.
مۇز قاتقان جانە جارىقتاندىرىلماعان جول ۋچاسكەلەرىنەن اۋلاق بولعان دۇرىس. ەگەر قۇلاۋدىڭ الدىن الۋ مۇمكىن بولماسا, دەنەنى جيناقتاپ, تىزەنى ءسال بۇگىپ, ارقامەن ەمەس, جانىمەن قۇلاۋ اۋىر جاراقاتتاردىڭ الدىن الۋعا كومەكتەسەدى.
قۇلاعاننان كەيىن بىردەن تۇرۋعا اسىقپاعان ءجون. ەگەر باس اينالۋ نەمەسە قاتتى اۋىرسىنۋ سەزىلسە, اينالاداعى ادامداردان كومەك سۇراۋ قاجەت.
اۋىر جاراقات العان جاعدايدا مىندەتتى تۇردە مەديتسينالىق ۇيىمعا جۇگىنىپ, بىلىكتى مەديتسينالىق كومەك الۋ كەرەك.
مەديتسينا قىزمەتكەرلەرى اتا-انالارعا بالالارعا قىس مەزگىلىندە كوشەدە قاۋىپسىز ءجۇرىپ-تۇرۋ ەرەجەلەرىن ۇنەمى ەسكەرتىپ وتىرۋ قاجەتتىگىن دە ەسكە سالادى.