بيىل ماڭعىستاۋ وبلىسىنىڭ اقپارات جانە قوعامدىق دامۋ باسقارماسىنىڭ مەملەكەتتىك الەۋمەتتىك تاپسىرىسى اياسىندا 16 الەۋمەتتىك جوبا جۇزەگە اسىرىلدى. بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە وڭىرلىك اقپارات جانە قوعامدىق دامۋ باسقارماسىنىڭ باسشىسى گۇلميرا بالعوجاەۆا ايتتى, دەپ حابارلايدى Egemen.kz.
سپيكەردىڭ ايتۋىنشا, جۇزەگە اسقان جوبالار قوعامنىڭ الەۋمەتتىك جانە ازاماتتىق دامۋىنا باعىتتالعان. اتاپ ايتقاندا, مەملەكەتتىك قىزمەتكەرلەرگە ارنالعان «ادال قوعام» Quiz سايىسى, قوعام قايراتكەرلەرىنىڭ مۇراسىن تانىتۋعا باعىتتالعان جوبالار, سونداي-اق مەملەكەتتىك رامىزدەردى ناسيتحاتتاۋعا «Qazaq Pride», ءباسپاسوز حاتشىلارىنا ارنالعان «Content Hub» جوباسى, «قوعام دەرتى» جوبالارى, سونىمەن قاتار ايەلدەر كوشباسشىلىعىن دامىتۋعا ارنالعان «Umay» باعدارلاماسى, قوعامدىق كەڭەس مۇشەلەرى مەن ازاماتتىق سەكتور وكىلدەرىنە ارنالعان «كوشباسشىلار كەرۋەنى», وتباسى قۇندىلىقتارىن دارىپتەۋگە باعىتتالعان «وتباسى مەكەنى – ەل بولاشاعى», سونداي-اق, ءباسپاسوز حاتشىلارىنا ارنالعان «قىراعى كوز» جانە جۇمىسشى ماماندىقتار جىلى اياسىنداعى ءىس-شارالار وتكىزىلدى. سونىمەن قاتار, «تازا قازاقستان» ەكولوگيالىق اكتسياسى اياسىندا 45 كۇندىك “تازا ماڭعىستاۋ” ەكولوگيالىق چەللەندج بەن باق قىزمەتكەرلەرىنىڭ كاسىبي الەۋەتىن ارتتىرۋ شارالارى ۇيىمداستىرىلدى.
– اتالعان جانە وزگە دە جوبالار قوعامدىق دامۋ سالاسىنىڭ ماڭىزدى باعىتتارىن قامتىپ, وڭىرلىك باستامالاردىڭ ساپالى ورىندالۋىمەن ەرەكشەلەندى. سونداي-اق, ۇيىمداستىرىلعان جوبالار مازمۇندىق تەرەڭدىگىمەن, قوعامدىق ماڭىزدىلىعىمەن دارالانىپ, ءتيىستى دەڭگەيدە ءوتىپ جاتىر, – دەدى گۇلميرا بالعوجاەۆا.
بريفينگ بارىسىندا سپيكەر ماڭعىستاۋ وبلىسىندا 26 ەتنومادەني بىرلەستىك جۇمىس ىستەيتىنىن اتاپ ءوتتى. ولار قازاقستان حالقى اسسامبلەياسى ينستيتۋتىنىڭ قوعامدىق قۇرىلىمدارىنىڭ قىزمەتىن نىعايتۋ جانە دامىتۋ ماقساتىندا 13 باعىت بويىنشا ارنايى قوعامدىق جوبالاردى جۇزەگە اسىرىپ جاتىر
– قازاقستان حالقى اسسامبلەياسىنىڭ 13 قوعامدىق جوبالارى بويىنشا 150-گە جۋىق ءىس-شارا ۇيىمداستىرىلىپ, 10 مىڭنان استام ادام قامتىلدى. سونداي-اق, قازاقستان حالقى اسسامبلەياسىنىڭ نەگىزگى بولىگىنىڭ ءبىرى - ەتنومەدياتسيا. وبلىستىق ەتنومەدياتسيا كەڭەسى وڭىردەگى قوعامدىق كەلىسىمدى نىعايتۋ, ەتنوس ارالىق قاتىناستاردا تۋىندايتىن ماسەلەلەردىڭ الدىن الۋ جانە مەدياتسيا مادەنيەتىن دامىتۋ باعىتىندا جۇيەلى جۇمىستار اتقاردى. جىلدىق جۇمىس جوسپارى بەكىتىلىپ, ءار ايعا ارنالعان جوسپار نەگىزىندە 40-قا جۋىق ءىس-شارا وتكىزىلىپ, بارلىعى 1674 ادام قامتىلدى, – دەدى گۇلميرا بالعوجاەۆا.
ايتا كەتەيىك, مەملەكەتتىك اقپاراتتىق تاپسىرىس اياسىندا ءوڭىردىڭ الەۋمەتتىك-ەكونوميكالىق ءيميدجىن دامىتۋ باعىتىندا اقپاراتتىق جۇمىستار جۇرگىزىلۋدە. جىل باسىنان بەرى ءارتۇرلى باعىتتا 25 مەديا-جوسپار ازىرلەندى.
ماڭعىستاۋ وبلىسى