قوناەۆ قالاسىندا حالىقارالىق مۇگەدەكتەر كۇنىنە وراي دويبى مەن توعىزقۇمالاقتان وبلىستىق تۋرنير ءوتتى. جارىسقا الماتى وبلىسىنىڭ 8 وڭىرىنەن تىرەك-قيمىل اپپاراتى بۇزىلعان, كورۋ قابىلەتى تومەن سپورتشىلار قاتىستى. تۋرنير ەكى جاس ساناتى بويىنشا جاستار جانە ەرەسەكتەر اراسىندا ۇيىمداستىرىلدى.
ۇيىمداستىرۋشىلار مۇنداي ءىس-شارالار داستۇرگە اينالىپ, ەرەكشە قاجەتتىلىكتەرى بار ادامدار اراسىندا ۇلتتىق, ينتەللەكتۋالدى سپورت تۇرلەرىن ودان ءارى دامىتۋعا ىقپال ەتەتىنىنە سەنىم ءبىلدىردى.
– ءبىزدىڭ مىندەتىمىز – مۇگەدەكتىگىنە قاراماستان بارلىق سپورتشىعا تەڭ مۇمكىندىك جاساۋ. مۇنداي جارىستار قاتىسۋشىلاردىڭ وزىنە دەگەن سەنىمىن نىعايتادى, بويىندا تالپىنىس تۋدىرادى, الەۋەتىن اشۋعا كومەكتەسەدى, – دەدى الماتى وبلىسىنىڭ مۇمكىندىگى شەكتەۋلى جاندارعا ارنالعان درس ديرەكتورى نۇرداۋلەت كۇلسەيىتوۆ.
مامانداردىڭ ايتۋىنشا, دويبى مەن توعىزقۇمالاققا ەرەكشە قاجەتتىلىكتەرى بار سپورتشىلاردىڭ قىزىعۋشىلىعى جىل سايىن ارتىپ كەلەدى.
– ءبىز جىل سايىن قاتىسۋشىلاردىڭ قاتارى كوبەيىپ, تەحنيكالىق تۇرعىدا دامىپ كەلە جاتقانىن, ەڭ باستىسى, وزدەرىنە دەگەن سەنىمنىڭ ارتقانىن بايقايمىز. مۇنداي تۋرنيرلەر ولارعا سپورت رۋحىن سەزىنۋگە, جارىس اتموسفەراسىن باستان وتكەرۋگە مۇمكىندىك بەرەدى, بۇل جەكە دامۋ تۇرعىسىندا وتە ماڭىزدى. سپورتتىق تاجىريبەسى ءارتۇرلى بولسا دا, بارلىق قاتىسۋشى لايىقتى ناتيجە كورسەتىپ, جەڭىسكە دەگەن جىگەر تانىتتى, – دەدى جارىستىڭ باس تورەشىسى تاجىعالي حودجامۇراتوۆ.
سايىسقا قاتىسۋشىلار جوعارى دايىندىق دەڭگەيىن, شەبەرلىك پەن ستراتەگيالىق ويلاۋدى كورسەتتى. دويبىدا ويىنشىلار دالدىك, شاپشاڭدىق, ۇتقىرلىق جاعىنان باق سىناسا, توعىزقۇمالاقتا كومبيناتسيالاردى ەسەپتەۋ, كۇردەلى ويىن جاعدايلارىن باسقارۋ قابىلەتتەرىن كورسەتە ءبىلدى.
– بيىل تامىز ايىندا موڭعوليادا وتكەن توعىزقۇمالاقتان الەم چەمپيوناتىندا سپودا ساناتىندا جۇلدەلى ورىن الدىم. مۇنداي جەتىستىككە جەتكەنىمە وتە قۋانىشتىمىن. مەن ءۇشىن ءار جارىس – ءوزىمدى كورسەتۋگە بەرىلگەن مۇمكىندىك. ءتۋرنيردىڭ ۇيىمداستىرۋشىلارىنا قولداۋ كورسەتكەنى, تەڭ دارەجەدە جارىسۋ-عا جاعداي جاساعانى ءۇشىن العىس بىلدىرەمىن. توعىزقۇمالاقتا جاس شەكتەۋى جوق. قاتىسۋشىلاردىڭ كوپشىلىگى 40–50, ودان جوعارى جاس شاماسىنداعى ادامدار. سىرت كوزگە تاستاردى ۇياشىقتارعا سالۋ وڭاي كورىنۋى مۇمكىن. الايدا بۇل ويىندا جوعارى ماتەماتيكانىڭ نەگىزدەرى جاتىر. ول تەك ەسەپتىڭ جىلدامدىعىنا ەمەس, تاكتيكاعا دا نەگىزدەلەدى. بۇل ويىندى بەكەردەن-بەكەر قازاق شاحماتى دەپ اتامايدى. الداعى ۋاقىتتا جاستار دا كوپتەپ قاتىسسا, نۇر ۇستىنە بولار ەدى. مۇنداي ءىس-شارالار ءجيى ۇيىمداستىرىلسا ەكەن, – دەدى توعىزقۇمالاقتان الەمنىڭ كۇمىس جۇلدەگەرى, سپورت شەبەرى ءجاميلا مامبەەۆا.
دويبى سپورتىندا جارىسقا الەم, ازيا چەمپيوندارى مەن جۇلدەگەرلەرى نيشان پەرنەباەۆ پەن ەرمەكقالي ورازاليەۆ قاتىستى.
سايىس قورىتىندىسىندا كوماندالىق ەسەپتە ەڭ كوپ مەدال العان قاراساي, ەڭبەكشىقازاق, كەگەن اۋداندارىنان كەلگەن مۇمكىندىگى شەكتەۋلى سپورتشىلار بولدى. جۇلدەگەرلەر ارنايى ديپلومدارمەن, مەدالدارمەن, ەستەلىك سىيلىقتارمەن ماراپاتتالدى.
الماتى وبلىسى