قازاقستاندا 2026 جىلى جول ءجۇرىسى ەرەجەلەرىن بۇزعانى ءۇشىن سالىناتىن ايىپپۇلدار وسەدى. بۇل اەك مولشەرىنىڭ ۇلعايۋىمەن تىكەلەي بايلانىستى, دەپ حابارلايدى Egemen.kz.
پرەزيدەنت قاسىم-جومارت توقاەۆ قول قويعان رەسپۋبليكالىق ۇشجىلدىق بيۋدجەتكە سايكەس, 2026 جىلى ءبىر اەك 4 325 تەڭگە بولىپ بەكىتىلدى. بۇل 2025 جىلمەن سالىستىرعاندا 393 تەڭگەگە كوپ. وسىلايشا, پوليتسيا دەپارتامەنتتەرى قولداناتىن بارلىق ايىپپۇل سانكتسيالارى دا اۆتوماتتى تۇردە قىمباتتايدى.
جىلدامدىقتى ارتتىرعانى ءۇشىن ايىپپۇل مولشەرى تومەندەگىدەي بولادى:
– 10-20 كم/ساع ارالىعىندا اسىرۋ – 5 اەك (21 625 تەڭگە); – 20-40 كم/ساع – 10 اەك (43 250 تەڭگە); – 40-60 كم/ساع – 20 اەك (86 500 تەڭگە); – 60 كم/ساع جانە ودان جوعارى – 40 اەك (173 000 تەڭگە).
5 اەك كولەمىندەگى (21 625 تەڭگە) ايىپپۇل مىنا جاعدايلاردا سالىنادى:
– جۇرگىزۋشى كۋالىگىنىڭ نەمەسە ساقتاندىرۋ ءپوليسىنىڭ بولماۋى; – جولاۋشىلار مەن جۇكتەردى تاسىمالداۋ تالاپتارىن بۇزۋ; – قاۋىپسىزدىك بەلدىگىن تاقپاۋ; – رۇقساتسىز تەلەفون پايدالانۋ; – الدىڭعى اينەكتەردى زاڭسىز قارايتۋ; – تەحنيكالىق بايقاۋدان وتپەگەن كولىكتى باسقارۋ.
10 مرپ (43 250 تەڭگە) ايىپپۇل كوزدەلەدى:
– مەملەكەتتىك تىركەۋ ءنومىرىنسىز كولىك جۇرگىزۋ; – توقتاۋ نەمەسە اۆتوتۇراق ەرەجەلەرىن بۇزۋ; – تىيىم سالىنعان جەردە كەرى ءجۇرۋ; – باعدارشامنىڭ قىزىل تۇسىنە نەمەسە رەتتەۋشىنىڭ تىيىم سالۋىنا باعىنباۋ; – تەمىرجول وتكەلىنەن تىيىم سالىنعان جاعدايدا ءوتۋ.
15 اەك (64 875 تەڭگە) ايىپپۇل سالىنادى:
– جول بەرۋ مىندەتىن ورىنداماۋ; – تروتۋارمەن, جاياۋ جۇرگىنشىلەر جولىمەن نەمەسە شەتكى بولىكپەن ءجۇرۋ; – تەجەگىش, رۋل, تىركەمەلىك قۇرىلعىسى اقاۋلى كولىكتى باسقارۋ; – ارنايى رۇقساتسىز قايتا جابدىقتالعان كولىكتى جۇرگىزۋ.
بۇدان دا جوعارى ايىپپۇلدار:
– جول-كولىك وقيعاسىنا اكەلگەن جول قاۋىپسىزدىگى تالاپتارىن بۇزۋ – 20 اەك (86 500 تەڭگە); – پوليتسيا قىزمەتكەرىنىڭ توقتاۋ تالابىن ورىنداماۋ – 30 اەك (129 750 تەڭگە); – جالعان نەمەسە قولدان جاسالعان نومىرلەرمەن كولىك جۇرگىزۋ – 20 اەك (86 500 تەڭگە); – جول-كولىك وقيعاسى بولعان جەردەن كەتىپ قالۋ – 50 مرپ (216 250 تەڭگە).
2026 جىلعى ايىپپۇلداردىڭ ءوسۋى اەك كورسەتكىشىنىڭ وزگەرۋىنە سايكەس بارلىق قۇقىقبۇزۋشىلىقتارعا قاتىستى سانكتسيالاردىڭ قايتا ەسەپتەلەتىنىن بىلدىرەدى.