اتىراۋ وبلىسىندا «Karabatan Utility Solutions» جشس ەكولوگيالىق رۇقساتسىز اعىندى سۋدى توككەن. سونىڭ سالدارىنان جەر لاستانعان, دەپ حابارلايدى Egemen.kz.
ەكولوگيالىق رەتتەۋ جانە باقىلاۋ كوميتەتىنىڭ اقپاراتىنا قاراعاندا, وبلىستىق ەكولوگيا دەپارتامەنتى اتالعان كومپانياعا جوسپاردان تىس تەكسەرۋ جۇرگىزدى.
«دەپارتامەنت تەكسەرۋدەن كەيىن قورشاعان ورتا كومپونەنتتەرىن قالپىنا كەلتىرۋ شارالارىن جۇرگىزۋ تۋرالى بۇيرىق شىعاردى. ال سەرىكتەستىككە ەكولوگيالىق تالاپتاردى بۇزعانى ءۇشىن 26,5 ميلليون تەڭگە ايىپپۇل سالىندى. ايىپپۇل تولىق كولەمدە ءوندىرىلدى», دەپ حابارلادى كوميتەتتىڭ ءباسپاسوز قىزمەتى.
كومپانيا قالپىنا كەلتىرۋ باعدارلاماسىن ازىرلەپ, بەكىتتى. قازىر قالپىنا كەلتىرۋ جۇمىسى اياقتالعان.
«لاستانعان ۋچاسكە تازارتىلدى. قورشاعان ورتا كومپونەنتتەرى قالپىنا كەلتىرىلدى. بۇل سايكەستىك تۋرالى ەسەپتەرمەن راستالدى. ەكولوگيا جانە تابيعي رەسۋرستار مينيسترلىگى قورشاعان ورتانى قورعاۋ زاڭناماسىنىڭ ساقتالۋىن قامتاماسىز ەتۋ, قورشاعان ورتاعا كەلتىرىلگەن زالالدى جويۋ بويىنشا ءتيىمدى شارالاردى قابىلداۋدى جۇيەلى جالعاستىرادى», دەپ مالىمدەدى كوميتەتتەن.