پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ءوزىنىڭ Facebook پاراقشاسىندا ەل تاريحىندا تۇڭعىش رەت «گرەممي» جۇلدەسىن العان مۋزىكانت يمانبەك زەيكەنوۆ «قۇرمەت» وردەنىمەن ماراپاتتالعانىن جازدى, دەپ حابارلايدى Egemen.kz.
بۇل ماراپات مەملەكەت باسشىسىنىڭ جارلىعىمەن رەسپۋبليكا كۇنىنە وراي ەلدىڭ ەكونوميكالىق جانە قوعامدىق ءومىرىنىڭ ءتۇرلى سالالارىن دامىتۋعا ەلەۋلى ۇلەس قوسقان بىرقاتار ازاماتقا بەرىلدى.
ايتا كەتەيىك, كەيبىر ازاماتتار ماراپات تابىستالار ساتتە ەل اۋماعىندا بولماعاننان كەيىن, ناگرادالارىن ۋاقىتىلى الا المادى.
– «قۇرمەت» وردەنىمەن كونفەسسياارالىق جانە دىنارالىق ديالوگتىڭ حالىقارالىق ورتالىعى جانىنداعى سەزدىڭ باستامالارىن ىسكە اسىرۋ دەپارتامەنتىنىڭ بۇرىنعى باسشىسى قارلىعاش قاليلاحانوۆا جانە «گرەممي» جۇلدەسىن العان تۇڭعىش قازاقستاندىق مۋزىكانت يمانبەك زەيكەنوۆ ماراپاتتالدى, – دەدى مينيستر.
بۇعان دەيىن اكتەر, كاسكاديور جانە كاسىبي ارالاس جەكپە-جەك شەبەرى ەركەبۇلان توقتاردىڭ «قازاقستاننىڭ ەڭبەك سىڭىرگەن قايراتكەرى» اتاعىنا يە بولعانىن جازعان ەدىك.