اقشي اۋىلىنا سۋ بەرىلدى

اۋىلعا ورتالىقتاندىرىلعان سۋ جۇيەسى ارقىلى اۋىزسۋ قايتا بەرىلدى. بۇل جاعداي «بوزوي توپتىق سۋ قۇبىرى» جۇيەسىندە بولعان اپاتتان كەيىن تۋىنداعان ەدى. 6 قاراشادا ۇزىندىعى 72 شاقىرىمدى قۇرايتىن نەگىزگى ماگيسترالدى قۇبىردا اقاۋ ورىن الىپ, اقساي اۋىلدىق وكرۋگى مەن جاقىن ورنالاسقان قوناەۆ قالاسىنان سۋ تاسىمالداۋ ۇيىمداستىرىلعان. تۇرعىندار شامامەن ءبىر اي بويى تەك تاسىمالدانعان سۋدى پايدالانۋعا ءماجبۇر بولدى.

اپاتتان كەيىن الماتى وبلىسىنىڭ اكىمى مارات سۇلتانعازيەۆ اپپاراتتىق كەڭەس وتكىزىپ, ماسەلەنى جەدەل شەشۋ ءۇشىن رەزەرۆتىك قارجى بولگىزدى. ناتيجەسىندە ۇزىندىعى 2,6 شاقىرىمعا سوزىلعان ەسكىرگەن قۇبىردى اۋىستىرۋ جۇمىستارىنا 137 ميلليون تەڭگە باعىتتالدى.

جەدەل جۇرگىزىلگەن كۇردەلى جوندەۋ جۇمىستارىنىڭ ارقاسىندا بۇگىن اقشي اۋىلىنا قايتادان تازا اۋىزسۋ بەرىلدى.

اۋىل حالقى بىرنەشە اپتا بويى باستان وتكەرگەن قيىندىقتاردىڭ ارتتا قالعانىنا ريزا.

«وتە قيىن بولدى. وبلىس اكىمىنىڭ تىكەلەي تاپسىرماسىمەن رەزەرۆتەن قارجى ءبولىنىپ, ەكى شاقىرىمنان استام ابدەن ەسكىرگەن قۇبىر تەز ارادا اۋىستىرىلدى. سونىڭ ارقاسىندا اۋىلىمىزعا قايتادان اۋىزسۋ بەرىلە باستادى», دەيدى اۋىل تۇرعىنى دينورا سافاروۆا.

ال تاعى ءبىر تۇرعىن قۇرالاي امانتاەۆا ورتالىقتاندىرىلعان سۋ جۇيەسىنىڭ قايتا قوسىلۋىن ۇلكەن قۋانىشپەن قابىلداعانىن ايتادى.

«بۇگىن اۋىلىمىزعا ءتاتتى سۋ قايتا كەلىپ جاتىر. قۋانىشىمىزدا شەك جوق. وسى ىسكە سەبەپكەر بولعان ازاماتتارعا العىسىمىز شەكسىز», دەدى ول.

سانەپيدەميولوگيالىق قىزمەت ماماندارى اۋىلداعى بىرنەشە ۇيدەن سۋ سىناماسىن الىپ, زەرتحاناعا جولدادى. قورىتىندىسى 2–3 كۇن ىشىندە بەلگىلى بولادى.

سۋ بەرۋ تولىق قالپىنا كەلگەنىمەن, ساقتىق ماقساتىندا ارنايى كولىكتەرمەن تاسىمالداناتىن اۋىزسۋ قىزمەتى ازىرگە جالعاسا بەرەدى.

«بوزوي توپتىق سۋ قۇبىرى» مەكەمەسىنىڭ باسشىسى نۇريسلام سايلاۋباەۆتىڭ ايتۋىنشا, قازىرگى جاعدايدا سۋ قىسىمى تۇراقتى, ناسوس ستانتسيالارى شتاتتىق رەجيمدە جۇمىس ىستەپ تۇر. الايدا بولاشاقتا وسىنداي جاعدايدىڭ قايتالانباۋى ءۇشىن ماگيسترالدىڭ تولىق جاڭارتىلۋى قاجەت.

«بۇل قۇبىردىڭ 72 شاقىرىمىن تولىق اۋىستىرۋ كەرەك. سوندا مۇنداي پروبلەمالار بولمايدى. قازىرگى سۋ قىسىمى جاقسى, اقشيگە سۋ بىرقالىپتى كەلىپ تۇر», دەدى مەكەمە باسشىسى.

وتكەن جىلى اقشي اۋىلىندا جاڭا اۋىزسۋ جۇيەسىن تارتۋ جوباسى ازىرلەنگەن. مامانداردىڭ ەسەبى بويىنشا, ونىڭ جالپى قۇنى 7 ملرد 400 ملن تەڭگەنى قۇرايدى. قاجەتتى قارجى بولىنسە, اۋىلداعى اۋىزسۋ ماسەلەسى تولىق شەشىمىن تاباتىن بولادى.

الماتى وبلىسى.