بيزنەستى مەملەكەتتىك قولداۋ شارالارىنىڭ تيىمدىلىگىن ارتتىرۋ ماڭىزدى بولىپ وتىر. بۇل تۋرالى مەملەكەت باسشىسى قاسىم-جومارت توقاەۆ رەسپۋبليكالىق كورمە-كونكۋرسىنىڭ جەڭىمپازدارىن ماراپاتتاۋ راسىمىندە ايتتى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
ق.توقاەۆ ءوز سوزىندە ەكسپورت نارىعىندا باسەكەگە تۇسە الاتىن, وتاندىق شيكىزاتتى پايدالاناتىن, سونداي-اق وزىق تەحنولوگيالار مەن يننوۆاتسيالار ترانسفەرىمەن اينالىساتىن كاسىپورىندارعا باسىمدىق بەرىلۋگە ءتيىس ەكەنىن اتاپ ءوتتى.
«بيىل «بايتەرەك» حولدينگى ارقىلى شاعىن جانە ورتا بيزنەستى قولداۋ كولەمى شامامەن ەكى تريلليون تەڭگەگە جەتتى. تىكەلەي سۋبسيديالاۋدان گورى كەپىلدىك بەرۋ قۇرالدارىنا كوشتىك. وسى ماقساتتا مەنىڭ تاپسىرماممەن «دامۋ» قورى جانىنان شاعىن جانە ورتا بيزنەسكە, سونداي-اق ءىرى ينۆەستيتسيالىق جوبالارعا ارنالعان ەكى كەپىلدىك قورى قۇرىلدى. اتالعان باعىت اياسىندا 2229 جوباعا جالپى سوماسى 400 ميلليارد تەڭگەدەن استام كرەديت بەرىلدى. ونىڭ ىشىندە 220 ميلليارد تەڭگەدەن استامى مەملەكەتتىك كەپىلدىكپەن قامتاماسىز ەتىلدى», دەدى قاسىم-جومارت توقاەۆ.