مەملەكەت باسشىسىنىڭ تاپسىرماسىنا سايكەس مۇعالىمدەر مەن وقۋشىلاردىڭ قارجىلىق ساۋاتتىلىعىن ارتتىرۋ ماقساتىندا كەشەندى جۇمىس جالعاسىپ كەلەدى. وقۋ-اعارتۋ مينيسترلىگىنىڭ «ورلەۋ» بىلىكتىلىكتى ارتتىرۋ ۇلتتىق ورتالىعى مەن ۇلتتىق بانك بىرلەسىپ, بالالاردى اقشانى دۇرىس يگەرۋگە باۋليتىن انيماتسيالىق فيلم ازىرلەدى, دەپ حابارلايدى Egemen.kz.
«قارجى الەمى» – 12 بولىمنەن تۇراتىن, ورمانداعى شاعىن قالادا ءومىر سۇرەتىن مەكتەپ وقۋشىلارى تۋرالى مۋلتسەريال. ءار بولىمدە بارىس, ارقار, قۇلان, سىلەۋسىن, ءتيىن, دالا تىشقانى جانە كىرپى سەكىلدى كەيىپكەرلەر تاپ بولاتىن قارجىلىق جاعداياتتار باياندالادى. اقشانى ۇتىمدى پايدالانۋ, جيناقتاۋ, جوسپارلاۋ, ەڭبەك, ينفلياتسيا جانە ينۆەستيتسيا سياقتى ۇعىمدار قاراپايىم ءارى تۇسىنىكتى تۇردە تۇسىندىرىلەدى. سونىمەن قاتار, كەيىپكەرلەردىڭ وقيعالارى ارقىلى قارجىلىق الاياقتىق پەن قارجى پيراميدالارى ماسەلەلەرى كوتەرىلەدى جانە ولاردان قورعانۋ جولدارى كورسەتىلەدى.
«مۋلتسەريالدىڭ باستى ەرەكشەلىگى – كۇردەلى ەكونوميكالىق ۇعىمداردى قاراپايىم مەتافورالار ارقىلى بالالارعا تۇسىنىكتى تىلمەن جەتكىزۋ. ءار ءبولىم بالالارعا تۇسىنىكتى تىلدە جازىلعان, شىنايى ومىرگە جاقىن جانە بالاعا اقشانى دۇرىس جاراتۋدىڭ نەگىزدەرىن قالىپتاستىرۋعا ىقپال ەتەدى. مۋلتسەريال ماتەريالدارىن وقۋ ۇردىسىندە قولدانۋعا بولادى», دەدى «ورلەۋ» باسقارما توراعاسىنىڭ ورىنباسارى مارات تۇراشەۆ.
ايتا كەتەيىك, بيىلدان باستاپ «ورلەۋ» ۇلتتىق بانكپەن بىرلەسىپ پەداگوگتەردىڭ قارجىلىق ساۋاتتىلىعىن ارتتىرۋعا ارنالعان كۋرستار ۇيىمداستىرۋعا كىرىستى.