ءماجىلىس مەملەكەت باسشىسىنىڭ تاپسىرماسى بويىنشا ازىرلەنگەن «قۇقىقبۇزۋشىلىق پروفيلاكتيكاسى تۋرالى» جاڭا زاڭدى ەكىنشى وقىلىمدا قابىلدادى. زاڭدا قۇقىقبۇزۋشىلىق پروفيلاكتيكاسى جۇيەسى كەڭەيتىلىپ, پروفيلاكتيكا سۋبەكتىلەرىنىڭ سانى 13-تەن 26-عا دەيىن ارتادى, دەپ جازادى Egemen.kz.
وعان وتباسىن قولداۋ ورتالىقتارى, ءموبيلدى توپتار, قامقورشىلىق ورگاندارى, باق, جاستار ءىسى جونىندەگى ورتالىقتار, ۋاكىلەتتى ورگاندار جانە كاسىپكەرلەر كىرەدى.
ءماجىلىستىڭ ءباسپاسوز قىزمەتى پروفيلاكتيكا مودەلىنىڭ ءوزى قايتا قارالاتىنىن مالىمدەدى. ەندى وعان جالپى, جەكە جانە ارنايى شارالار ەنگىزىلەدى.
اكىمشىلىك قۇقىقبۇزۋشىلىق تۋرالى كودەكسكە ەنگىزىلگەن تۇزەتۋلەردە قوعامدىق ورىنداردا بەتتى جاۋىپ تۇراتىن, بەت الپەتىن تانۋعا كەدەرگى كەلتىرەتىن كيىم (نيقاب) كيگەنى ءۇشىن اكىمشىلىك جازا قاراستىرىلعان.
وسى سيپاتتاعى قۇقىقبۇزۋشىلىق ءبىرىنشى رەت جاسالسا ەسكەرتۋ بەرىلىپ, قايتالانعان جاعدايدا 10 اەك كولەمىندە ايىپپۇل سالىنادى. زاڭعا قايشى كونتەنتتى جاريالاعاندار مەن تاراتقاندارعا, سونداي-اق مەملەكەتتىك ورگانداردىڭ بۇزۋشىلىقتاردىڭ سەبەبىن جويۋ تۋرالى نۇسقاۋلارىن قاساقانا ورىنداماعاندارعا قاتىستى دا جاۋاپكەرشىلىك ەنگىزىلەدى.
سونداي-اق تابيعي جانە تەحنوگەندىك توتەنشە جاعدايلاردىڭ الدىن الۋ بويىنشا ازاماتتىق قورعانىس شارالارىن ورىنداماعانى ءۇشىن مەملەكەتتىك لاۋازىمدى تۇلعالار مەن جەرگىلىكتى بيلىك ورگاندارىنا جاڭا جاۋاپكەرشىلىك جۇكتەيتىن تۇزەتۋلەر ەنگىزىلدى. ەندى توتەنشە جاعدايلار مينيسترلىگى مۇنداي ادامداردى جاۋاپكەرشىلىككە تارتۋعا قۇقىلى.