اتىراۋ وبلىسىندا ينتەرنەتكە قوسىلعان ەلدى مەكەندەر سانى 146-عا جەتتى. ال 5G تەحنولوگياسىمەن ينتەرنەتكە قولجەتىمدىلىكتى قامتاماسىز ەتەتىن 133 بازالىق ستانتسيا جۇمىس ىستەپ تۇر, دەپ حابارلايدى Egemen.kz.
وبلىستىق تسيفرلاندىرۋ جانە ارحيۆتەر باسقارماسىنىڭ باس مامانى راۋان رىسقاليەۆتىڭ ايتۋىنشا, بىلتىر ينتەرنەت 132 ەلدى مەكەندە عانا بولعان.
«بيىل مەملەكەتتىك باسقارۋدى تسيفرلاندىرۋ جانە IT-جوبالاردى دامىتۋ اياسىندا «Jusan Mobile» اق-مەن بىرگە شالعايداعى ەلدى مەكەندەردى جوعارى جىلدامدىقتى ينتەرنەتپەن قامتۋ قولعا الىندى. وسى ماقساتتا «OneWeb» سپۋتنيكتىك تەحنولوگياسى ەنگىزىلدى. بيىل يساتاي, قۇرمانعازى, يندەر, قىزىلقوعا, جىلىوي جانە ماحامبەت اۋدانىنداعى 14 اۋىل سپۋتنيكتىك ينتەرنەتكە قوسىلدى», دەيدى راۋان رىسقاليەۆ.
ونىڭ دەرەگىنە قاراعاندا, وبلىستا 5G تەحنولوگياسىمەن ينتەرنەتكە قولجەتىمدىلىكتى قامتاماسىز ەتەتىن 133 بازالىق ستانتسيا بار. ونىڭ ىشىندە 110 ستانتسيا اتىراۋ قالاسىندا ورنالاسقان. ال جىلىوي اۋدانىندا 20, «تەڭىز» ۆاحتالىق كەنتىندە 3 ستانتسيا ورناتىلعان.
«جىلدامدىعى جوعارى ينتەرنەتتىڭ قوسىلۋى اۋىل تۇرعىندارىنا ءبىلىم بەرۋ, مەديتسينا سالالارىندا ساپالى قىزمەت كورسەتۋگە جول اشتى. قاشىقتان جۇمىس ىستەۋگە, مادەني ءىس-شارالاردى ۇيىمداستىرۋعا, كاسىپكەرلىكپەن اينالىسۋعا مۇمكىندىك بەردى», دەپ ءمالىم ەتتى راۋان رىسقاليەۆ.