اقتوبەلىك وقۋشى ىشكى ىستەر مينيسترلىگى ۇيىمداستىرعان ينتەرنەت الاياقتىقتىڭ الدىن الۋ تاقىرىبىنداعى رەسپۋبليكالىق بەينەبايقاۋدا ءبىرىنشى ورىن يەلەندى, دەپ جازادى Egemen.kz.
ىشكى ىستەر مينيسترلىگى «زاڭ جانە ءتارتىپ» يدەولوگەماسى اياسىندا تسيفرلىق ساۋاتتىلىقتى ارتتىرۋعا, بالالار مەن اتا-انالارعا ينتەرنەتتە قاۋىپسىز ءجۇرىس-تۇرىس داعدىلارىن قالىپتاستىرۋعا باعىتتالعان كەڭ اۋقىمدى بايقاۋ وتكىزدى. قاتىسۋشىلارعا ينتەرنەت الاياقتارىنان قورعانۋ تاقىرىبىن اشاتىن, ونلاين كەڭىستىكتە ساقتىق پەن زەيىننىڭ ماڭىزىن كورسەتەتىن بەينەروليك دايىنداۋ ۇسىنىلدى.
ەلدىڭ تۇكپىر-تۇكپىرىنەن كەلگەن ونداعان قاتىسۋشىلاردىڭ ىشىندە №61 ورتا مەكتەپتىڭ 2-سىنىپ وقۋشىسى — مەرەيلىم بەركىننىڭ جۇمىسى ۇزدىك دەپ تانىلدى. جاس قاتىسۋشى اتا-اناسىمەن بىرگە زاماناۋي كيبەرقاۋىپتەر تۋرالى جانە ولاردان قورعانۋدىڭ ءتيىمدى جولدارى جونىندە قاراپايىم ءارى تۇسىنىكتى تۇردە جەتكىزىپ, قازىلار القاسىنىڭ جوعارى باعاسىن الدى.
وبلىستىق پوليتسيا دەپارتامەنتىنىڭ باستىعى اباي جۋسۋپوۆ مەرەيلىمدى جەڭىسىمەن جەكە قۇتتىقتاپ, قر ىشكى ىستەر ءمينيسترى ەرجان سادەنوۆتىڭ اتىنان وعان ماقتاۋ قاعازى مەن باعالى سىيلىق تابىستادى. ول مۇنداي باستامالار بالالاردىڭ ەرتە جاستان تسيفرلىق تەحنولوگيانى قاۋىپسىز پايدالانۋدى ۇيرەنۋىنە ۇلكەن ىقپال ەتەتىنىن اتاپ ءوتتى.
«بۇل جەڭىستىڭ ارتىندا — اتا-اناسىنىڭ قولداۋى, سىنىپ جەتەكشىسىنىڭ ەڭبەگى جانە مەكتەپ ديرەكتورىنا دەگەن سەنىم جاتىر. بايقاۋدىڭ باستى ماقساتى — بالالار مەن اتا-انالاردىڭ تسيفرلىق ساۋاتتىلىعىن ارتتىرۋ, ينتەرنەت الاياقتارىنان ساقتانۋ جولدارىن ۇيرەتۋ», — دەدى وڭىرلىك پوليتسيا باسشىسى.
مەرەيلىمنىڭ جەڭىسى ونىڭ جەكە جەتىستىگى عانا ەمەس, قوعامنىڭ كيبەرقاۋىپسىزدىك ماسەلەلەرىنە نازار اۋدارۋدىڭ ماڭىزىن كورسەتەتىن جارقىن ۇلگى بولدى. پوليتسەيلەر مۇنداي جوبالار الداعى ۋاقىتتا دا جالعاسىپ, وسكەلەڭ ۇرپاقتىڭ ينتەرنەتتەگى جاۋاپتى ءارى قاۋىپسىز ءجۇرىس-تۇرىسىن قالىپتاستىرۋعا ىقپال ەتەدى دەگەن سەنىم ءبىلدىردى.