مەملەكەت باسشىسى قاسىم-جومارت توقاەۆ اۋىل اكىمدەرىنىڭ ديالوگ-پلاتفورماسىندا ءسوز سويلەپ, اۋدان اكىمىن سايلاۋدىڭ ءتيىمدى-ءتيىمسىز تۇستارىن مۇقيات سارالاۋدى تاپسىردى, دەپ حابارلايدى Egemen.kz.
«ال اۋدان اكىمدەرىن سايلاۋعا قاتىستى ءارتۇرلى كوزقاراس بار. بىرقاتار قوعام قايراتكەرى مەن بەلسەندى ازاماتتار «اۋدان اكىمدەرىن سايلاۋ قاجەت پە, جوق پا» دەگەن ماسەلەنى قايتا قاراۋدى ۇسىنۋدا», دەدى قاسىم-جومارت توقاەۆ.
مەملەكەت باسشىسى بۇل ماسەلەنى ەرلان سايروۆ, البەرت راۋ, مارحابات جايىمبەتوۆ باستاعان دەپۋتاتتار دا كوتەرگەنىن ايتتى.
«ولار ەلدە سايلاۋ تىم كوبەيىپ بارا جاتقانىن, جۇرت ساياسي ناۋقانداردان مەزى بولا باستاعانىن ايتۋدا. بۇل پىكىردى اۋىل جانە اۋدان تۇرعىندارى دا قولداپ جاتىر. سايلاۋ ناۋقاندارى جەرگىلىكتى جەردە جۇرگىزىلۋگە ءتيىس ناقتى جۇمىستارعا كەدەرگى كەلتىرۋى مۇمكىن دەگەن پايىمدار دا بار. بۇل پىكىرلەردى ەسكەرگەن ءجون», دەدى مەملەكەت باسشىسى.
پرەزيدەنتتىڭ ايتۋىنشا, وسىعان دەيىن اۋدان اكىمدەرىن سايلاۋ ءتاسىلى ارقىلى 52 اكىم سايلاندى.
«ەندى ولاردىڭ قالاي جۇمىس ىستەيتىنىن قاراپ كورۋ قاجەت. اۋدان اكىمىن سايلاۋدىڭ ءتيىمدى-ءتيىمسىز تۇستارىن مۇقيات سارالاۋ كەرەك. ماسەلە – اۋدان اكىمدەرىنىڭ سايلاۋىن مىندەتتى تۇردە وتكىزۋ ەمەس, باستى ماقسات: ءبىز وڭ ناتيجەلەرگە قول جەتكىزۋىمىز كەرەك. ۇكىمەت جانە پارلامەنت دەپۋتاتتارى بىرلەسىپ, وسى ماسەلەنى جان-جاقتى قاراپ, ادىلەتتى, دۇرىس شەشىم قابىلداۋى قاجەت. ەڭ باستىسى, ءاربىر رەفورما سالماقتى كوزقاراسپەن, بايىپپەن جاسالۋى كەرەك», دەدى قاسىم-جومارت توقاەۆ.