بۇگىن ءماجىلىستىڭ جالپى وتىرىسىندا دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆ استانا مەن الماتىدا جەدەل جاردەم قىزمەتكەرلەرىنە قاتىستى كەلەڭسىز وقيعالار 90 پايىزعا تومەندەگەنىن ايتتى. وڭ كورسەتكىشتىڭ وسۋىنە مەگاپوليستەردەگى مەديتسينا ماماندارىنىڭ بەينەتىركەگىشپەن قامتىلۋى تۇرتكى بولعان, دەپ جازادى Egemen.kz.
قازىر ەلىمىزدە دارىگەرلەردىڭ قاۋىپسىزدىگىن ارتتىرۋ ماقساتىندا جۇيەلى شارالار اتقارىلىپ جاتىر. بۇعان دەيىن سالالىق مينيسترلىك ءىىم-مەن بىرلەسىپ مەديتسينالىق مەكەمەلەردە 150-گە جۋىق پوليتسيا بەكەتىن اشقان.
تيمۋر سۇلتانعازيەۆ وسى باعىتتا اتقارىلىپ جاتقان وزگە دە شارالارعا توقتالدى.
«ستاتسيونارلاردا كامەرالار ورناتىپ جاتىرمىز. بۇل كامەرالار پوليتسيانىڭ جەدەل باسقارۋ ورتالىعىنا قوسىلعان. بۇدان بولەك, 600 مەديتسينا ۇيىمنىڭ ءاربىر قابىلداۋ بولمەسىنە دابىل نۇكتەلەرى ورناتىلدى. سونىڭ ارقاسىندا قاجەتتى جەدەل الدىن الۋ شارالارى جۇرگىزىلىپ جاتىر», دەدى ول.
جوعارىدا اتالعان استانا مەن الماتى قالالارىنداعى كورسەتكىش نەگىزىندە وزگە ايماقتاعى جەدەل جاردەم قىزمەتكەرلەرىن دە جاپپاي بەينەتىركەگىشپەن قامتۋ كوزدەلىپ وتىر.
دەنساۋلىق ساقتاۋ ءبىرىنشى ۆيتسە-ءمينيسترى وسى جوسپار اياسىندا «قازاقتەلەكوممەن» بىرگە ءتيىستى شارالار قولعا الىنعانىن جەتكىزدى.