وش قالاسىندا قازاقستان رەسپۋبليكاسى پرەزيدەنتى قاسىم-جومارت توقاەۆتىڭ «اكە تۋرالى وي-تولعاۋ» («اتام ءجونۇندو بايان») اتتى قىرعىز تىلىنە اۋدارىلعان كىتابىنىڭ تانىستىرىلىمى ءوتتى.
كىتاپ قازاق ادەبيەتىندەگى دەتەكتيۆ جانرىنىڭ نەگىزىن قالاعان, ەلدىك پەن ەرلىك جولىندا قالام تەربەگەن كورنەكتى جازۋشى, قايراتكەر تۇلعا كەمەل توقاەۆقا ارنالعان.
ءىس-شارا قىرعىز رەسپۋبليكاسىنىڭ سىرتقى ىستەر مينيسترلىگىنىڭ كونفەرەنتسيا زالىندا ءوتتى. وعان قازاقستاننىڭ مادەنيەت جانە اقپارات ءمينيسترى ايدا بالاەۆا, قىرعىزستاننىڭ مادەنيەت, اقپارات, سپورت جانە جاستار ساياساتى ءمينيسترىنىڭ ورىنباسارى اسكارالى مادامينوۆ, وش قالاسىنىڭ مەرى جەنيشبەك توكتورباەۆ, وشمۋ رەكتورى قۋدايبەردي كوجوبەكوۆ, قىرعىزستان جازۋشىلار وداعىنىڭ بۇرىنعى توراعاسى نۋرلانبەك كالىبەكوۆ جانە قىرعىزستاننىڭ شىعارماشىلىق زيالى قاۋىم وكىلدەرى قاتىستى.
ەلىمىزدىڭ مادەنيەت جانە اقپارات ءمينيسترى ايدا بالاەۆا ەكى ەل پرەزيدەنتتەرىنىڭ دوستىق پەن سەنىمگە نەگىزدەلگەن تىعىز قارىم-قاتىناسى ساياسي جانە ەكونوميكالىق سالالارمەن قاتار, مادەني-گۋمانيتارلىق بايلانىستارعا دا تىڭ سەرپىن بەرىپ كەلەتىنىن اتاپ ءوتتى.
«بۇگىن قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆتىڭ «اكە تۋرالى وي-تولعاۋ» اتتى تەرەڭ ماعىنالى ەڭبەگىنىڭ قىرعىز تىلىندەگى تانىستىرىلىمى – ەكى ەل اراسىنداعى ادەبي بايلانىستاردى جاڭا بەلەسكە كوتەرەتىن ءمانى زور قادام. تۋىندىنىڭ قازاق تىلىنەن قىرعىز تىلىنە اۋدارىلۋى – ءبىزدىڭ ورتاق تاريحي-مادەني كەڭىستىگىمىزدىڭ تابيعي جالعاسى جانە رۋحاني ساباقتاستىعىمىزدىڭ كورىنىسى. بۇل كىتاپتىڭ وقىرمانعا قۋات, تاربيە, وي جانە جۇرەك جىلۋىن سىيلايتىنىنا سەنىم بىلدىرەمىن», دەدى مينيستر.
بۇل كىتاپ – عۇمىرى حح عاسىردىڭ بار اۋىرتپالىعىن ارقالاعان بارشا قازاقتىڭ تاعدىرىمەن استاسىپ جاتقان حالقىمىزدىڭ كورنەكتى جازۋشىسى كەمەل توقاەۆ جايىندا. مايدان جىلدارىنىڭ قاسىرەتى, سوعىستان كەيىنگى جاڭارۋ كەزەڭى, ادامدىق پەن ادالدىق تۋرالى تۇسىنىك – وسىنىڭ ءبارى كىتاپتا شىنايى بەينەلەنەدى.
«بۇل كىتاپ قىرعىز جانە قازاق حالىقتارىنىڭ دوستىعىن نىعايتۋدا زور ماڭىزعا يە. قازاق تىلىنەن قىرعىز تىلىنە اۋدارىلىپ, قىرعىز وقىرماندارىنا ۇسىنىلۋى – ەكى ەل اراسىنداعى رۋحاني بايلانىستىڭ بەلگىسى. بۇل – حالىقتارىمىزدىڭ مادەني بىرلىگى مەن باۋىرلاستىعىنىڭ ايقىن دالەلى», دەدى اسكارالى مادامينوۆ.
تۇساۋكەسەرگە جينالعان كوپشىلىككە پرەزيدەنت كىتابىنىڭ جەلىسى بويىنشا تۇسىرىلگەن «باۋىر» اتتى دەرەكتى فيلم كورسەتىلدى. ايتا كەتەيىك, «اكە تۋرالى وي-تولعاۋ» كىتابى رۋمىن, اراب, موڭعول, تۇرىك جانە قىرعىز تىلدەرىنە اۋدارىلدى.