مارافون جەڭىمپازى – اكە مەن بالا

بۇرىن مۇنايلى وڭىردە ءدال مۇنداي ءىس-شارا وتپەگەن ەدى. بۇل – وتباسىلىق قۇندىلىقتى نىعايتۋعا, جاس بۋىندى سالاماتتىلىق سالتىنا تاربيەلەۋدىڭ ماڭىزىن ناسيحاتتاۋعا باعىتتالعان ەرەكشە ءىس-شارا. اكەنىڭ ىزگىلىكتى ىسىنەن ۇلگى الاتىن بالالاردىڭ ىنتاسىن سپورتقا اۋدارعان مارافوننىڭ جۇلدە قورى 600 مىڭ تەڭگە. سپورتتى سەرىك ەتكەن اكەلەر بەس شاقىرىمعا, ال جاسى 11-دەن اسقان ۇلدار ءۇش شاقىرىمعا جۇگىردى. 

ارينە, سپورتتىق سايىسقا قاتىسۋشىنىڭ ماقساتى – جەڭىمپاز اتانۋ. الايدا بابى كەلىسكەننىڭ باعى جانادى. بۇل جولى اكەلى-بالالى ەركەبۇلان اتاشوۆ پەن «دوستىق» مەكتەبىنىڭ 11-سىنىبىندا وقيتىن ۇلى نيكولاي دىنمۇحاممەد جەڭىمپاز اتاندى.

ء«بىز كۇن سايىن جۇگىرەمىز. بۇل ءبىزدىڭ داعدىمىزعا اينالدى. سپورتتىڭ قاي ءتۇرى دە, اسىرەسە جۇگىرۋ – دەنساۋلىقتىڭ, سەرگەك ءجۇرۋدىڭ كەپىلى. ءوزىم وسىنداي مارافونعا 2021 جىلدان بەرى قاتىسىپ كەلەمىن. ال ۇلىم 2023 جىلدان قاتىسا باستادى. وبلىستىق جانە رەسپۋبليكالىق سايىستارعا ءجيى بارامىز. اكەسى مەن ۇلدارى جۇگىرەتىن مارافوننىڭ وتەتىنىن ەستىپ, بىرگە قاتىسۋدى ۇيعاردىق. باعىمىز جانىپ, ەكەۋمىز دە جەڭىمپاز اتاندىق», دەيدى ە.اتاشوۆ.

ول بيىل قازان ايىندا ءۇندىستاندا وتكەن ازيا چەمپيوناتىنا قاتىستى. قۇرلىقتىق دودادان كۇمىس جانە قولا جۇلدەمەن ورالدى. اۋەلى 800 مەتر قاشىقتىقتا كۇمىس, كەيىن 1,5 شاقىرىمدا قولا جۇلدە يەلەندى.

اكەلەر اراسىنان مارەگە ەكىنشى كەلگەن بولات مۇقاشەۆ ءتۇرلى مارافونعا 2017 جىلدان بەرى تۇراقتى قاتىسىپ ءجۇر. بىرنەشە رەت جۇلدەگەر بولدى. ول – 21 شاقىرىمدىق مارافوندى جۇگىرىپ وتكەن جەلاياقتىڭ ءبىرى. ەندى ونىڭ جولىن جالعاستىرۋدى كوزدەگەن ۇلى يبراگيم جۇماباي بۇل مارافوندا جەڭىمپاز بولا المادى. بىراق العاشقى وندىققا كىردى.

ال مارە سىزىعىن ءۇشىنشى بولىپ رىسبەك توراليەۆ كەستى. مارافونعا ونىڭ ۇلى دا قاتىسقان ەدى. الايدا مارەگە ون ءبىرىنشى بولىپ جەتتى.

سپورتقا بەيىم ۇلدار اراسىنان مارافوننىڭ ءبىرىنشى جۇلدەسىن ءالىم كوشقاليەۆ يەلەندى. ءۇشىنشى ورىنعا اسىلجان سالىق يە بولدى.

اتىراۋ وبلىسى