الماتىداعى ۇلتتىق ورتالىق مۋزەيدە پەچۆورك پەن كۆيلتينگتىڭ ءداستۇرلى ساندىك-قولدانبالى ونەرىنە ارنالعان توعىزىنشى «شىعىس بازارى» پەچۆورك-فەستيۆالىنىڭ رەسمي اشىلۋ سالتاناتى ءوتتى, دەپ حابارلايدى Egemen.kz.
ەلىمىزدىڭ تۇكپىر-تۇكپىرىنەن كەلگەن شەبەرلەردى, سۋرەتشىلەر مەن قۇراق قۇراۋ ونەرىنىڭ ۇزدىكتەرىن بىرىكتىرگەن ماڭىزدى مادەني وقيعا جوعارى دەڭگەيدە ءوتتى.
توقىما ونەرىنىڭ باي ءداستۇرىن پاش ەتكەن تۋىندىگەرلەرگە العىسىن بىلدىرگەن پەچۆورك تىگىسى قاۋىمداستىعىنىڭ پرەزيدەنتى, جوبانىڭ باستاماشىسى ءارى كورمە ۇيىمداستىرۋشىسى ت.ب. شتروشەرەر, ايتۋلى ونەر ادامزات مادەنيەتىندە ايشىقتى مانگە يە ەكەنىن اتاپ ءوتتى.
ءىس-شارادا ۇلتتىق ورتالىق مۋزەي ديرەكتورىنىڭ مىندەتىن اتقارۋشى سەرجان ساروۆ قۇتتىقتاۋ ءسوز سويلەپ, كونە قازاق ونەرى – قۇراقتىڭ جاڭعىرۋىنىڭ ماڭىزىنا توقتالىپ, ونىڭ ۋاقىتتار ساباقتاستىعىن ساقتاي وتىرىپ, قازىرگى شەبەرلەردىڭ جۇمىستارىندا كورىنىس تاۋىپ وتىرعانىن مالىمدەدى.
سالتاناتتى بولىمگە حالىقارالىق قازىلار القاسى – مارسەل رامسەيەر (شۆەيتساريا), ناتاليا كريۆەتس (فرانتسيا), دميتريشش دزيبالوۆ (قازاقستان), ناتاليا مامەتنيازوۆا (قازاقستان) جانە تامارا شتروشەرەر (گەرمانيا) قاتىسىپ, «الەمدەردى توعايتۋ: پەچۆورك — مادەنيەتتەر ديالوگى» كونكۋرسىنىڭ جەڭىمپازدارىن BERNINA (شۆەيتساريا), CROWN (گەرمانيا) «تىگىن ماشينالارى ءۇيى» كومپانيالارى ۇسىنعان باعالى سىيلىقتارمەن ماراپاتتادى.
كورمەدە ناتاليا كريۆەتس جيناعان كونە قازاق كىلەمدەرىنىڭ بىرەگەي توپتاماسى, سونداي-اق تۇسكيىز, قۇراق, پەچۆورك جانە ارت-كۆيلت شىعارمالارى ۇسىنىلدى. بۇل ەكسپوزيتسيا 2025 جىلى سەنت-ماري-و-ميندە (فرانتسيا) وتكەن وتىزىنشى مەرەيتويلىق فەستيۆالدا زور جەتىستىككە جەتكەن بولاتىن. بۇل فەستيۆال — جاپونيانىڭ توكيو جانە اقش-تىڭ تەحاس شتاتى, حيۋستون قالاسىنداعى فەستيۆالدەردەن كەيىنگى توقىما ونەرىندەگى الەمدەگى ەڭ ءىرى ءۇش وقيعانىڭ ءبىرى.
كورمەدە وتاندىق جەتەكشى كۆيلتينگ جانە پەچۆورك شەبەرلەرىنىڭ جەكە كورمەلەرى دە تانىستىرىلدى. ولاردىڭ قاتارىندا ن. دياچەنكو, ن.مامەتنيازوۆا, ز. بەلگىباەۆا, م. تۋرلىبەكوۆا, گ. سۋرنينا قاتارلى شەبەرلەر بار.
جوبا اياسىندا «الەمدەردى توعايتۋ: پەچۆورك — مادەنيەتتەر ديالوگى» اتتى كونكۋرس كورمەسى ۇيىمداستىرىلىپ, وندا جۇزدەگەن ماتانىڭ قيىقتارىنان قۇراستىرىلعان بىرەگەي پولوتنولار حالىقتار دوستىعىنىڭ سيمۆولى رەتىندە كورىنىس تاپتى.
قوناقتار ءۇشىن لوتەرەيا ويناتىلىپ, ۇلتتىق كيىمدەر كورسەتىلىمى جانە «تىگىن ماشينالارى ءۇيىنىڭ» تاجىريبەلى كەڭەسشىلەرى جەتەكشىلىك ەتكەن, زاماناۋي جابدىقتارمەن لوسكۋت تىگىسى بويىنشا شەبەرلىك ساباقتارى وتكىزىلدى.