ورتالىق ازياداعى جاسىل قۇرىلىستىڭ بولاشاعى قانداي؟

بيىلعى فورۋم كەڭەستىڭ ون جىلدىق قىزمەتىنە ارنالدى. ءىس-شاراعا جەتەكشى قۇرىلىس كومپانيالارى, دەۆەلوپەرلەر, ساۋلەتشىلەر, حالىقارالىق ۇيىمدار, قارجى ينستيتۋتتارى مەن جوعارى وقۋ ورىندارى وكىلدەرى قاتىستى. جۇزدەن استام كاسىبي مامان جينالعان الاڭ وڭىردەگى جاسىل قۇرىلىس سالاسىنىڭ الەۋەتىن تالقىلايتىن ءىرى پلاتفورماعا اينالدى.

KazGBC ون جىلدا تۇراقتى قۇرىلىس مادەنيەتىن دامىتۋدا ايتارلىقتاي ناتيجەگە قول جەتكىزدى. ەنەرگيا تيىمدىلىگى, رەسۋرستاردى ۇنەمدەۋ مەن ەكولوگيالىق تالاپتاردى ەنگىزۋ جونىندەگى باستامالار سالانىڭ جاڭا ستاندارتىن قالىپتاستىرۋعا ىقپال ەتتى.

وتاندىق OMIR ادىستەمەسى وسى جۇمىستىڭ باستى جەمىسىنىڭ ءبىرى بولىپ وتىر. قازىر جالپى اۋدانى 5 ملن شارشى مەترگە جۋىق 150-دەن استام نىسان OMIR سەرتيفيكاتىن العان. ايتا كەتەرلىگى, ادىستەمە تەك وزىمىزدە عانا ەمەس, ءوڭىر ەلدەرىندە دە قولدانىلىپ, ازەربايجاننىڭ جاسىل قۇرىلىس ستاندارتىنىڭ نەگىزى بولا الدى.

جاڭا تەحنولوگيالار مەن ترەندتەر  

فورۋمدا سالانىڭ وزەكتى باعىتتارى – يننوۆاتسيالىق قۇرىلىس ماتەريالدارى, تسيفرلاندىرۋ, جاسىل جوبالاردى قارجىلاندىرۋ مەحانيزمدەرى, جاڭا بۋىن ماماندارىن دايارلاۋ سياقتى ماسەلەلەر تالداندى.

سپيكەرلەر قاتارىندا KazGBC وكىلدەرى دانيار ازىمحانوۆ, ايمان شوپاەۆا, الەكساندر بەلىي, سونداي-اق ازەربايجان جاسىل قۇرىلىس كەڭەسىنىڭ ديرەكتورى فۋاد باگيروۆ پەن قۇرىلىس ماتەريالدارىن سەرتيفيكاتتاۋ جونىندەگى ساراپشى ۆيكتوريا گلۋششەنكو بولدى. ءىس-شاراعا ازيا دامۋ بانكى, BI Group, Bazis A, Sat NS, وتباسى بانك, Satbayev University جانە ەۇۋ سياقتى ۇيىمدار قاتىستى.

 يگى ءىس-شارانىڭ ماڭىزدى ساتتەرىنىڭ ءبىرى جاسىل قۇرىلىس سالاسىنداعى ۇزدىك جوبالار مەن كومپانيالاردى ماراپاتتايتىن Green Awards ءراسىمى بولدى. ماراپات يەگەرلەرى قاتارىندا Sat NS, OKS Group, Kanfar Building, ادب, نۇر استانا قۇرىلىس, Nest Stroy, Satbayev University, «ەرگونوميكا» عىلىمي-وندىرىستىك فيرماسى جانە باسقا ۇيىمدار بار.

KazGBC ديرەكتورى دانيار ازىمحانوۆ ون جىلداعى قيىندىقتار مەن جەتىستىكتەرگە توقتالىپ, «تۇراقتى ءارى دامۋشى جۇيە قالىپتاستىرۋ – بۇكىل كوماندانىڭ ەڭبەگى» ەكەنىن ايتتى. ال اتقارۋشى ديرەكتور الەكساندر بەلىي «قازاقستان نارىعى ەكولوگيالىق ترانسفورماتسياعا دايىن, جاسىل قۇرىلىس ەكونوميكالىق وسىمگە دە, باسەكەگە قابىلەتتىلىككە دە اسەر ەتەتىن فاكتورعا اينالدى» دەدى.

ازەربايجان جاسىل قۇرىلىس كەڭەسىنىڭ ديرەكتورى فۋاد باگيروۆ ورتالىق ازيا – كاسپي – كاۆكاز ايماعىنداعى سەرىكتەستىك جاسىل قۇرىلىس بويىنشا بىرلەسكەن جوبالار ازىرلەۋگە مۇمكىندىك بەرەتىنىن اتاپ ءوتتى. ونىڭ ايتۋىنشا, KazGBC ءوڭىردىڭ جاسىل قۇرىلىس ترەندتەرىن قالىپتاستىرىپ, كورشى ەلدەر ءۇشىن تاجىريبە ورتالىعىنا اينالىپ وتىر.

قازاقستان – وڭىرلىك جاسىل قۇرىلىس ورتالىعى

Green Build Central Asia 2025 فورۋمى تاجىريبە الماسۋدىڭ, كاسىبي بايلانىس پەن بىرلەسكەن جوبالاردى باستاۋعا ارنالعان الاڭنىڭ ماڭىزىن كورسەتتى. پراكتيكالىق شەشىمدەردىڭ تانىستىرىلۋى, OMIR ادىستەمەسىن جەتىلدىرۋ باعىتتارىنىڭ بەلگىلەنۋى مەن ۇزدىك كومپانيالاردى ماراپاتتاۋ ەلىمىزدىڭ جاسىل قۇرىلىس بويىنشا وڭىرلىك كوشباسشى رەتىندە ورنىعا تۇسكەنىن دالەلدەيدى.

KazGBC فورۋمنىڭ قورىتىندىسىندا «ون جىلدا تۇراقتى قۇرىلىس يدەيالارىن نارىق دامۋىنىڭ ءبىر بولىگىنە اينالدىردىق. بۇگىندە ەلىمىز ورتالىق ازياداعى جاسىل قۇرىلىس كوشباسشىسى بولۋعا تولىق مۇمكىندىگى بار», دەگەن تۇجىرىم ايتىلدى.

بۇل فورۋم تۇراقتى ينفراقۇرىلىم قۇرۋعا باعىتتالعان جاڭا جوبالارعا جول اشىپ, ەلدىڭ جاسىل ەكونوميكاعا كوشۋىندەگى ماڭىزدى قادامداردىڭ ءبىرى بولدى.